1 “Ne kuwa ka te kayu ne akasya wey himu ka te altar. Keilangan ne sapulu ne dangew ka kalayat wey sapulu degma ne dangew ka kaluag eyew egkakuwaddradu ka altar, wey hen‑em ne dangew ka katikang. 2 Himuwi nu te sungey-sungey ka tagse pikungan, wey tapey nud e itangen diye te altar human nu buliti langun te burunsi eyew egpekegsumpul re. 3 Ne himu ka man‑e te me tayaanan te abu, me pala ne dereisek, me yahung, me tinidur ne derakel, wey tahuanan te baha. Keilangan ne burunsi ka langun ne eggimuwen ne kasangkapan diye te altar. 4 Ne himu ka degma te mahalat ne tuuhanan ne burunsi, wey himu ka man‑e te derakel ne sising ne burunsi ne igtalinga diye te hep‑at ne pikungan te altar. 5 Itangen nu naa ka tuuhanan diye te seled te altar, wey ipalenged nu te liwaraan te altar. 6 Ne himu ka man‑e te me dullug ne akasya ne igyayung te altar wey buliti nu te burunsi. 7 Iluglug nu ka me dullug diye te me derakel ne me sising diye te hep‑at ne pikungan eyew egpekeglimang ke egyayungan ka altar. 8 Mahalata nu ka altar ne eg-alabatan te tabla, iling te impapitew ku keykew diye te bubungan.”

9 “Teili nu te lama ka matulus ne balungbalung, wey ipalingut nu naa. Ne alara nu ka diye dapit te igkakawanan te balungbalung, wey alabati nu ka alad te mahal ne hinabel ne me hep‑at ne pulu wey lalimma (45) ne mitrus ka kalayat. 10 Himu ka te daruwa ne pulu (20) ne sungkaleg ne burunsi ne ig-alad wey dutun nu isanggat ka me hinabel. Tahui nu te me sanggatanan wey me sanggat ne pelata ka me sungkaleg, wey due man‑e daruwa ne pulu (20) ne pabunsuran ne burunsi red. 11 Iling ded degma ka diye te igkahibang ne balabahan te balungbalung, tukehi nu te daruwa ne pulu (20) ne burunsi ne sungkaleg ne impabunsud diye te daruwa ne pulu (20) ne pabunsuran ne burunsi. Egtahuan ded degma te pelata ne me sanggatanan ka me sungkaleg wey te igsanggat te hinabel. Ne alabati nu naa seeye te mahal ne hinabel ne me hep‑at ne pulu wey lalimma (45) ne mitrus ka kalayat. 12 Alara nu degma ka diye te liyu* Te Hibruwanen: iglineb. te balungbalung te sapulu ne burunsi ne sungkaleg ne impabunsud diye te sapulu (10) ne pabunsuran ne burunsi red. Tahui nu te me pelata ne me sanggatanan ka me sungkaleg wey te igsanggat te hinabel. Ne alabati nu naa seeye te mahal ne hinabel ne me daruwa ne pulu wey daruwa (22) ne mitrus ka kalayat. 13 Ne me daruwa ne pulu wey daruwa (22) ne mitrus degma ka kaluag te lama diye te egpakarapit te igsile. 14 Keilangan ne diye dapit te igsile ka gumawan te alad. Ne ka diye te igkakawanan te gumawan, alara nu te tatelu ne sungkaleg ne impabunsud diye te tatelu degma ne pabunsuran. Ne alabati nu naa seeye te mahal ne hinabel ne me pitu ne mitrus se kalayat. 15 Ne alara nu degma ka igkahibang te gumawan te alad ne tatelu ne sungkaleg ne impabunsud diye te tatelu ne pabunsuran, wey alabati nu te mahal ne hinabel ne me pitu ne mitrus se kalayat. 16 Ne ka gumawan te alad te lama, keilangan ne egdingdingan te hinabel ne me siyam ne mitrus ka kalayat. Pegseleta nu ka igdingding te gumawan te hinabel ne meilem, malalab, malugtem, wey te mahal ne hinabel, wey egdayan-dayanan seini te egteyi. Itangen nu seini diye te hep‑at ne sungkaleg ne impabunsud diye te hep‑at ne pabunsuran. 17 Ka langun ne sungkaleg ne nakalingkus dutu, keilangan ne egtahuan te me pelata ne sanggatanan wey igsanggat te me hinabel, wey keilangan ne burunsi ka pabunsuran te me sungkaleg. 18 Ka nakalingut ne alad te lama te balungbalung, keilangan ne eg-alabatan te mahal ne me hinabel ne hep‑at ne pulu wey lalimma (45) ne mitrus ka kalayat, wey me daruwa ne pulu wey daruwa (22) ne mitrus ka kaluag, wey senge-depa wey daruwa ne dangew ka katikang. Diye naa igsanggat ka hinabel te me sungkaleg ne burunsi se pabunsuran. 19 Keilangan ne neelin ne burunsi ka langun ne kasangkapan ne inggamit diye te matulus ne balungbalung ne in-alad, lagkes ka igpakpak te tane ne eggiketan te lubid te balungbalung wey te me hinabel ne ig-alabat te alad.”

20 “Peuyana nu ka me Israilita diye te keykew te mating‑ew ne lana te ulibu ne igtubil te sulu diye te balungbalung eyew kene egkeeb-ebukan. 21 Diye nu itahu ka me sulu te tangkaan te hinabel ne indingding te Tahuanan te Kasabutan. Si Aarun de wey ka me kabuhalan din ka egmareket te sulu diye te tangkaan te Magbebaye ne Manama te maaldew wey marusilem. Keilangan ne egtumanen te me Israilita wey te langun ne egpakasinundul pad ne me kabuhalan dan ka sika ne suhu.”