1  ✡ Him 13:19.Ne ingkahiyan ni Muwisis ka me kabuhalan ni Israil, “Ke eg-uyanen kew e te Magbebaye ne Manama niyu diye te tane ne eg-angkenen niyu, egpandeldelen din ka pitu ne nasud ne masmasulug wey me madmaresen pad kaniyu, ne iyan ka me Hitihanen, me Girgasihanen, me Amurihanen, me Kanaanen, me Pirisihanen, me Hibihanen, wey me Hibusihanen. 2 Ne emun ke igbehey e sikandan te Manama due te kaniyu, wey egkatalu niyud sikandan, kene kew naa himu te kasabutan duma kandan, ke kene, pangimatayi niyu sikandan langun te ware pegkeyid‑u. 3 Ne kene kew pangasawa kandan, wey kene niyu tuhuti ne egpangasawa ka me anak niyu te me anak dan, 4 su sikandan ka egpuunan ne egmanginniyug e te Manama ka me anak niyu, wey iyan dan e egsimbeen ka lein ne me manama. Ne emun ke egkeyitabu sika, egkaneem-neem niyu ka langet te Manama, wey sahuhune ne egguleen kew nikandin. 5  ✡ Diy 12:3.Purisu seini himuwa niyu: panlundusa niyu ka me altar dan ne tutunganan te igpanubad, panlupeta niyu ka immeg-untud-untud dan ne me batu ne inhalad dan ki Baal, pamelera niyu ka me sungkaleg dan ne larawan ni Asira, wey panilabi niyu ka impangulit dan ne me larawan. 6  ✡ Iks 19:5; Diy 4:20; 14:2; 26:18; Tit 2:14; 1Pid 2:9.Himuwa niyu sika su keet-etawan kew ma te Manama niyu. Te langun ne etew te intiru ne kalibutan, sikaniyu ka in-alam te Manama eyew egkeyimu ne keet-etawan din.

7 “In-alam kew wey inggeyinawaan te Manama kene ne tenged te masmasulug kew du te duma ne keet-etawan, su ka malehet, sikaniyu iya ka subla ne deisek te langun. 8 Piru in-alam kew te Manama su inggeyinawaan kew ma nikandin—intuman din iya ka insaad din te me kaap-apuan niyu. Sikan naa ka impalihawang kew nikandin pinaahi te dakel ne geem din puun te peg-uripen kaniyu te Hari te Ihiptu. 9  ✡ Iks 20:5-6; 34:6-7; Num 14:18; Diy 5:9-10.Purisu sumsumana niyu paay-ayari ne malehet iya ne Manama ka insimba niyu. Egkasalihan sikandin ne Manama, wey egtumanen din ka me saad din wey ka geyinawa rin ne kene egkabalbalawan diye te masulug ne kabuhalan ne eggeyinawa kandin wey egtuman te me suhu din. 10 Piru eglegparan wey egdereetan din seeye se eg-inniyug kandin. 11 Purisu tumana niyud iya te mapahetpet ka langun ne balaud wey me suhu ne ingkahi ku kaniyu kuntee.”

12  ✡ Diy 11:13-17.Ne migpabulus-bulus si Muwisis ka migkahi te me kabuhalan ni Israil, “Emun ke egtumanen niyu te mapahetpet ka langun ne suhu, egtumanen te Manama ka kasabutan din kaniyu wey ka geyinawa ne kene egkabalbalawan ne insaad din te me kaap-apuan niyu. 13 Eggeyinawaan kew nikandin, egpanalanginan, wey egpamasuluhen ka me kabuhalan niyu. Egpanalanginan din degma ka me anak niyu wey ka me kamet niyu eyew due egkakeen niyu, binu, wey lana te ulibu. Ne egpanalanginan din degma ka me ayam niyu—me baka, me karniru, wey me kambing niyu diye te Inged ne Insaad din te me kaap-apuan niyu ne igbehey kaniyu. 14 Egpanalanginan kew nikandin labew te langun ne keet-etawan. Ne ware minsan sabeka kaniyu ne kene egpakaanak, lukes ma wey se malitan. Ne iling ded degma ka me ayam niyu. 15 Ne igpariyu kew te Manama puun te langun ne dalu, wey kene kew nikandin egpasalerepen te mangune-kune ne me karereetan ne iling te nakita niyu diye te Ihiptu. Piru egpasalerepen din mule te iling dutu ka langun ne kuntere niyu. 16 Ne keilangan ne egpangimatayan niyu sikandan wey kene niyu keyid‑uwi ka langun ne etew ne igbehey kaniyu te Manama. Ne kene kew simba te me manama ran su sika ka egpakaakal kaniyu.

17 “Ne kene kew suman-suman te masmasulug pad sikandan kaniyu wey kene niyu sikandan egkaddeldel. 18 Kene kew kaaldek kandan, ke kene sumsumana niyu ka inggimu te Magbebaye ne Manama niyu diye te Hari te Ihiptu wey te langun ne keet-etawan din. 19 Sumsumana niyu ka me makaalat-halat ne dalu ne nakita niyu, ka me kein-inuwan, ka dakel ne geem wey kanekal ne inggamit te Manama te pegpalihawang kaniyu. Sikan ded degma ka eggimuwen te Manama diye te langun ne etew ne igkengaaldek niyu. 20 Ne eggukahen din pad man‑e sikandan, wey egguleen din ka seeye se nakapallahuy wey nangeles kaniyu. 21 Kene kew kaaldek kandan su egdumaan kew te Manama niyu. Mabantug sikandin ne Manama wey sikandin de ka eleg ne igkaaldek niyu. 22 Egpahan-ganaran sikandan egmandeldela te Manama ke egpalundaniyan kew e kandan. Kene din egtuhutan ne egkahule niyu sikandan te kasabeka re, su ke eggimuwen din sika, ka me mananap ne egpanalukun kaniyu mahaan de egmasulug, wey kene niyud egkaawe ka sika ne me mananap. 23 Piru igbehey sikandan te Manama due te kaniyu. Ne egkewukag sikandan taman te egkammatey langun sikandan. 24 Igbehey rin kaniyu ka me Hari dan. Egpangimatayan niyu sikandan wey egkaawe e ka me ngaran dan kayi te ampew te tane. Ne ware minsan sabeka ne egpakabalabag kaniyu te pegpangimatey kandan langun. 25 Panilabi niyu ka impangulit dan ne me larawan te me diyus-diyus dan. Ne kene niyu ikeimma wey ke egkuen naa ka me bulawan wey me pelata ne nakareket due. Kene niyu iya kua sika eyew kene kew egsahad te balatik. Pakaddiyu kew iya due su igkalindit iya sika te Magbebaye ne Manama niyu. 26 Kene kew panguyan diye te me baley niyu te minsan hendei te sika ne me diyus-diyus, eyew kene kew egdereetan te Manama. Pariyui niyu wey ikeepes niyu seini su indilus e seini te Manama.”