1 Ne migkahiyan te Magbebaye ne Manama si Muwisis, “Egkakita nu kuntee ke nekey ka eggimuwen ku diye te Paraun ne Hari te Ihiptu. Egpehesen ku sikandin eyew egpeyipanawen din ka keet-etawan ku. Igpakita ku ka karesen ku, wey egkapehes sikandin te pegdeldel kaniyu ne eg-awe te inged din.”

2  ✡ Hin 17:1; 28:3; 35:11; Iks 3:13-15.Ne migkahiyan te Manama si Muwisis, “Sikeddiey ka Magbebaye ne Manama. 3 Migpakita a ki Abraham, ki Isaak, wey ki Hakub wey neilaan a nikandan ne Manama ne Amana ne Maresen, piru ware ku ipanengneng kandan ka ngaran ku ne Magbebaye ne Manama. 4 Miggimu a degma te kasabutan diye te kandan ne igbehey ku ka tane te Kanaan ne inlapuan dan dengan. 5 Na, narineg ku ka pegdeg-uy te me kabuhalan ni Israil ne in-uripen te me Ihiptuhanen, wey nasuman-suman ku ka kasabutan ku kandan. 6 Purisu, kahii nu sikandan: ‘Sikeddiey ka Magbebaye ne Manama. Egpangabangan ku sikaniyu ka egkabaybayaran, wey igpaawe ku sikaniyu ka in-uripen te me Ihiptuhanen. Eglegparan ku sikandan te masumpit wey igpaawe ku sikaniyu se neuripen. 7 Eggimuwen ku sikaniyu ne keet-etawan ku wey egkeyimu a ne Manama niyu. Ne egkanengnengan niyu ne sikeddiey ka Magbebaye, ka Manama niyu ne migpaawe kaniyu te neuripen te me Ihiptuhanen. 8 Eg-uyanen ku sikaniyu diye te tane ne insaad ku ne igbehey ki Abraham, ki Isaak, wey ki Hakub. Igbehey ku seini kaniyu wey sikaniyud e ka kamuney te seini ne tane. Sikeddiey ka Magbebaye ne Manama.’ ” 9 Ne impangguhud seeye ni Muwisis diye te me kabuhalan ni Israil, piru warad iya sikandan miglinga-linga kandin su warad meupiya ne igbaye te suman-suman* Te Hibruwanen: malepet ne panisingan. dan wey tenged te makabayad-bayad ne peg-uripen kandan.

10 Ne migkahiyan te Magbebaye ne Manama si Muwisis, 11 “Hendiyei nu ka Paraun wey kahii nu te egpepaaween din ka me kabuhalan ni Israil diye te inged din.” 12 Piru migkahiyan ni Muwisis ka Manama, “Ke ware migpammineg keddi ka me etew, iyan naan pa iya ka Paraun? Kene e mem pa egkateu ne eglalag.”† Te Hibruwanen: Ware natulii ka bibig ku. 13 Piru insuhu iya te Manama si Muwisis wey si Aarun ne egpakahiyan ka Paraun ne egpaaween din ka me kabuhalan ni Israil diye te Ihiptu.

14 Seini ka me kabuybuyahan te me pamilya ne nabuhal puun ki Israil: Si Rubin ka kinakakayan ne anak ni Hakub, ne seini ka me anak din ne me lukes: Si Hanuk, Si Pallu, si Hisrun, wey si Karmi. 15 Seini ka me anak ni Simyun ne me lukes: Si Himuwil, si Hamin, si Uhad, si Hakin, si Suhar, wey si Saul ne matig-Kanaan se iney. Sikandan ka nabuhal ne me anak ni Simyun. 16  ✡ Num 3:17-20; 26:57-58; 1Kru 6:16-19.Seini ka me lukes ne me anak ni Libi: Si Girsun, si Kuhat, wey si Mirari. Seini ka itulan te kabuhalan din. Neuyag si Libi te 137 ne leg‑un. 17 Ne si Girsun, due me anak din ne me lukes ne si Libni, wey si Simii, wey nabuhal sikandan. 18 Ne si Kuhat, due me anak din ne me lukes: Si Amram, si Isar, si Hibrun, wey si Usiil. Neuyag si Kuhat te 133 ne leg‑un. 19 Ne si Mirari, due me anak din ne me lukes ne si Mali, wey Musi. Nabuhal sikandan wey ka me kabuhalan dan puun ki Libi.

20 Migweil-weil si Amram, in-asawa rin si Hukabid ne atebey te amey rin wey nakaanak sikandan ki Aarun wey ki Muwisis. Si Amram neuyag te 137 ne leg‑un. 21 Ne si Isar, due me anak din ne me lukes ne si Kura, si Nipig, wey si Sikri. 22 Si Usiil, due me anak din ne me lukes ne si Misil, Ilsapan, wey si Sitri.

23 Migweil-weil si Aarun, in-asawa rin si Ilisiba, ka anak ni Aminadab wey atebey ni Nasun. Nakaanak sikandan ki Nadab, ki Abilu, ki Iliyasar, wey ki Itamar. 24 Si Kura, due me anak ne me lukes ne si Asir, si Ilkana, wey si Abiyasap. Nabuhal sikandan wey ka me kabuhalan dan puun ki Kura. 25 Migweil-weil si Iliyasar ne anak ni Aarun, mig-asawa sikandin te sabeka ne anak ni Putiil wey nakaanak sikandan ki Pinihas.

Sikandan langun ka me kaap-apuan te kabuhalan ne migpuun ki Libi.

26 Sika se Aarun wey Muwisis ne egnangenen kayi, sikan ded ka migkahiyan te Magbebaye ne Manama te miggenendue, “Ipaawe niyu ka me kabuhalan ni Israil diye te Ihiptu wey pegluyura niyu sikandan sumale te kabuhalan dan.” 27 Sikandan seeye se migpakiglalag te Paraun ne egpaaween ka me kabuhalan ni Israil diye te Ihiptu.

28 Te timpu ne migpakiglalag dengan ka Manama ki Muwisis diye te Ihiptu, 29 migkahi sikandin, “Sikeddiey ka Magbebaye ne Manama. Inangen nu te Paraun ka langun ne impangguhud ku keykew.”

30 Piru migkahiyan ni Muwisis ka Manama, “Kena a egkateu ne eglalag,‡ Te Hibruwanen: Ware natulii ka bibig ku. sikan naa ka kene iya egpammineg keddiey ka Paraun.”