1 Ne migpabulus-bulus si Muwisis ka migkahi diye te me kabuhalan ni Israil, “Seini ka me balaud wey suhu ne ingkahi keddi te Magbebaye ne Manama ta ne igpepanulu kaniyu, eyew egtumanen niyu diye te tane ne eggendiyaan wey eg-angkenen niyu. 2 Sikaniyu wey ka me anak niyu wey ka me apu niyu, keilangan ne egtahud te Manama, wey egtuman te langun ne balaud din ne ingkahi ku kaniyu, eyew egmalayat ka umul niyu diye te seeye ne tane. 3 Purisu pammineg kew me kabuhalan ni Israil—tumana niyud iya te mapahetpet ka me suhu din, eyew egmeupiya ka peg-ugpe niyu, wey egkeyimu kew ne mabantug ne nasud diye te meupiya ne tane wey dakel se eg-uma,* Te Hibruwanen: tane ne egtulayasan te gatas wey teneb. su sika ka insaad te Manama diye te me kaap-apuan niyu.

4  ✡ Mar 12:29.“Pammineg kew me kabuhalan ni Israil: ka Magbebaye de iya ka Manama ta. 5  ✡ Mat 22:37; Mar 12:30; Luk 10:27.Geyinawei niyu ka Manama niyu te mapahetpet wey ipapitew niyu te langun ne eggimuwen niyu ne inggeyinawaan niyu sikandin. 6  ✡ Diy 11:18-20.Kene niyu kalingawi seini se me suhu ne ingkahi ku kaniyu kuntee. 7 Ipanulu niyu layun seini diye te me anak niyu. Ne malalahey kew meyitenged kayi ke egpaminpinnuu kew diye te me baley niyu, ke egpangipanew kew, ke egpangibat kew, wey ke eggimata kew te maselem. 8 Isulat niyu seini wey ibagkes niyu te bakelawan niyu wey ilelangkus niyu eyew egkasuman-suman niyu seini. 9 Isulat niyu seini diye te sungkaleg te gumawan te me baley niyu, wey diye te me gumawan te me alad te me lungsud niyu.”

10  ✡ Hin 12:7; Hin 26:3; Hin 28:13.Ne ingkahiyan e man‑e ni Muwisis ka me kabuhalan ni Israil, “Migsaad ka Manama niyu diye te me kaap-apuan niyu ne ensi Abraham, si Isaak, wey si Hakub, ne igbehey rin kaniyu ka tane ne eg-uyanan din kaniyu. Ka seini ne tane, due malluag wey matubung ne me siyudad ne kene ne sikaniyu ka migpasasindeg. 11 Ne ka me baley diye, neelin ne nenapenu te mateles ne me kasangkapan ne kene ne sikaniyu ka migpanahu. Ne due me belun diye ne kene ne sikaniyu ka migkekali, wey due me ulibuwan wey me parasan ne kene ne sikaniyu ka migpamula. Ke eg-uyanen kew e te Manama diye te seeye ne tane, egpakakeen kew te minsan nekey ne igkeibeg niyu. 12 Piru kene niyu re iya kalingawi ka Manama ne migpalihawang kaniyu puun te pegkeuripen diye te Ihiptu. 13  ✡ Mat 4:10; Luk 4:8.Tahura niyu ka Manama niyu, wey sikandin de pamakaya niyu, wey kahi kew te egdusaan kew nikandin ke kene niyu eggimuwen ka insaad niyu. 14 Kene kew simba te lein ne me manama ne insimba te duma ne nasud ne nakalingut kaniyu, 15 su egkabelu ka Manama ne migduma kaniyu ke egsimba kew te lein ne me manama. Emun ke eggimuwen niyu sika, egkaneem-neem niyu ka langet te Manama, wey egguleen kew nikandin kayi te kalibutan.

16  ✡ Mat 4:7; Luk 4:12; Iks 17:1-7.“Kene niyu el-elehi ka Manama niyu iling te inggimu niyu diye te Masa. 17 Tumana niyud iya te mapahetpet ka me balaud ne insuhu kaniyu te Manama niyu. 18 Himuwa niyu ka matareng diye te tangkaan din eyew egmeupiya ka peg-ugpe niyu wey egkaangken niyu ka meupiya ne Inged ne Insaad din te me kaap-apuan niyu. 19 Egtuhutan din ne egkaddeldel niyu ka me kuntere niyu sumale te ingkahi rin.

20 “Te egginguma ne me timpu, emun ke eg-inse ka me anak niyu te, ‘Mania te insuhu ki te Magbebaye ne Manama ta te pegtuman te seini ne me balaud wey me suhu?’ 21 Ne kahii niyu sikandan, ‘Neuripen key dengan te Hari diye te Ihiptu, piru impalihawang key te Manama pinaahi te dakel ne geem din. 22 Nakakita key mismu te masulug ne kein-inuwan wey makaalat-halat ne pegdereet te Manama te me Ihiptuhanen wey te Hari dan wey te intiru ne pamilya rin. 23 Ne impalihawang key nikandin puun te Ihiptu eyew eg-uyanen key kayi te seini ne Inged ne Insaad din te me kaap-apuan ta ne igbehey rin kanta. 24 Migsuhu ka Magbebaye ne Manama ta ne keilangan ne egtumanen ney ka langun ne balaud din, wey egtahuren ney sikandin ne Manama ney, eyew egmatubung key wey egmalayat pad ka umul ney iling te seinid iya kuntee. 25 Ne emun ke egtumanen ta te mapahetpet ka langun ne suhu te Magbebaye ne Manama ta, egkeyimu ki ne matareng diye te tangkaan din.’ ”