1 “Kuwa ka te kayu ne akasya wey himu ka te altar eyew egtutungan te insinsu. 2 Keilangan ne daruwa ne dangew ka kalayat wey daruwa ne dangew degma ka kaluag eyew egkakuwaddradu ka altar, wey hep‑at ne dangew ka katikang. Ne himuwi nu man‑e seini te hep‑at ne sungey-sungey wey iuney nu red itangen diye te altar. 3 Empeta nu naa seini langun buliti te bulawan—ka ampew, ka kakiliran, ka me sungey-sungey, wey linguta nu te egdayan-dayan te bulawan ka altar. 4 Himu ka te daruwa ne derakel ne sising ne bulawan wey italinga nu diye te diralem te indayan-dayan ne bulawan eyew due eglugluhan te me dullug ke eg-uyanen e ka altar. 5 Daruwa ne dullug ne akasya himuwa nu ne igyayung wey buliti nu te bulawan. 6 Itahu nu seini se altar diye te egkatangkaan te hinabel ne in-elet te Tahuanan te Kasabutan ne inggimuwan te supe ne egtemtemuwan ku keykew.

7 “Keilangan ne egtutung si Aarun te meemut ne insinsu diye te altar te tagse maselem te timpu ne eg-ay-ayaran din ka me sulu. 8 Ne emun ke eg-andamen din e man‑e ka me sulu te egkasagkup, keilangan ne egtutung man‑e sikandin te insinsu diye te tangkaan te Magbebaye ne Manama. Ne ipabulus niyu naa seini peendiye te me kabuhalan niyu keureme. 9 Kene kew tutung te kene ne eleg ne insinsu, wey kene niyu seini tutungi te minsan nekey ne igpanubad niyu ne me ayam wey ke harina naa. Ne kene kew man‑e itis dutu te inumen ne igpanubad niyu. 10 Keilangan ne egpalangesaan ni Aarun ka me sungey te altar tagse leg‑un puun te impanubad din ne me ayam eyew te peglinis te sale te me etew. Keilangan ne eggimuwen niyu seini layun te tagse leg‑un minsan ka me kabuhalan niyu keureme, su sika ka subla ne matulus ne altar te Magbebaye ne Manama.”

11 Ne migkahiyan te Magbebaye ne Manama si Muwisis, 12 “Emun ke egsinsusen nud ka me kabuhalan ni Israil, keilangan ne pabehaya nu sikandan langun diye te Magbebaye ne Manama te bayad ne iglekat te umul ran te pegparihistru ran, eyew kene sikandan egkakita te mareet ke egkarihistru e sikandan. 13  ✡ Iks 38:25-26; Mat 17:24.Iyan nu ipabehey te seeye se egkaseel e ka senge-tipak* Te Hibruwanen: liware te sikil. Me hen‑em buwa ne gramu seini. te pelata eyew igdasag dan te Magbebaye ne Manama. Egtimbangen seini diye te timbangan te me talagpanubad.† Te Hibruwanen: sikil te balungbalung. 14 Seeye se egkarihistru e ne migdaruwa ne pulu (20) e wey subla ka idad, pabehaya nu sikandan langun te igdasag dan te Manama. 15 Ka meyaman, keilangan ne kene egbehey te subla, wey ka egkaayu-ayu, keilangan ne kene ne deisek amana ka igbehey rin. Egpeg-ilingey re iya sikandan ne senge-tipak de te pelata ka igbehey ran diye te Manama eyew te peglekat te umul ran. 16 Dawata nu ka pelata puun te me kabuhalan ni Israil, wey gamita nu te minsan nekey ne eggimuwen diye te balungbalung.‡ Te Hibruwanen: balungbalung ne temuwanan. Puun due, egkasuman-suman ka me etew diye te tangkaan te Manama, ne eyew egkalekat dan§ Te Hibruwanen: niyu. ka umul ran.”

