1 Ne migkahiyan te Magbebaye ne Manama si Muwisis, 2 “Ipasasindeg nud ka matulus ne balungbalung* Te Hibruwanen: balungbalung ne temuwanan. ne in-alad, te an-anayan ne aldew te hun‑a ne bulan. 3 Itahu nu diye te seled te balungbalung ka Tahuanan te Kasabutan wey dingdingi nu seini te hinabel.† Nabaad te daruwa ne sinabeng ka balungbalung wey iyan eletanan ka hinabel. Diye nakatahu ka Tahuanan te Kasabutan te Amana ne Matulus ne Sinabeng. 4 Iseled nu diye te balungbalung ka lamisa wey ipeuntud nu ka me kasangkapan te lamisa. Iseled nu degma ka tahuanan te sulu wey itahu nu ka me lamparilya diye te me pakew te tahuanan. 5 Itahu nu ka bulawan ne altar ne egtutungan te insinsu diye te tangkaan te Tahuanan te Kasabutan, wey ibitin nu ka hinabel diye te gumawan te balungbalung. 6 Itahu nu ka altar ne tutunganan te igpanubad diye te egkatangkaan te gumawan te balungbalung. 7 Ne itahu nu naa ka pelenggana ne lu‑luanan diye te elat-elat te balungbalung wey te altar, wey tahui nu seini te weyig. 8 Ilingkus nu ialabat ka me hinabel te alad te lama te balungbalung, wey itangen nu degma ka hinabel te gumawan te alad te lama.

9 “Egkataman, kua nu ka lana ne ig-itis te ulu wey itisi nu ka balungbalung wey ka langun ne tahu diye eyew igpakahalad nu keddi, wey egkeyimu ka langun ne matulus. 10 Itisi nu degma ka altar ne tutunganan te igpanubad wey ka langun ne kasangkapan te altar eyew igpakahalad nu keddi, wey egkeyimu ka altar ne matulus. 11 Itisi nu man‑e ka pelenggana ne lu‑luanan wey ka papinnuuwan eyew igpakahalad nu keddi.

12 “Ne dumaa nu si Aarun wey ka me anak din diye te gumawan te balungbalung wey dihusa nu sikandan. 13 Ne ipasaluub nu ki Aarun ka matulus ne me kumbale wey itisi nu sikandin te lana eyew igpakahalad nu sikandin keddi, wey egkeyimu e sikandin ne talagpanubad keddi. 14 Uyana nu degma ka me anak din wey pasaluubi nu te me kumbale te me talagpanubad, 15 wey itisi nu degma sikandan te lana iling te peg-itis nu te amey ran eyew egkeyimu e sikandan ne me talagpanubad keddi. Ka peg-itis kandan te lana, iyan tuus te ware katamanan ne peg-alam te kandan ne kabuhalan eyew egkeyimu ne me talagpanubad.”

16 Ne intuman ni Muwisis ka langun ne insuhu te Magbebaye ne Manama kandin. 17 Seeye naa ka nakasasindeg e ka balungbalung te an-anayan ne aldew te hun‑a ne bulan te igkarangeb ne leg‑un ligkat te peg-awe dan te Ihiptu. 18 Ne in-iling kayi ni Muwisis te egpasasindeg ka balungbalung. Intahu din ka me pabunsuran, wey impasasindeg din e ka me tukeg,‡ Igtukeg seini te balungbalung ne in-iling te egtangenan te lekeb ne pididus. wey imbalabag din e ka me dullug, wey impasasindeg din e ka me sungkaleg. 19 Inseb-ungan din ka balungbalung wey in-akeban din pad man‑e atepi, su sika iya ka insuhu kandin te Magbebaye ne Manama. 20 Nataman, ingkuwa rin ka kasabutan§ Seini iya ka daruwa ne batu ne insulatan te sapulu ne balaud te Manama. wey intahu din diye te Tahuanan te Kasabutan, wey inluglug din ka igyayung ne me dullug diye te intalinga te tahuanan wey insupaan din e. 21 Ne impaseled din e ka Tahuanan te Kasabutan diye te balungbalung, wey intangen din ka hinabel eyew egkaringdingan seini, su sika iya ka insuhu kandin te Magbebaye ne Manama.

22 Intahu din ka lamisa diye te balungbalung, diye te limang te intahuan te Tahuanan te Kasabutan wey nakarapit te igkahibang ne balabahan te balungbalung. 23 Ne in-untud din te lamisa ka paan ne impanubad diye te Magbebaye ne Manama, su sika iya ka insuhu kandin te Manama. 24 Intahu din degma diye te balungbalung ka tahuanan te sulu, diye te egkatangkaan te lamisa wey dapit te igkakawanan te balungbalung. 25 Ne impareketan din ka sulu diye te tangkaan te Magbebaye ne Manama su sika iya ka insuhu kandin te Manama. 26 Ne intahu din ka bulawan ne altar diye te balungbalung, diye lenged te egkatangkaan te hinabel, 27 wey migtutung sikandin te meemut ne insinsu diye te altar, su sika iya ka insuhu kandin te Magbebaye ne Manama. 28 Ne intangen din ka hinabel diye te gumawan te balungbalung. 29 Ne diye din itahu te gumawan te balungbalung ka altar ne tutunganan te igpanubad, wey migtutung sikandin te igpanubad ne egtutungen wey harina, su sika iya ka insuhu kandin te Magbebaye ne Manama. 30 Ne intahu din ka pelenggana diye te elat-elat te balungbalung wey te altar, wey intahuan din te weyig eyew egpanlu‑luan. 31 Dutu iya egpanlu‑lu si Muwisis, si Aarun wey ka me anak din te me belad wey me paa ran. 32 Keilangan ne egpanlu‑lu sikandan ke egseled diye te balungbalung wey ke egparani te altar, su sika iya ka insuhu te Magbebaye ne Manama ki Muwisis. 33 Nataman, inlingkus din ialabat ka me hinabel diye te lama te balungbalung, wey intangen din degma ka hinabel te gumawan te alad te lama. Purisu napengaan iya ni Muwisis ka langun ne eggimuwen.

34  ✡ 1Har 8:10-11; Isa 6:4; Isi 43:4-5; Imp 15:8.Te ware naluhey, nabunbunan te gapun ka balungbalung wey napenu seini te katelesan te Magbebaye ne Manama. 35 Ware nakaseled si Muwisis te balungbalung su napenu seini te gapun wey te katelesan te Manama. 36 Emun ke egparibabew ka gapun puun te balungbalung, egmangalaglag e degma ka me kabuhalan ni Israil. 37 Emun ke kene egparibabew ka gapun, kene degma sikandan egmangalaglag, wey egtetahad de sikandan ke eg-awe e man‑e ka gapun human sikandan eggalin. 38 Ka gapun ka tuus te katelesan te Magbebaye ne Manama ne eg-uugpe diye te ampew te balungbalung te maaldew, wey egkalegleg seini ke marusilem. Layun seini egkakita te me kabuhalan ni Israil te timpu te peggiphipanew ran.