1 Ne ingkahiyan e man‑e ni Muwisis ka me kabuhalan ni Israil, “Panunggilingan ke due daruwa ne me kabuhalan ni Israil ne egpekeg-ehet, wey eggendiye sikandan te hukumanan, ka me talewukum ka eggukum kandan—egparusaan ka nakasale, wey igpeila ka ware nakasale. 2 Ke iyan de igparusa te nakasale ka peglampes, egpalangkeben sikandin te me talewukum, wey egpanlampesan sikandin diye te tangkaan dan—eglampesan sikandin te kamasulug ne eleg te sale ne neyimu rin. 3 Piru keilangan ne kene egsubla te hep‑at ne pulu (40) ka peglampes kandin, su egkeyilawan e sikandin ke egsublee te hep‑at ne pulu (40) ka peglampes kandin.

4  ✡ 1Kur 9:9; 1Tim 5:18.“Kene niyu pungeta ka be‑be te baka ke igdiriek sikandin te trigu.”

5  ✡ Mat 22:24; Mar 12:19; Luk 20:28.“Ke egpalemungey ka daruwa ne tahasuled ne lukes, ke egpatey ka sabeka kandan ne ware anak ne lukes, keilangan ne kene eg-asawa ka asawa te migpatey te kene ne sakup te pamilya te asawa rin. Keilangan ne iyan din ded eg-asaween ka suled te asawa rin ne migpatey. Katenged sika te suled te migpatey. 6 Ne ka kinakakayan ne anak dan ne lukes, eg-isipen ne kinakakayan ne anak te suled din ne migpatey, eyew kene egkaawe puun te Israil ka ngaran te suled din. 7  ✡ Rut 4:7-8.Piru ke kene egbalu-balu ka suled te migpatey, egkaayun ka balu ne egpangananey diye te me igdatu ne diye te gumawan te lungsud te egkahi, ‘Kena a egpamaluwen te suled te migpatey ne asawa ku eyew due me kabuhalan te suled din kayi te Israil. Kene din egtumanen ka katenged din keddi isip balu te suled din.’ 8 Ne igpeumew sikandin te me igdatu te lungsud, wey eglalahan sikandin. Ne emun ke mapahetpet iya sikandin ne kene egpangasawa te balu te suled din, 9 egparani kandin ka balu taheed te diye sikandan te tangkaan te me igdatu, wey egluungen ka sandal rin, wey egkulepaan ka ulaula rin. Ne egkahi ka balu, ‘Seini ka eggimuwen diye te etew ne egbalibad ne egbehey te me kabuhalan para te suled din ne migpatey.’ 10 Ne ka pamilya te sika ne etew, eggehennalan e diye te Israil te, ‘Ka pamilya te etew ne inluungan te sandal.’ ”

11 Ne ingkahiyan e man‑e ni Muwisis ka me kabuhalan ni Israil, “Panunggilingan ke due daruwa ne etew ne nekeg-ehet, wey migparani ka asawa te sabeka eyew egbulig te asawa rin pinaahi te pegkeyemet te butu te kuntere te asawa rin, 12 keilangan ne egtamperen niyu ka belad te malitan. Kene kew keyid‑u kandin.”

13-14  ✡ Lib 19:35-36.Ne ingkahiyan e man‑e ni Muwisis ka me kabuhalan ni Israil, “Kene kew gamit te kene ne eleg ne timbangan wey sekeranan. 15 Iyan niyu re gamita ka eleg ne timbangan wey sekeranan eyew egmalayat ka umul niyu diye te tane ne igbehey kaniyu te Magbebaye ne Manama niyu; 16 egkalindit ka Magbebaye te etew ne egpanlimbung.”

17  ✡ Iks 17:8-14; 1Sam 15:2-9.Ne ingkahiyan e man‑e ni Muwisis ka me kabuhalan ni Israil, “Sumsumana niyu ka inggimu kaniyu te me Amalikanen te peglihawang niyu puun te Ihiptu. 18 Impanlusuran kew nikandan te timpu ne nenabbeley kew amana, wey impangimatayan dan ka me duma niyu ne nammewuriyan; ware kaaldek dan te Magbebaye. 19 Purisu ke egbehayan kew e te Magbebaye ne Manama niyu te kalinaw puun te langun ne kuntere niyu ne nakalingut kaniyu, diye te tane ne igbehey rin kaniyu, gulaa niyu ka me Amalikanen eyew egkaawe e sikandan kayi te ampew te tane. Kene niyud iya seini kalingawi.”