1 Ne ingkahiyan ni Muwisis wey te me igdatu ka me kabuhalan ni Israil, “Tumana niyu ka langun ne balaud ne ingkahi ku kaniyu kuntee. 2  ✡ Huswi 8:30-32.Mahaan kew e eglapas te Hurdan peendiye te tane ne igbehey kaniyu te Magbebaye ne Manama niyu. Ke egpakalapas kew e, meg-untud-untud kew naa te derakel ne batu, wey puliti niyu seini te apug. 3 Ne isulat niyu naa kayi ka langun ne balaud ke egpakaseled kew e diye te meupiya ne tane wey dakel se eg-uma;* Te Hibruwanen: tane ne egtulayasan te gatas wey teneb. tane ne igbehey kaniyu te Magbebaye ne Manama niyu sumale te insaad din te me kaap-apuan niyu. 4 Ke egpakalapas kew e te Hurdan, ipasasindeg niyu sika ne me batu diye te Bubungan ne Ibal, wey puliti niyu seini te apug sumale te insuhu ku kaniyu kuntee. 5  ✡ Iks 20:25.Ne pasasindeg kew naa te altar ne batu ne tutunganan te igpanubad niyu diye te Magbebaye ne Manama niyu. Piru kene niyu sapsapi ka me batu ne eggamiten niyu, 6 te pegpasasindeg te altar. Ne diye kew naa tutung te igmanubad niyu para te Magbebaye ne Manama niyu; 7 diye kew degma panubad para te keupianan, wey keena niyu seini diye te tangkaan te Magbebaye ne Manama niyu wey gale-gale kew. 8 Ne paay-ayari niyu te egsulat diye te seeye ne me batu ka langun ne balaud te Manama eyew egkaklaru.”

9 Ne ingkahiyan e man‑e ni Muwisis wey te me talagpanubad ne me Libita ka me kabuhalan ni Israil, “Pammineg kew me kabuhalan ni Israil: kuntee ne aldew, me keet-etawan kew e te Magbebaye ne Manama niyu. 10 Purisu pammineg kew te Manama wey tumana niyu ka langun ne me suhu wey me tulumanen din ne ingkahi ku kaniyu kuntee ne aldew.”

11 Te seeye ded ne aldew, ingkahiyan e man‑e ni Muwisis ka me kabuhalan ni Israil, 12  ✡ Diy 11:29; Huswi 8:33-35.“Ke egpakalapas kew e te Hurdan, seini ne me tribu ka egsasindeg diye te Bubungan ne Girisim eyew egpanalangin te me kabuhalan ni Israil: ka tribu enni Libi, Simyun, Huda, Isakar, Husi, wey ni Binhamin. 13 Ne seini degma ne me tribu ka egsasindeg diye te Bubungan ne Ibal eyew egpammineg ke egmenuwen te Manama te eglegpad ka me kabuhalan ni Israil: ka tribu enni Rubin, Gad, Asir, Sabulun, Dan, wey ni Naptali.

14 “Ne igbalbalukan naa seini igpangguhud te me Libita diye te langun ne me kabuhalan ni Israil te egkahi:

15  ✡ Iks 20:4; 34:17; Lib 19:4; 26:1; Diy 4:15-18; 5:8.“Egdilusen ka etew ne eggimu te diyus-diyus ne kayu, batu, wey ke burunsi naa eyew egsimbeen din te heles de; igkalanglangeti seini te Magbebaye ne Manama.”

Ne egtabak ka me kabuhalan ni Israil, “Malehet iya.”

16 “Egdilusen ka etew ne kene egtahud te amey wey iney rin.”

Ne egtabak ka me kabuhalan ni Israil, “Malehet iya.”

17 “Egdilusen ka etew ne eg-ensig te eletanan te tane te duma rin te kabuhalan ni Israil.”

Ne egtabak ka me kabuhalan ni Israil, “Malehet iya.”

18 “Egdilusen ka etew ne egpabaye te butud diye te kene ne dalan.”

Ne egtabak ka me kabuhalan ni Israil, “Malehet iya.”

19  ✡ Iks 22:21; 23:9; Lib 19:33-34; Diy 24:17-18.“Egdilusen ka etew ne eggukum te kene ne eleg diye te me lapu, me ilu, wey te me balu.”

Ne egtabak ka me kabuhalan ni Israil, “Malehet iya.”

20 “Egdilusen ka etew ne eggilabet te sabeka te me asawa dengan te amey rin, su impeyilawan din ma ka amey rin.”

Ne egtabak ka me kabuhalan ni Israil, “Malehet iya.”

21 “Egdilusen ka etew ne eggilabet te minsan nekey ne mananap.”

Ne egtabak ka me kabuhalan ni Israil, “Malehet iya.”

22 “Egdilusen ka etew ne eggilabet te hari rin ne malitan—hari rin ma seini ne malitan te amey rin wey ke te iney rin naa.”

Ne egtabak ka me kabuhalan ni Israil, “Malehet iya.”

23 “Egdilusen ka etew ne eggilabet te anuhang din ne malitan.”

Ne egtabak ka me kabuhalan ni Israil, “Malehet iya.”

24 “Egdilusen ka etew ne eggimatey te duma rin te heles de.”

Ne egtabak ka me kabuhalan ni Israil, “Malehet iya.”

25 “Egdilusen ka etew ne egdawat te bayad eyew egpeyimatayen te ware sale.”

Ne egtabak ka me kabuhalan ni Israil, “Malehet iya.”

26  ✡ Gal 3:10.“Egdilusen ka etew ne kene egtuman te seini langun ne balaud.”

Ne egtabak ka me kabuhalan ni Israil, “Malehet iya.”