Iksudu
Igpewun‑a
Ka lalag ne Iksudu puun te Grigu ne linalahan ne iyan igpasabut ka “peg-awe”. Te seini ne baseen, nasulat ka meyitenged te pegpaawe te Magbebaye te keet-etawan din ne neuripen diye te inged ne egngaranan te Ihiptu. Migpamalehet seini ne ka Magbebaye iyan iya ka malehet ne Manama wey labew te langun, su ware egpakabalabag kandin te igkeupii rin ne eggimuwen.
Seini ne baseen, insulatan te guhuren meyitenged te neula-ula te me kabuhalan ni Israil, wey nabaad seini te tatelu: 1.) ka peg-uripen kandan diye te Ihiptu, wey ka pegpaawe te Magbebaye kandan ne impepanguluwan din ki Muwisis ne in-anak-anak te sabeka ne prinsisa; 2.) ka pegpangabang te Magbebaye kandan te impanlupug e sikandan te me Ihiptuhanen ka egpeendiye te Bubungan ne Sinay, wey imbehayan pad sikandan te egkakeen wey egkeinum diye te bubungan; 3.) ka pegpakita te Magbebaye ki Muwisis diye te Bubungan ne Sinay, wey imbehayan din si Muwisis te Balaud wey miggimu ran te kasabutan; 4.) ne ka katammanan, iyan ka peggimu te balungbalung ne intahuan te Kasabutan wey ka impaney-paney meyitenged te pegsimba.
Ka pantek ne nahuhud iya te seini ne baseen ka meyitenged te neyimu te Manama te timpu ne impaawe din ka neuripen ne keet-etawan din wey impasasindeg din sikandan ne sabeka ne nasud ne due egkapallateng ne meupiya keureme.
Si Muwisis ka amana ne impurtanti ne etew kayi te guhuren wey in-alam sikandin te Manama ne iyan egpangulu te keet-etawan din puun te Ihiptu. Ka amana nataheyi te me etew ne Sapulu ne Balaud, nasulat iya kayi ne egbaseen ne diye egkakita te kapitulu daruwa ne pulu (20).
Ka nenasulat te seini ne baseen
Ka kabuhalan ni Israil ne impaawe diye te Ihiptu 1:1–15:21
a. Ka neuripen diye te Ihiptu 1:1-22
b. Ka pegkeetew wey pegkankanakan ni Muwisis 2:1–4:31
c. Ka pegpakannekal pegpakig-apul ni Muwisis wey ni Aarun te Paraun ne Hari te Ihiptu 5:1–11:10
d. Ka Peglihad te Panalihan wey ka peg-awe te me kabuhalan ni Israil diye te Ihiptu 12:1–15:21
Ka pegligkat diye te Malalab ne Dahat peendiye te Bubungan ne Sinay 15:22–18:27
Ka Balaud wey ka kasabutan te Manama 19:1–24:18
Ka balungbalung ne intahuan te Kasabutan wey ka impaney-paney meyitenged te pegsimba 25:1–40:38
1
Ka peg-uripen te me kabuhalan ni Israil
1 ✡ Hin 46:8-27.Seini ka me ngaran te me anak ne lukes ni Hakub* Te Hibruwanen: Israil. ne migduma kandin diye te Ihiptu wey ka me pamilya ran: 2 Si Rubin, si Simyun, si Libi, si Huda, 3 si Isakar, si Sabulun, si Binhamin, 4 si Dan, si Naptali, si Gad, wey si Asir. 5 Ne si Husi tapey e mule diye te Ihiptu. Pitu ne pulu (70) langun ka me kabuhalan ni Hakub.
6 Nataman, migpatey e si Husi wey ka langun ne me suled din, wey ka langun ne neetew te kandan ne timpu. 7 ✡ Him 7:17.Piru nanganak-anak ka me kabuhalan ni Israil wey amana sikandan nabuhal-buhal. Ne puun su migmasalig e sikandan, migmaresen e sikandan wey nekeempet e te Ihiptu.
8 ✡ Him 7:18.Te naluhey-luhey e, duen e iyam ne mighari te Ihiptu ne ware nekeila ki Husi. 9 Ne migkahiyan din ka keet-etawan din, “Pammineg kew, amane e ne masulug ka me kabuhalan ni Israil wey madmaresen pad sikandan kanta. 10 ✡ Him 7:19.Sikan naa ka egpamuhawang ki eg-ayad-ayad eyew kenad sikandan egmasulug pad. Su kema ke egsaamul sikandan te me kuntere ta ne eglusud kanta, wey egpakaawe e sikandan kayi te inged ta.”† wey ke, sikandan e ka egkamkamuney te tane ta. 11 Purisu migkuwa sikandan te me etew ne egpangulu te me kabuhalan ni Israil eyew egpatrabahuwen te masumpit. Imbaybayran dan sikandan ne egpekeyimu te me siyudad ne egngaranan te Pitum wey Ramisis eyew egtinesan te egkakeen wey kasangkapan te Paraun ne Hari te Ihiptu. 12 Piru minsan impatamtamanan sikandan te egbayad-bayad, nanasnasian de iya sikandan migmasalig wey nasi e nekeempet te Ihiptu. Seeye naa, nabantalan e kandan ka me Ihiptuhanen. 13 Ne impatamtamanan e sikandan baybayari te me Ihiptuhanen iling te me uripen 14 wey imbaybayaran te mabbehat ne me himu. Impeyimu sikandan te me tisa wey impakehal ne me basak, wey impataman-taman sikandan ipabasuk diye te me kamet.
15 Nataman, migkahiyan te Paraun ka me mangnguyamu te me Hibruwanen ne si Sipra wey si Puwa, 16 “Emun ke eg-uyamu kew te me Hibruwanen, himatayi niyu ke lukes ka bate, piru uyaha niyu ke malitan.” 17 Piru egkaaldek te Manama ka me mangnguyamu, wey ware dan tumana ka insuhu kandan te Paraun, wey nasi dan uyaha ka me bate ne lukes. 18 Seeye naa, impeumew e te Paraun ka me mangnguyamu wey mig-insaan din, “Mania te ware niyu tumana ka insuhu ku kaniyu? Mania te ware niyu pangimatayi ka me lukes ne bate?”
19 Ne migtabak ka me mangnguyamu, “Kene nahud ne iling te Ihiptuhanen ne me malitan ka me Hibruwanen ne me malitan. Eglemuwan de sikandan ke eg-anak wey eglesutan e te kene key pad egginguma ka eg-uyamu.” 20 Seeye naa ka mig-upianan te Manama ka me mangnguyamu, wey nanasnasian pad iya migmasalig ka me kabuhalan ni Israil. 21 Ne puun su due pegkaaldek te me mangnguyamu diye te Manama, imbehayan din sikandan te kandan ne pamilya. 22 ✡ Him 7:19.Nataman, insuhu te Paraun ka langun ne keet-etawan din te migkahi, “Iregpak niyu diye te Weyig ne Nilu ka langun ne lukes ne sikan pad ig-anak te me Hibruwanen, piru uyaha niyu ka langun ne malitan.”