1  ✡ Hin 12:7; Hin 26:3; Hin 28:13.Migkahiyan te Magbebaye ne Manama si Muwisis, “Awe kad due wey dumaa nu ka me etew ne in-uyan nu kayi puun te Ihiptu, wey hendiye kew te inged ne insaad ku ki Abraham, ki Isaak, wey ki Hakub. Migkahiyan ku sikandan dengan, ‘Igbehey ku seini ne tane diye te me kabuhalan niyu.’ 2 Egsuhu a te panalihan ne iyan eggun‑a keykew, wey egdeldelen ku ka me Kanaanen, ka me Amurihanen, ka me Hitihanen, ka me Pirisihanen, ka me Hibihanen, wey ka me Hibusihanen. 3 Takereg kew diye te meupiya ne tane wey dakel se eg-uma,* Te Hibruwanen: tane ne egtulayasan te gatas wey teneb. piru kena a egduma kaniyu, su me makehal ka ulu† Te Hibruwanen: migkeleg se lieg. niyu wey kema ke kene ku sikaniyu egkeul-ulungan te egdusa diye te deralanen.”

4 Miglungku ka me etew te pegkarineg dan te mareet ne guhuren te Manama, wey ware sikandan miggimmimasad ka eglungku. 5 Su migkahiyan te Magbebaye ne Manama si Muwisis, “Kahii nu ka me kabuhalan ni Israil, ‘Makehal iya ka me ulu niyu ne me etew. Ne emun ke egdumaan ku sikaniyu minsan dagdahew re, kene ku iya sikaniyu egkeul-ulungan te egdusa. Na, luunga niyu ka immanaluub niyu ne me dayan-dayan te lawa eyew igpalene-lene kud ke nekey ka eggimuwen ku kaniyu.’ ” 6 Purisu warad miggimmimasad ka me kabuhalan ni Israil puun te pegligkat dan diye te Bubungan ne Sinay.‡ Te Hibruwanen: Bubungan ne Hurib. Dangeb seini ne ngaran te Bubungan ne Sinay.

7 Nabatasan e ni Muwisis ne eg-uy-uyanen din ka balungbalung wey diye igpasasindeg te madmariyu te kampu wey ingngaranan din seini te Balungbalung ne Temuwanan. Ka minsan hentew ne egkeupian ne egpanginginse te Magbebaye ne Manama, eggendiye de te balungbalung. 8 Emun ke eggendiyad e si Muwisis te balungbalung, egmanasindeg ka langun ne etew diye te me balungbalung dan wey egtengtengan dan sikandin taman te egpakaseled e diye te balungbalung. 9 Ke egpakaseled e si Muwisis te balungbalung, eglene e ka gapun ne egpekeiling te sungkaleg wey diye eglenged te gumawan te balungbalung, wey egpakiglalag e ka Manama ki Muwisis. 10 Ne emun ke egkakite e te langun ne etew ka gapun ne egpekeiling te sungkaleg diye te gumawan te balungbalung, egmanasindeg e sikandan wey egsimba diye te gumawan te me balungbalung dan. 11 Egpatangkeey iya si Muwisis te Magbebaye ne Manama ka egpalalahey iling te talag-alukuy. Pegkapenga, eglibed e si Muwisis diye te kampu, piru egpalunggehaat de diye te balungbalung ka suluhuanen din ne si Huswi ne anak ni Nun.

12 Ne migkahiyan ni Muwisis ka Magbebaye ne Manama, “Malehet iya ne egpepanguluwen a nikeykew te seini ne me etew te peggipanew, piru wara a nikeykew nangeni ke hentew ka igparuma nu keddiey. Ne migkahi ke pad iya man‑e te neilaan a iya nikeykew wey ingkatelesi a nikeykew.§ Te Hibruwanen: nanengnengan ku sikeykew te ngaran nu wey igkatelesi ka te mata ku. 13 Purisu ke malehet ne ingkatelesi a nikeykew, nangeni a ubag nikeykew te me planu nu eyew egpekeila a keykew, wey eyew igkatelesi e pad nikeykew. Sumsumana nu degma ne keet-etawan nu ka seini ne tribu.”* Te Hibruwanen: nasud.

14 Ne migkahi ka Manama, “Egdumaan ku sikeykew wey egbehayan te keupianan.”

15 Ne migkahi si Muwisis, “Kene key paawaa te seini ne inged ke kene ka egduma kanami. 16 Menuwen naa te egnengneng ke ingkatelesi a nikeykew wey ka keet-etawan nu, ke kene key egdumaan nikeykew? Menuwen te egnengneng te langun ne keet-etawan kayi te inged ne kene key ne iling kandan, ke kene key egdumaan nikeykew?”

17 Ne migkahiyan te Magbebaye ne Manama si Muwisis, “Eggimuwen ku iya ka ingkahi nu su ingkatelesi ku sikeykew wey nekeila a keykew.”† Te Hibruwanen: neilaan ku sikeykew te ngaran nu.

18 Ne migkahi si Muwisis, “Papitawa a ubag nikeykew te katelesan nu.”

19  ✡ Rum 9:15.Ne migkahi ka Manama, “Igpakita ku keykew ka langun ne keupiya ku wey egngaranan ku ka ngaran ku ne iyan ka Magbebaye ne Manama. Ne igkeyid‑u ku seeye se igkeyid‑u ku, wey igkalulunu ku seeye se igkalulunu ku.” 20 Ne migkahi pad sikandin, “Piru kene ka egpakakita te ulaula ku, su egpatey ka etew ne egpakakita keddi. 21 Pitew ka, due batu seini te lenged ku ne egkasasindehan nu. 22 Igtahu ku sikeykew diye te lungag te batu su eglihad a, wey egbunbunan ku sikeykew te belad ku taman te egpakalihad e ka katelesan ku. 23 Egkataman, eg-aween kud e ka belad ku wey egkakita nu ka peka ku, piru kene egkaayun ne egkakita ka ulaula ku.”