1 Nataman, migkahiyan te Manama si Muwisis, “Hendiyei nu ka Paraun ne Hari te Ihiptu wey kahii nu sikandin te seini ka ingkahi te Magbebaye ne Manama te me Hibruwanen: ‘Peyipanawa nu ka me keet-etawan ku eyew egpakasimba sikandan keddiey. 2 Ne emun ke eg-apul ka wey egbalabahan nu red man‑e sikandan, 3 egpareraluwen ku te mangune-kune ka me ayam nu diye te kamet: Ka me kudde, me asnu, me kamil, me baka, me karniru, wey me kambing. 4 Piru igpasangi ku mule ne kene egderalu ka me ayam te kabuhalan ni Israil puun te me ayam niyu, eyew ware egpatey ne ayam dan.’ ” 5 Ne migkekerew ka Magbebaye ne Manama ne migkahi, “Eggimuwen ku seini kaaselem.”

6 Te napawe e, inggimu en iya te Magbebaye ne Manama ka ingkahi rin. Nammatey te dalu ka langun ne ayam te me matig-Ihiptu, piru warad iya migpatey minsan sabeka ne ayam te me kabuhalan ni Israil. 7 Ne impanengnengan seeye te Paraun te me etew rin, wey nanengnengan dan ne ware iya migpatey minsan sabeka ne ayam te me kabuhalan ni Israil. Piru minsan iling dutu, migmakehal ded man‑e ka ulu* Te Hibruwanen: pusung. te Paraun wey ware din peyipanawa ka me etew.

8 Nataman, migkahiyan te Magbebaye ne Manama si Muwisis wey si Aarun, “Kuwa kew te tigsenge-hamak ne abu diye te insugnuwan, wey isabulak nu naa Muwisis diye te aw-awangan taheed te egtengteng ka Paraun. 9 Egpekeempet seini te intiru ne inged te Ihiptu iling te alinepung, wey egpamuuwen ka me etew wey ka me ayam tenged due.” 10  ✡ Imp 16:2.Purisu, miggamak sikandan te abu diye te insugnuwan wey migsasindeg sikandan diye te tangkaan te Paraun. Ne insabulak ni Muwisis ka abu diye te aw-awangan, wey impanubuan te me buu ka me etew wey ka me ayam. 11 Ware nakatemu ka egmahehane engki Muwisis, su impanubuan sikandan te me buu wey ka langun ne me Ihiptuhanen. 12 Piru impakehal te Magbebaye ne Manama ka ulu† Te Hibruwanen: pusung. te Paraun wey ware migpammineg kandan, iling te ingkahi te Manama ki Muwisis.

13 Nataman migkahiyan te Manama si Muwisis, “Selem-selem ka enew kaaselem wey hendiyei nu ka Paraun wey kahii nu te seini ka ingkahi te Magbebaye ne Manama te me Hibruwanen: ‘Peyipanawa nu ka me keet-etawan ku eyew egpakasimba keddiey. 14 Ne emun ke eg-apul ka, egpasalerepen ku sikeykew te mangune-kune wey ka me upisyal nu, wey ka keet-etawan nu, eyew egkanengnengan nu ne ware egpekeiling keddi te intiru ne kalibutan. 15 Su emun ke migweil-weil e pa wey impasalerep kud sikaniyu te masumpit ne dalu,‡ Te Hibruwanen: ingkayew ku ka belad ku wey inlampesan ku sikaniyu te dalu. nahule kew en iya perem kuntee kayi te kalibutan. 16  ✡ Rum 9:17.Piru insumpulan ku pad ka umul niyu eyew egkakita niyu ka geem ku, wey eyew egkabantug ka ngaran ku te intiru ne kalibutan. 17 Piru nasi ke red man‑e migpegpeggasal diye te me keet-etawan ku wey ware nu sikandan peyipanawa. 18 Sikan naa, kaaselem te iling kayi ne uras, egpeuranan ku sikaniyu te apiyew. Ware de due apiyew ne neyitabu kayi te Ihiptu ne iling due kasumpit puun te neyimu seini ne inged. 19 Purisu kuntee, ipeelung nu ka langun ne ayam nu wey ka langun ne uripen nu ne diye te me kamet, su egpatey ka langun ne egtubian te apiyew.’ ” 20 Nenaaldek ka duma ne me upisyal te Paraun te ingkahi te Magbebaye ne Manama, sikan naa ka impaseled dan e diye te baley ka me uripen dan wey ka me ayam dan. 21 Piru ware miglinga-linga ka duma te ingkahi te Manama, wey imbalahad dan de ka me uripen dan wey ka me ayam dan diye te me kamet.

