1 “Himu ka te matulus ne balungbalung ne eg-alaren, ligkat te sapulu ne mahal ne hinabel ne egbateken te hinabel ne meilem, malalab, wey malugtem. Pateyii nu naa ka me hinabel te kirubin ne naay-ayaran te eggimu. 2 Keilangan ne egpekeg-iling ka seked te langun ne me hinabel; sapulu wey daruwa (12) ne mitrus ka kalayat, wey daruwa ne mitrus ka kaluag. 3 Pegtembila nu te egteyi ka lalimma ne hinabel wey ka lein ne lalimma degma ne hinabel. 4 Kuwa ke naa te meilem ne hinabel wey italinga nu te sidsid te tagse pulipusan te impegtembil ne me hinabel. 5 Lalimma ne pulu (50) ne hinabel ka italinga nu diye te hun‑a ne tapid te me hinabel ne immegtembil, wey lalimma ne pulu (50) degma ka senge-tapid ne me hinabel. Ne pegtangkaa nu naa ka daruwa ne tapid. 6 Himu ka man‑e te lalimma ne pulu (50) ne bulawan ne sanggatanan, wey isanggat nu ka immegtembil ne me hinabel eyew egpekegtupu ka daruwa ne tapid ne me hinabel. Sikan naa ka egkeyimu e ne balungbalung ka langun ne hinabel.* Te Hibruwanen: eyew egkasabeke e ka balungbalung.

7 “Ne himu ka man‑e te sapulu wey sabeka (11) ne hinabel puun te bulbul te kambing eyew ig-atep† Daruwa ne lapis ka atep te balungbalung: ka bulbul te kambing iyan igpaampew wey ka hinabel iyan igpariralem. te matulus ne balungbalung. 8 Keilangan ne egpekeg-iling ka seked te sapulu wey sabeka (11) ne hinabel; elin sapulu wey tatelu (13) ne mitrus ka kalayat, wey daruwa ne mitrus ka kaluag. 9 Pegtembila nu te egteyi ka lalimma ne hinabel eyew egsenge-tapid, wey pegtembila nu degma ka hen‑em ne hinabel. Ne lupia nu naa te kasabeka ka nekegtembil ne hen‑em ne hinabel diye te tangkaan te balungbalung. 10 Ne talingei nu te lalimma ne pulu (50) ne hinabel ka pulipusan te hun‑a ne tapid, wey lalimma ne pulu (50) degma ka senge-tapid. 11 Himu ka te lalimma ne pulu (50) ne sanggatanan ne burunsi wey ipananggat nu naa diye te intalinga ne me hinabel, wey pegsumpula nu ka me hinabel eyew egpekegsumpul ka daruwa ne tapid. 12 Ka egtimpa ne hinabel, igpabitin-bitin de iya diye te peka te balungbalung, minsan ka senge-liware te hinabel ne inseb-ung te balungbalung. 13 Ne ka egtimpa degma ne daruwa ne dangew te hinabel diye te tagse kakiliran te balungbalung, igpabitin-bitin de iya eyew igdingding te balungbalung.

14 “Ne himu ka te daruwa pad man‑e ne ig-atep te balungbalung; ka sabeka, sika se laplap te lukesan ne karniru ne intinaan te malalab, ne ka dangeb ne iglapis dutu, sika se laplap te kambing.

