1 Nataman, migkahiyan te Manama si Muwisis, “Hendiyei nu ka Paraun ne Hari te Ihiptu wey kahii nu sikandin te seini ka ingkahi te Magbebaye ne Manama, ‘Peyipanawa nu ka me keet-etawan ku eyew egpakasimba keddiey. 2 Emun ke kene nu sikandan egpeyipanawen, egpasalerepan ku te me bakbak ka intiru ne inged nu. 3 Egkapenu te me bakbak ka Weyig ne Nilu wey eggakap e seini wey egseled e diye te baley nu, wey eggendiyad te sinabeng nu, wey diye te hibatanan nu. Egseled man‑e ka me bakbak diye te me baley te me upisyal nu wey te keet-etawan nu, wey minsan diye te me abuwan wey te egmasaan te harina. 4 Egpakupawan ka te me bakbak wey ka keet-etawan nu wey ka langun ne upisyal nu.’ ”

5 Migkahiyan pad man‑e te Magbebaye ne Manama si Muwisis, “Nangeni nu si Aarun te igpakayew ka tuked din ne igpalenged diye te me weyig, wey te me kanal, wey me subung eyew egmanlepew ka me bakbak te inged te Ihiptu.” 6 Purisu ingkayew ni Aarun ka belad din ne impalenged din diye te me weyig, wey nanlepew ka me bakbak wey nekeempet de iya te inged te Ihiptu. 7 Piru in-ilingan degma seeye te egmahehane tenged te me pamulingan dan, wey nanlepew degma ka me bakbak te inged te Ihiptu.

8 Nataman, impeumew te Paraun si Muwisis wey si Aarun wey migkahiyan, “Ampu kew te Magbebaye ne Manama ne eg-aween din ka me bakbak kayi te keddiey wey te me keet-etawan ku, ne egpeyipanawen kud ka me keet-etawan niyu eyew egpakapanubad te Manama.”

9 Ne migkahiyan ni Muwisis ka Paraun, “Kahii e re ke ken‑u ku ig-ampu sikeykew wey ka me upisyal nu, wey ka me keet-etawan nu eyew egkaawe ka me bakbak kayi te kaniyu wey te me baley niyu. Ne eyew iyan naan de egkasame ka me bakbak ne diye te Weyig ne Nilu.”

10 Ne migtabak ka Paraun, “Kaaselem.”

Ne migkahi si Muwisis, “Egkatuman ka ingkahi nu eyew egkanengnengan nu ne ware egpekeiling te Magbebaye ne Manama ney. 11 Eg-awe ka me bakbak kayi te keykew wey te me upisyal nu, wey te me keet-etawan nu, wey iyan naan de egkasame ka diye te Weyig ne Nilu.” 12 Ne mig-awe e si Muwisis wey si Aarun diye te Paraun, wey mig-ampu e si Muwisis te Manama ne eg-aween ka me bakbak ne impeuyan din diye te Ihiptu. 13 Inggimu te Magbebaye ne Manama ka inhangyu ni Muwisis. Nammatey ka me bakbak ne diye te me baley, wey diye te me lama, wey ka diye te me kamet. 14 Ne inlimud te me Ihiptuhanen ka me bakbak wey mig-um-umambu re iya, wey migngareg ka intiru ne inged te Ihiptu. 15 Piru te nakita te Paraun ne egmeupiye e ka keugpe dan, migmakehal e man‑e ka ulu* Te Hibruwanen: pusung. rin wey ware migpammineg kandan, iling te ingkahi te Magbebaye ne Manama.