22 Ne migkahiyan te Magbebaye ne Manama si Muwisis, “Kayawa nu ka belad nu diye te aw-awangan wey eg-uranan te apiyew ka me etew, ka me ayam, wey ka me pinamula te intiru ne inged te Ihiptu.” 23 Purisu ingkayew ni Muwisis ka tuked din diye te aw-awangan, wey imparagsang e te Manama ka luhung, wey impeuranan din e te apiyew ka Ihiptu, wey impakikilat din pad man‑e. Impeuranan te Manama ka Ihiptu te derakel ne apiyew 24  ✡ Imp 8:7; 16:21.ne egkarumaan te kilat ne kene egkataman. Ware de due apiyew ne neyitabu diye te Ihiptu ne iling dutu kasumpit puun te neyimu seeye ne inged. 25 Nahule te apiyew ka langun ne me etew, wey me ayam ne ware nekeelung, lagkes ka me pinamula. 26 Iyan de ware urani te apiyew ka inged ne Gusin ne in-ugpaan te me kabuhalan ni Israil.

27 Ne dutu, impeumew te Paraun si Muwisis wey si Aarun wey migkahiyan, “Sikeddi ka nakasale kuntee. Eleg ka Magbebaye ne Manama wey seyyup key te keet-etawan ku. 28 Ampu kew te Manama ne egpeen-enengen e seini se luhung wey apiyew. Egpeyipanawen kud e sikaniyu, wey kene kew en iya egkatalehen pad ka eggipanew.”

29 Migkahiyan sikandin ni Muwisis, “Eg-awa a kayi te siyudad, wey egkayawen ku ka belad ku diye te Manama te peg-ampu ku. Ne eg-engked e ka luhung wey ka apiyew, eyew egkanengnengan nu ne ka kalibutan kandin te Manama. 30 Piru nakanengneng a ne sikeykew wey ka me upisyal nu, kene kew red iya man‑e egkaaldek te Magbebaye ne Manama.”

31 (Naddeetan ka me pinamula ne eggimuwen ne hinabel wey naddeetan degma ka sibada, su te seeye ne timpu, neyinuhan e ka sibada wey migbubulak e ka pinamula ne eggimuwen ne hinabel. 32 Piru ware nareeti ka trigu su egkamewuriyan seini egkeyinuhi.)

33 Ne mig-awe si Muwisis diye te Paraun wey miglihawang sikandin te siyudad. Ne mig-ampu sikandin wey ingkayew rin ka belad din diye te Magbebaye ne Manama. Ne dutu, migpeeneng-eneng e ka luhung wey ka apiyew, wey migkerit e degma ka uran. 34 Te nakita te Paraun ne migkerit e ka uran wey migpeeneng-eneng e ka apiyew wey ka luhung, miggimu e man‑e sikandin te sale. Impakehal din e man‑e ka ulu§ Te Hibruwanen: pusung. rin wey iling ded degma ka me upisyal din. 35 Migmakehal ka ulu rin wey ware din e peyipanawa ka me kabuhalan ni Israil, iling te ingkahi te Magbebaye ne Manama ki Muwisis.