15 “Himu ka te tukeg‡ tukeg seini te balungbalung ne in-iling te egtangenan te lekeb ne pididus. te balungbalung ne akasya ne igpasasindeg. 16 Ka tagse tukeg, keilangan ne daruwa wey liware ne depa ka kalayat wey tatelu ne dangew ka kaluag. 17 Ne ka tagse tukeg, tangeni nu te tigdaruwa ne paa-paa su eyew egpekegsumpul te duma ne tukeg. Ka langun ne tukeg, egtangenan iya te daruwa ne paa-paa. 18 Ne tukehi nu te daruwa ne pulu (20) ne tukeg ka dapit te igkakawanan ne balabahan te balungbalung. 19 Ne himu ke naa te hep‑at ne pulu (40) ne pelata ne pabunsuran ne due lungag eyew egtiyukan te daruwa ne pulu (20) ne me tukeg; tigdaruwa ne pabunsuran ka tagse tukeg. 20 Ne tukehi nu degma te daruwa ne pulu (20) ne me tukeg ne igpasasindeg ka limang te balungbalung, ka diye dapit te igkahibang ne balabahan te balungbalung. 21 Ne ka me tukeg, tahui nu red degma te hep‑at ne pulu (40) ne pelata ne pabunsuran; tigdaruwa ka pabunsuran ne egtiyukan te tagse tukeg. 22 Ne tukehi nu degma te hen‑em ne tukeg ne igpasasindeg ka diye te peka te balungbalung, ka diye egpakarapit te iglineb, 23 wey tahui nu te daruwa ne tukeg ka me pikungan te balungbalung. 24 Keilangan ne egpekegdangdang ka me tukeg wey egpegketen te derakel ne me sising ka diye te ampew. Ne ka duma ne me tukeg ne diye te me pikungan te balungbalung, egpegdangdangen wey egpegketen ded degma. 25 Ne walu langun ne tukeg ka igtahu diye te peka te balungbalung, wey sapulu wey hen‑em (16) degma ka pabunsuran ne pelata, su tigdaruwa ka pabunsuran te tagse tukeg.

26 “Ne himu ka te dullug ne akasya eyew igbalabag te balungbalung. Keilangan ne lalimma ne dullug ka igbalabag diye te sabeka ne tukeg te balungbalung, 27 wey lalimma degma ka igbalabag diye te limang ne tukeg, wey lalimma red degma ka diye te peka ne egpakarapit te iglineb. 28 Ka dullug ne igpeelat igbalabag te tagse tukeg, keilangan ne igpeuma diye te tupuan te pikungan te balungbalung. 29 Buliti nu te bulawan ka me tukeg wey talingei nu te derakel ne me sising ne bulawan ne iyan eglugluhan te me dullug ne igbalabag. Ne egbulitan ded degma te bulawan ka me dullug ne igbalabag. 30 Na, ipasasindeg nu naa ka balungbalung ne egpekeiling iya te impapitew ku keykew ne egpeilingan kayi te bubungan.

31 “Himu ka man‑e te meupiya ne hinabel ne egbateken te meilem, malalab, malugtem, wey te mahal ne hinabel. Pateyii nu seini te kirubin te mangngateu ne egteyi wey paay-ayari nu te egpeyimu. 32 Himuwi nu ka hinabel te bulawan ne me sanggat wey itangen nu seini diye te hep‑at ne sungkaleg ne akasya ne imbulitan te bulawan, wey igpabunsud diye te hep‑at ne pabunsuran ne pelata. 33  ✡ Hib 6:19; 9:3-5.Keilangan ne diye nu ibitin ka hinabel te sanggatanan te me sungkaleg. Ne uyana nu ka Tahuanan te Kasabutan wey diye nu itahu te limang te Matulus ne Sinabeng ne in-eletan te hinabel. Ka hinabel ka eletanan te Matulus ne Sinabeng wey te Amana ne Matulus ne Sinabeng.§ Te Hibruwanen: Matulus ne Inged puun te Amana ne Matulus ne Inged. 34 Ne ipeuntud nu ka supe* Te Hibruwanen: pinnuuwan te himenew. diye te Tahuanan te Kasabutan ne diye te Amana ne Matulus ne Sinabeng. 35 Itahu nu ka lamisa diye te Matulus ne Sinabeng, wey ipalenged nu diye te igkahibang ne balabahan te sinabeng, wey itahu nu naa diye te egkatangkaan te lamisa ka tahuanan te sulu, diye te igkakawanan ne balabahan te sinabeng.

36 “Himu ka te hinabel ne igdingding te gumawan te balungbalung. Parayan-dayani nu seini te egpateyi te meilem, malalab, malugtem, wey te mahal ne hinabel. 37 Ne isanggat nu seini diye te me sanggatanan ne bulawan diye te lalimma ne sungkaleg ne akasya ne imbulitan te bulawan. Ne ipabunsud nu naa ka me sungkaleg diye te lalimma ne pabunsuran ne burunsi.”