16 Ne migkahiyan te Magbebaye ne Manama si Muwisis, “Kahii nu si Aarun te igpakayew ka tuked din wey egpalampesan ka tane eyew egbaluy ne me ketiketi ka me alinepung te intiru ne inged te Ihiptu.” 17 Ne inggimu ran iya seeye. Ingkayew ni Aarun ka tuked din wey inlampesan din ka tane wey migbaluy ne me ketiketi ka me alinepung te intiru ne inged te Ihiptu, wey miggulunan e ka me etew wey ka me ayam. 18 Mig-eleg-eleg ne eggimu te me ketiketi ka egmahehane ne due pamulingan, piru ware sikandan nekeiling. Ne miggulunan e te me ketiketi ka me etew wey ka me ayam. 19  ✡ Luk 11:20.Ne migkahiyan te egmahehane ka Paraun, “Himu† Te Hibruwanen: kemel. seini te Manama!” Piru migmakehal ka ulu te Paraun wey ware sikandin migpammineg kandan, iling te ingkahi te Magbebaye ne Manama.

20 Ne migkahiyan te Magbebaye ne Manama si Muwisis, “Selem-selem ka enew wey lambaha nu ka Paraun ne eggendiye te weyig. Kahii nu sikandin, ‘Seini ka ingkahi te Magbebaye ne Manama. Peyipanawa nu ka keet-etawan ku eyew egpakasimba keddiey. 21 Ke kene nu egpeyipanawen sikandan, egpeuyanan ku sikeykew te masulug ne me langew, wey ka me upisyal nu, wey ka keet-etawan nu degma. Egkapenu te langew ka me baley niyu wey egpekeempet man‑e te tane. 22 Piru kene ku iglagkes ka tane te Gusin ne in-ugpaan te me keet-etawan ku, wey ware langew ne egpekeendiye, eyew egkanengnengan nu ne sikeddiey iya ka Magbebaye ne Manama, wey kayi a te seini ne inged. 23 Igpapitew ku ne kene egpekeg-iling ka keet-etawan ku wey te keet-etawan nu. Ne eggimuwen ku seini ne kein-inuwan kaaselem.’ ” 24 Ne inggimu iya seeye te Manama. Miglepew ka susuluhi ne me langew diye te baley te Paraun wey diye te me baley te me upisyal din. Neempet te me langew ka intiru ne inged te Ihiptu wey migmareet e tenged te me langew.

25 Nataman, impeumew e te Paraun si Muwisis wey si Aarun wey migkahiyan, “Hendiye kew e, panubad kew e te Manama niyu, piru kayi re te Ihiptu.”

26 Piru migkahi si Muwisis, “Kene egkaayun ne kayi key egpanubad te Ihiptu su amana igkeepes te me mahinged kayi ka igpanubad ney diye te Magbebaye ne Manama ney. Ne emun ke igpanubad ney ka amana igkeepes te keet-etawan nu, egbatuwen key iya nikandan. 27 Keilangan ne eggipanew key te tatelu ne aldew peendiye te katalunan eyew egpakapanubad key te Magbebaye ne Manama ney, su iling due ka insuhu din kanami.”

28 Seeye naa, migkahi ka Paraun, “Egtuhutan ku sikaniyu ne eggendiye te katalunan eyew egpakapanubad kew te Magbebaye ne Manama niyu, piru kene kew re amana pariyu. Ne iampu ad e nikeykew.”

29 Ne migkahi si Muwisis, “Na, eg-awa a kuntee kayi wey eg-ampu ad te Manama ne eg-aween din kaaselem ka me langew kayi te keykew, wey te me upisyal nu, wey te me keet-etawan nu. Piru kene key re man‑e nikeykew akali, su kema ke kene key e man‑e egpeyipanawen nikeykew ka egpanubad te Magbebaye ne Manama.”

30 Nataman, mig-engkeran e ni Muwisis ka Paraun, wey mig-ampu e te Manama. 31 Ne inggimu te Manama ka inhangyu ni Muwisis, wey in-awe din e ka masulug ne me langew diye te langun ne mahinged te Ihiptu wey warad iya nasame minsan sabeka. 32 Piru migmakehal red man‑e ka ulu‡ Te Hibruwanen: pusung. te Paraun te seeye ne timpu wey ware din peyipanawa ka me etew.