1 Te seeye ne timpu, due etew ne kabuhalan ni Libi ne mig-asawa te karumaan din. 2  ✡ Him 7:20; Hib 11:23.Naberes ka malitan wey mig-anak te lukes. Pegkakita rin ne mateles ka bate, inneles din e seini te tatelu ne bulan. 3 Piru te kene din e igpekeeles ka bate, migkuwe e sikandin te bukag ne inggimu puun te tibehew wey impiket din te tamba wey te alkitran. Intahu din dutu ka bate wey impeelat din diye te tibehawen ne diye te ilis te Weyig ne Nilu. 4 Ne ka atebey rin, diye egsesasindeg te bayew madmariyu ka egbantey ke egkamenu ka hari rin.

5 Nataman, migtupang ka anak te Paraun ne Hari te Ihiptu diye te Weyig ne Nilu eyew egpamanihus. Egkalihet degma ne egmangiphipanew ka me suluhuanen din ne me malitan diye te ilis te weyig. Ne dutu, nakita rin ka bukag diye te tibehawen, wey insuhu din ka sabeka ne suluhuanen din ne eg-angayen ka bukag. 6 Te pegpuwas din te bukag, iyan din nakita ka bate ne migsinehew, sikan naa ka neyid‑u sikandin dutu. Ne migkahi sikandin, “Anak seini te Hibruwanen.”

7 Ne migparani e ka atebey te bate wey mig-insaan din e ka anak te Paraun, “Menua, egkeupian ka ne egpamitawan ku sikeykew te malitan ne Hibruwanen eyew egkapangabangan ka nikandin te egpasusu wey eglitan te bate?”

8 Ne migtabak ka anak te Paraun, “Uya, pammitawi a.” Purisu mig-ayun e ka beyi-beyi wey in-umew rin e ka iney rin. 9 Ne migkahiyan te anak te Paraun ka malitan, “Uyana nu seini se bate wey pasusuwa nu sikandin wey litana nu. Egsuulan ku re sikeykew.” Ne in-uyan e te malitan ka bate wey impasusu rin e wey inlitan din. 10  ✡ Him 7:21.Te dakel e ka bate, in-uyan e sikandin te iney rin diye te anak te Paraun. Ne in-anak-anak din ka bate wey migkahi sikandin, “Egngaranan ku sikandin ki Muwisis, su in-angey ku sikandin diye te weyig.”

11  ✡ Him 7:23-28.✡ Hib 11:24.Nataman, migkanakan e si Muwisis. Sabeka ne aldew, inleuy rin ka me karumaan din wey nakita rin ne amana sikandan egkabaybayaran. Ne due nakita rin ne Ihiptuhanen ne miggumi te sabeka ne Hibruwanen ne karumaan din. 12 Migpalangas-langas si Muwisis wey ware etew ne nakakita, seeye naa ka miggimatayan din e ka Ihiptuhanen wey imbunbunan din te pantad. 13 Te seup ne aldew, migleug-leug e man‑e sikandin wey due nakita rin ne daruwa ne Hibruwanen ne migpeehetey. Ne mig-insaan din seeye se nakasale, “Mania te miggumian nu ka duma nu red ne Hibruwanen?”

14 Ne migtabak ka etew, “Hentew bes ka miggimu keykew ne pangulu wey talaggukum ney? Eggimatayan e naa degma nikeykew iling te Ihiptuhanen ne innimatayan nu?” Ne dutu, naaldek e si Muwisis wey nakakahi sikandin, “Nanengnengan bes te me etew ka inggimu ku?” 15  ✡ Him 7:29; Hib 11:27.Te nahuhuran e dutu ka Paraun, eggimatayan din en iya perem si Muwisis, piru migpallahuy si Muwisis diye te Midiyan. Pegginguma rin diye, migpinpinnuu sikandin diye te lenged te belun.

16 Ne due talagpanubad diye te Midiyan ne due anak ne pitu ne malitan. Nangendiye naa ka me malitan te belun eyew egpanakeru, wey innipenu dan ka egpeinuman te me ayam te amey ran. 17 Ne due degma me etew ne nanginguma ne me talagtameng te me ayam wey indeldel ran ka me malitan. Piru migweil-weil si Muwisis, impangabangan din ka me malitan wey impeinum din ka me ayam dan. 18 Te peg-uli e te me malitan diye te amey ran ne si Hitru,* Te Hibruwanen: Riyuil. Alukuy te Manama ka igpasabut te sika ne ngaran. mig-insaan e sikandan te amey ran, “Mania te mahaan kew re nekeuli kuntee?”

19 Ne migtabak sikandan, “Uya su due matig-Ihiptu ne migpangabang kanami te me etew ne miglupig† Te Hibruwanen: migpaawe kanami te belad te me talagtameng. kanami ne me talagtameng te me ayam. Migsakuhan key pad man‑e nikandin te weyig wey impeinum din ka me ayam.”

20 Ne mig-insaan din ka me anak din, “Hendei naan e sikandin? Mania te in-engkeran niyu sikandin? Ipeendini niyu kayi eyew egpakakeen.”

21 Ne impalasud e si Muwisis. Nataman, mig-uyun si Muwisis ne diye eg-ugpe te engki Hitru, wey impaasawaan sikandin ni Hitru te anak din ne si Sipura. 22 Nataman, mig-anak e si Sipura te lukes wey migkahi si Muwisis, “Egngaranan ku ka bate ki Girsum su nakalapu e re te seini ne inged.”

23 Naluhey-luhey ka miglihad, migpatey e ka Paraun. Piru migdeg-uy red ka me kabuhalan ni Israil ne neuripen su egkabaybayaran sikandan, wey migpangananey sikandan ne egbulihan. Ne nekeuma diye te Manama ka pegpangananey ran, 24  ✡ Hin 15:13-14.wey narineg din ka pegdeg-uy ran. Ne nasuman-suman te Manama ka kasabutan din ki Abraham, ki Isaak, wey ki Hakub. 25 Nakita rin ka egkeula-ula te me kabuhalan ni Israil wey neyid‑u sikandin kandan.