1 “Si Bisalil wey si Uhuliab wey ka langun ne imbehayan te Magbebaye ne Manama te katuenan wey katagseb te peggimu te balungbalung, keilangan ne eggimu te langun ne igpeyimu te Manama.”

2 Ne in-umew ni Muwisis si Bisalil wey si Uhuliab wey ka langun ne imbehayan te Magbebaye ne Manama te katuenan wey egkeupian ne egbulig eyew egtrabahu e. 3 Ingkuwa ran diye ki Muwisis ka langun ne dasag ne in-uyan te me keet-etawan eyew eggamiten te peggimu te balungbalung. Ne sasangan de due ka me etew ne egpanguyan te me dasag dan te tagse maselem. 4 Nataman, in-engkeran pad te me trabahanti ka me himu ran diye te balungbalung wey miggendiye ki Muwisis 5 wey migkahi, “Dakel e amana ka impanguyan te me etew wey suble e te eggamiten ta te eggimu te balungbalung ne igpeyimu te Manama.”

6 Sikan naa ka insaparan ni Muwisis ka me etew te intiru ne kampu, “Peeneng-eneng kew e ka egbehey te igbulig te peggimu te balungbalung.” Sikan naa ka warad e nanguyan ka me etew te me dasag dan 7 su migsuble e ka indulung dan te langun ne eggimuwen dan.

8 Ka langun ne mangngateu ne me trabahanti, iyan miggimu te matulus ne balungbalung ne in-alad. Iyan dan inggamit te peggimu te balungbalung ka sapulu ne hinabel ne inggimu puun te mahal ne hinabel wey te imbatek te meilem, malalab, wey malugtem. Ka hinabel, inteyi-teyian te kirubin ne naay-ayaran te eggimu. 9 Sapulu wey daruwa (12) ne mitrus ka kalayatan te tagse hinabel wey daruwa ne mitrus ka kaluag. Nenekeg-iling ka seked te langun ne hinabel. 10 Impegtembil dan te egteyi ka lalimma ne hinabel wey inlein dan degma te egpegsumpul ka lein man‑e ne lalimma ne hinabel. 11 Intalingaan dan te me hinabel ne me meilem ka tagse pulipusan te daruwa ne tapid te me hinabel ne impegtembil. 12 Due lalimma ne pulu (50) ne intalinga ran te hun‑a ne tapid te me hinabel ne impegtembil, wey lalimma ne pulu (50) degma ka dangeb ne tapid te me hinabel. 13 Miggimu degma sikandan te lalimma ne pulu (50) ne sanggatanan ne bulawan ne egsanggatan dan te daruwa ne tapid te impegtembil ne me hinabel. Sikan naa ka nekegsumpul de ka langun ne hinabel.

14 Miggimu sikandan te sapulu wey sabeka (11) ne hinabel puun te bulbul te kambing eyew ig-atep te balungbalung. 15 Sapulu wey tatelu (13) ne mitrus ka kalayat te tagse hinabel wey daruwa ne mitrus ka kaluag. 16 Impegtembil dan te egteyi ka lalimma ne hinabel wey inlein dan degma te egpegtembil ka hen‑em ne hinabel. 17 Intalingaan dan te lalimma ne pulu (50) ne me hinabel ka hun‑a ne tapid ne me hinabel ne impegtembil, wey lalimma ne pulu (50) degma ka dangeb ne tapid te me hinabel. 18 Miggimu degma sikandan te lalimma ne pulu (50) ne sanggatanan ne burunsi ne egsanggatan dan te daruwa ne tapid te impegtembil ne me hinabel. 19 Miggimu man‑e sikandan te ig-atep te balungbalung ligkat te laplap te lukesan ne karniru wey in-akeban dan pad te laplap te kambing diye te ampew.

20 Ne inggimuwan dan te tukeg* Igtukeg seini te balungbalung ne in-iling te egtangenan te lekeb ne pididus. ne akasya ka balungbalung eyew igtukeg ne igpasasindeg. 21 Daruwa ne depa wey liware ka kalayat te tagse tabla wey tatelu ne dangew ka kaluag. 22 Intahuan dan te daruwa ne paa-paa ka tukeg eyew egpekegtupu te duma ne me tukeg. Ka langun ne tukeg intahuan dan te paa-paa. 23 Daruwa ne pulu (20) ne tukeg ka intukeg dan ne impasasindeg diye te igkakawanan ne balabahan te balungbalung, 24 wey inggimuwan dan te hep‑at ne pulu (40) ne pabunsuran ne pelata. Daruwa ka pabunsuran te tagse tukeg ne due daruwa ne paa-paa. 25 Ne intukehan dan degma te daruwa ne pulu (20) ne tukeg ne impasasindeg ka diye te limang te balungbalung, ka diye dapit te igkahibang ne balabahan te balungbalung, 26 wey intahuan te hep‑at ne pulu (40) ne pabunsuran ne pelata. Daruwa ka pabunsuran te tagse tukeg. 27 Ne intukehan dan te hen‑em ne tukeg ne impasasindeg ka diye te liyu te balungbalung ne diye dapit te iglineb, 28 wey intahuan dan te daruwa ne tukeg ka me pikungan te balungbalung. 29 Ne impegdangdang ka me tukeg ligkat te diralem wey impegket dan te derakel ne me sising ka diye te ampew. Ne iling ded degma ka duma ne me pikungan te balungbalung, impegdangdang ded wey impegket ka me tukeg diye te ampew. 30 Ne walu ka tukeg diye te peka te balungbalung, wey sapulu wey hen‑em (16) ka pabunsuran ne pelata, tigdaruwa te tagse tukeg.

31 Miggimu man‑e sikandan te me dullug ne akasya eyew igbalabag te balungbalung. Lalimma ne dullug ka igbalabag diye te sabeka ne tukeg te balungbalung, 32 lalimma degma ka igbalabag diye te limang ne tukeg, wey lalimma degma ka diye te peka te balungbalung ne egpakarapit te iglineb. 33 Ne impeelatan dan degma te dullug ka tagse tukeg wey nekeuma ka dullug diye te tupuan te pikungan te balungbalung. 34 Imbulitan dan te bulawan ka me tukeg wey intalingaan dan te derakel ne me sising ne bulawan ne iyan eglugluhan te me dullug ne igbalabag ne imbulitan ded degma te bulawan.

35 Miggimu sikandan te meupiya ne hinabel ne imbatek te meilem, malalab, wey malugtem, wey te mahal ne hinabel. Ka hinabel, inteyi-teyian te kirubin ne naay-ayaran te eggimu. 36 Ne miggimu sikandan te hep‑at ne sungkaleg ne akasya wey imbulitan dan te bulawan. Intahuan dan ka me sungkaleg te sanggatan ne bulawan ne egsanggatan te hinabel, wey impabunsud dan ka me sungkaleg te hep‑at ne pabunsuran ne pelata. 37 Ka gumawan te balungbalung inggimuwan dan te hinabel ligkat te me hinabel ne meilem, malalab, wey malugtem, wey te mahal ne hinabel, wey indayan-dayanan dan seini te egteyi. 38 Ne miggimu man‑e sikandan te lalimma ne sungkaleg te hinabel ne due sanggatanan wey impabunsud diye te lalimma ne pabunsuran ne burunsi. Imbulitan dan ka me sungkaleg wey ka me sanggatan te bulawan.