17 Ne migkahiyan te Magbebaye ne Manama si Muwisis, 18  ✡ Iks 38:8.“Himu ka te pelenggana wey te egpapinnuuwan ne burunsi eyew egtahuan te weyig ne iglu‑lu. Ne diye nu naa seini itahu te elat-elat te balungbalung* Te Hibruwanen: balungbalung ne temuwanan. wey te altar ne tutunganan te igpanubad. 19 Dutu egpanlu‑lu si Aarun wey ka me anak din te me belad dan wey te me paa ran. 20 Keilangan ne egpanlu‑lu pad sikandan human egseled diye te balungbalung wey ke egparani naa te altar eyew egtrabahu wey egtutung te igpanubad te Magbebaye ne Manama. Ke kene sikandan egpanlu‑lu, egpatey sikandan. 21 Sikan naa, keilangan ne eglu‑luan dan iya ka me belad dan wey ka me paa ran eyew kene sikandan egpatey. Keilangan ne eggimuwen seini ne tulumanen enni Aarun te me kabuhalan din te ware egtamanan.”

22  ✡ Iks 37:29.Ne migkahiyan te Magbebaye ne Manama si Muwisis, 23 “Kuwa ka te subla ne meupiya ne me leggu: Hen‑em ne kilu te meemut ne mira, tatelu ne kilu te meemut ne sinamun, wey tatelu ne kilu ne sukal,† Te Hibruwanen: 500 te mira ne egtulayas, 250 te meemut ne sinamun, 250 te meemut ne tire. 24 wey hen‑em ne kilu ne kasiya, wey hep‑at ne kilu ne lana te ulibu. Egtimbangen seini diye te timbangan te me talagpanubad.‡ Te Hibruwanen: sikil te balungbalung. 25 Ne megsewuha nu seini langun eyew egpekeyimu ka te matulus ne lana ne igbaluhu, wey ay-ayari nu te eggimu iling te talaggimu te peemut. 26 Baluhuwi nu naa te lana ka balungbalung, ka Tahuanan te Kasabutan, 27 ka lamisa wey ka langun ne kasangkapan te lamisa, ka tahuanan te sulu wey ka langun ne kasangkapan te sulu, wey ka altar ne egtutungan te insinsu. 28 Ilagkes nu degma te egbaluhu ka altar ne tutunganan te igpanubad, wey ka langun ne kasangkapan te altar, wey ka pelenggana wey egpapinnuuwan. 29 Ihalad nu sika langun eyew egkeyimu ne amana ne matulus. Ne ka minsan nekey ne egparagket dutu, egmatulus e degma.

30 “Ne baluhuwi nu degma si Aarun wey ka me anak din wey ihalad nu sikandan eyew egkeyimu sikandan ne me talagpanubad keddi. 31 Ne nangeni nu ka me kabuhalan ni Israil, ‘Seini ka matulus ne lana ne igteil niyu te Manama minsan te me kabuhalan niyu keureme. 32 Kene niyu seini ibaluhu te minsan hentew re due, wey kene niyu ilingi te eggimu su matulus seini ne lana wey ilaa niyu ne matulus. 33 Ka minsan hentew ne eg-iling kayi, wey egbaluhu te lerew re due ne etew, kenad e eg-ileen ne sakup pad te keet-etawan ku.’ ”§ Te Hibruwanen: egtamperen e puun te keet-etawan din.

34 Ne migkahiyan te Mabebaye ne Manama si Muwisis, “Kuwa ka te meemut ne me leggu ne istakti, unika, galbanu, wey meemut ne insinsu. Peg-ilinga nu ka kasulug te me leggu wey pegsewuha nu langun. 35 Himuwa nu naa seeye ne insinsu wey ay-ayari nu te eggimu iling te talaggimu te peemut. Sewuhi nu seini te asin eyew meupiya wey matulus. 36 Lupeta nu ka duma wey ibukbuk nu diye te tangkaan te Tahuanan te Kasabutan ne diye te balungbalung ne temuwanan ku keykew. Keilangan ne eg-isipen niyu langun ne matulus seini ne insinsu. 37 Kene niyu ilingi seini te eggimu eyew eggamiten niyu, su iteil niyu ne matulus diye te Magbebaye ne Manama. 38 Ka minsan hentew ne eg-iling kayi eyew igpeemut din, kenad e eg-ileen ne sakup pad te keet-etawan ku.”* Te Hibruwanen: egtamperen e puun te keet-etawan din.