1 Ne inlibulung ni Muwisis ka langun ne kabuhalan ni Israil wey ingkahiyan, “Seini ka inlalag te Magbebaye ne Manama ne igpeyimu kaniyu. 2  ✡ Iks 20:8-11; 23:12; 31:15; 34:21; Lib 23:3; Diy 5:12-14.Trabahu kew te hen‑em ne aldew, piru himeley kew te igkapitu ne aldew su Aldew seini te Peggimeley wey matulus diye te Manama. Eggimatayan ka minsan hentew ne egtrabahu te sika ne aldew. 3 Kene kew en iya bul‑ug minsan egtetemeg naan de diye te me ugpaan niyu te Aldew te Peggimeley.”

4 Ne ingkahiyan ni Muwisis ka langun ne kabuhalan ni Israil, “Seini ka inlalag te Magbebaye ne Manama ne igpeyimu kaniyu. 5 Kuwa kew te igdasag niyu te Manama ne minsan nekey ne due te kaniyu. Ke egkeupian kew, egkaayun degma ne egdasag kew te bulawan, pelata, burunsi, 6 me hinabel ne meilem, malalab, wey malugtem, mahal ne hinabel, hinabel ne ligkat te bulbul te kambing, 7 laplap te lukesan ne me karniru wey te kambing ne imbatekan te malalab, me kayu ne akasya, 8 lana ne igtubil te me sulu, me leggu ne eggimuwen ne lana ne ig-itis te ulu wey meemut ne insinsu, 9 wey mahal ne me batu ne kurnalina, wey duma pad ne mahal ne me batu ne igdayan-dayan te kumbale ne egngaranan te ipud* Ka ipud iyan ka egsaluuben te Labew ne Talagpanubad ke egseled sikandin diye te balungbalung. wey te hagpi te kumeng te Labew ne Talagpanubad.”

10 “Libulung kew langun se mangngateu te minsan nekey ne kapandayan wey himuwa niyu ka langun ne igpeyimu te Magbebaye ne Manama. 11 Himuwa niyu ka balungbalung wey ka me sinabeng, me sanggatan, me tukeg,† Tukeg seini te balungbalung ne in-iling te egtangenan te lekeb ne pididus. me dullug, me sungkaleg wey ka me pabunsuran, 12 ka Tahuanan te Kasabutan wey ka me dullug ne igyayung, ka supe te tahuanan, ka hinabel ne ig-elet te me sinabeng, 13 ka lamisa wey ka me dullug ne igyayung, ka paan ne igpanubad diye te Manama, 14 ka tahuanan te sulu wey ka me kasangkapan te sulu, ka me lamparilya wey ka igtubil ne lana te sulu, 15 ka altar ne egtutungan te insinsu wey ka me dullug ne igyayung, ka lana ne igbaluhu, ka meemut ne insinsu, wey ka hinabel ne igdingding te gumawan te balungbalung, 16 ka altar ne tutunganan te igpanubad wey ka mahalat ne egtuuhan ne burunsi, wey ka me dullug ne igyayung, ka pelenggana wey ka egpapinnuuwan te pelenggana, 17 ka me hinabel ne ig-alad te lama, ka me sungkaleg ne ig-alad, wey ka me pabunsuran te me sungkaleg, ka hinabel ne igdingding te gumawan te alad, 18 ka igpakpak te tane ne eggiketan te me lubid, wey me hiket te balungbalung wey te alabat te alad, 19 ka mateles ne me kumbale te talagpanubad ne egtrabahu diye te Matulus ne Sinabeng, ka matulus ne me kumbale ni Aarun ne talagpanubad, wey ka me kumbale te me anak din ne igsaluub dan ke egkeyimu e ne me talagpanubad.”

20 Nataman, nangawe e ka langun ne kabuhalan ni Israil diye te tangkaan ni Muwisis. 21 Seeye se neupian wey due geyinawa ne egbulig,‡ Te Hibruwanen: neenat din te pusung din wey napehes din te gimukud din. mig-uyan te dasag diye te Magbebaye ne Manama eyew igbulig te eggimuwen ne balungbalung, te me kasangkapan te balungbalung, wey te me matulus ne me kumbale. 22 Ka me lukes wey me malitan ne egkeupian ne egdasag te Manama, nanguyan sikandan te mahal ne me sengel, me eritis, me sising, me binukul, wey langun ne kasangkapan ne me bulawan. Ne migbehey iya ka langun ne etew te bulawan eyew igdasag te Manama. 23 Migbehey degma seeye se due me hinabel ne meilem, malalab, malugtem, wey mahal ne hinabel, wey hinabel ligkat te bulbul te kambing, wey te laplap te lukesan ne karniru ne imbatek te malalab, wey laplap te kambing. 24 Seeye se due pelata wey burunsi, migbehey degma sikandan diye Magbebaye ne Manama, wey seeye se due me kayu ne akasya, migbehey red degma eyew egkahamit te peggimu te balungbalung. 25 Ka langun ne malitan ne mangngateu ne eggimu te bula-bula, migbehey te me bula-bula ne meilem, malalab, wey malugtem. Migbehey degma sikandan te mahal ne hinabel. 26 Nangimu degma te bula-bula ligkat te bulbul te kambing ka langun ne me malitan ne egkeupian wey egkateu ne eggimu te bula-bula. 27 Ne nanguyan ka me igbuyag te me etew te batu ne kurnalina wey duma pad ne me batu ne mahal eyew igdayan-dayan te ipud wey te hagpi te kumeng. 28 Nanguyan man‑e sikandan te me leggu wey lana te ulibu ne igtubil te sulu wey eggimuwen ne lana ne igbaluhu wey meemut ne insinsu. 29 Ka langun ne kabuhalan ni Israil, lukes wey malitan, ne egkeupian ne egbulig te himu ne insuhu te Manama ki Muwisis, nanguney-uney re due sikandan nanguyan te igpakarasag dan diye te Manama.

30 Ne migkahiyan ni Muwisis ka me kabuhalan ni Israil, “Pammineg kew, in-alam te Magbebaye ne Manama puun te me kabuhalan ni Huda si Bisalil ne anak ni Uri wey apu ni Hur. 31 Innipenu din sikandin te Panisingan din wey imbehayan te katuenan wey katagseb, wey egkateu sikandin te langun ne kapandayan. 32 Sikandin ka eggimu te meupiya ne kapandayan ne bulawan, pelata, wey burunsi, 33 wey egsapsap te me batu ne igdayan-dayan, wey eggeli te me kayu, wey eggimu te langun ne kapandayan. 34 Ne imbehayan man‑e sikandin te Manama te katuenan te pegpanulu te duma, wey iyan din duma si Uhuliab ne anak ni Ahisamak ne kabuhalan ni Dan. 35 Ne innipenu sikandan te Manama te katuenan te peggimu te langun iling te pegkulit te me batu, pegdayan-dayan, pegpaneyi te me hinabel ne meilem, malalab, wey malugtem, wey te mahal ne hinabel, wey egtuhul te hinabel. Mangngateu iya sikandan wey egpekeyimu te minsan nekey ne himu wey kapandayan.