1 Ne in-uyan a te etew diye te gumawan ne dapit te igsile, 2  ✡ Isi 10:3-4,18-19; 11:22-23; Imp 1:15.wey nakita ku diye ka maresen ne katelesan te Manama te Israil ne egpuun te igsile, wey nalayahan ka intiru ne tane. Ne ka laheng te Manama, egpekeiling karahing te lehes te dahat. 3 Ka seini ne impakita keddi, egpekeiling ded te an-anayan ne impakita keddi te timpu ne indereetan te Manama ka Hirusalim, wey iling degma te nakita ku diye te ilis te Weyig te Kibar ne miglangkeb a te tane te pegkakita ku dutu. 4 Ne miglasud diye te timplu ka maresen ne katelesan te Magbebaye ne Manama wey diye migbaye te gumawan ne dapit te igsile.

5 Ne impeenew a te Panisingan te Magbebaye, wey in-uyan a diye te igkarangeb ne lama te timplu.* Malig-et seini ne lama ne diye te egkatangkaan te Matulus ne Sinabeng diye te timplu. Ne nakita ku ne napenu te katelesan te Magbebaye ka seled te timplu. 6 Ne taheed te migsasindeg ka etew diye te dangdang ku, due narineg ku ne laheng ne egpuun te timplu ne migkahi keddi, 7 “Etew, seini ka trunu ku, wey ka diekanan ku. Eg-ugpa a kayi te ware egtamanan duma te me Israilita. Ne kenad e eglinditan te me Israilita wey te me Hari dan ka matulus ne ngaran ku pinaahi te pegsimba te me diyus-diyus wey ke me larawan naa te me Hari ne nammatey e. 8 Migpasasindeg dengan sikandan te me altar ne para te me diyus-diyus dan. Ne diye dan ipasasindeg te dangdang te altar ku wey iyan ney re eletanan ka alabat te timplu. Inlinditan dan ka ngaran ku pinaahi te sika se mallindit ne hinimuwan dan. Purisu indereetan ku sikandan tenged te langet ku. 9 Ne kuntee, keilangan ne egpeeneng-eneng e sikandan ka egsimba te me diyus-diyus wey te me larawan te me Hari dan ne nammatey e. Ne eg-ugpa ad e duma kandan te ware egtamanan.”

10 Ne migpabulus-bulus ka laheng ne migkahi keddi, “Etew, ihuhud nu iayad-ayad wey ipapitew nu te me Israilita ka timplu ne impakita ku keykew. Ihuhud nu kandan ke mamenu ka pegkateyul kayi. Ne egkengeyilew e sikandan tenged te me sale dan. 11 Ne emun ke egkengeyilew e sikandan te langun ne neyimu ran, ihuhud nu iayad-ayad kandan ka planu ke egmenuwen te eggimu ka timplu, ka me bayaanan wey ka me gumawan, wey ka intiru iya ne timplu wey ka langun ne me balaud wey me suhu. Druwinga nu seini diye te tangkaan dan eyew egkakita ran wey egkeikul ran. 12 Ne seini ka me balaud meyitenged te timplu. Keilangan ne matulus ka langun ne inged ne nakalingut diye te puntul te bubungan ne egpes-ekan te timplu.”

13  ✡ Iks 27:1-2; 2Kru 4:1.Ne seini ka me seked te tagse baad te altar. Ka pabunsuranan te altar, egpalingutan te egpabayaan te weyig ne liware te mitrus se karalem, wey liware degma te mitrus se kaluag. Ne due sanipa ne impatemew ipalingut ne sabeka ne dangew se kaluag. 14 Ne seini degma ka katikangan te altar. Tatelu ne untud ka altar. Ka kinariraleman, kuwadradu ne sabeka ne mitrus ka kaluag wey kalayat, wey liware te mitrus ka katikang. Ne ka taliware ne untud, daruwa ne mitrus ka kaluag ne kuwadradu degma, wey liware te mitrus ka katikang. 15 Ne ka tutunganan te igmanubad, ne iyan ka kinaribabawan ne untud, daruwa ne mitrus se katikang. Ne diye te tagse pikungan te kinaribabawan ne untud, due me sungey-sungey ne tigliware te mitrus se kalayat. 16 Kuwadradu red degma ne tighen‑em ne mitrus se kaluag wey kalayat. 17 Ne ka igkarangeb ne untud, kuwadradu red degma ne tigpitu ne mitrus se kaluag wey kalayat. Ne ka kinariraleman, kuwadradu red degma ne ware de migliware te mitrus se kaluag wey kalayat, wey liware te mitrus se katikang. Ne due haheran diye te kakiliran ne dapit te igsile ne egpatakereg diye te dibabew te altar.

18  ✡ Iks 29:35-37.Ne migpabulus-bulus ka laheng ne migkahi keddi, “Etew, pammineg ka te iglalag ku keykew. Ke igpakapasasindeg e ka altar, ihalad nu seini pinaahi te pegtutung te egtutungen ne igpanubad, wey papespesiki nu te langesa te ayam ne igpanubad. 19 Ne ka egpamakey keddi ne me talagpanubad ne me kabuhalan ni Saduk ne Libita, behayi nu te turu ne nati te baka ne igpanubad dan eyew iglinis te sale. 20 Ne kuwa ka te langesa wey pamunasi nu ka hep‑at ne sungey-sungey ne diye te tagse pikungan te altar, lagkes ka me pikungan te igkarangeb ne untud, wey ka me sanipa. Te sika ne paahi egmatulus e ka altar wey egpakahalad kad e due. 21 Ne kua nu naa ka turu ne nati te baka ne igpanubad eyew iglinis te sale, wey tutunga nu seini diye te inteil ne tutunganan ne diye te lihawangan te timplu. 22 Te igkarangeb ne aldew, panubad ka te lukesan ne kambing ne ware nabalbalangi isip igpanubad te pegmatulus te altar. Matulusa nu ka altar pinaahi te langesa te sika se lukesan ne kambing iling te inggimu nu te turu ne nati te baka. 23 Ne emun ke egkeimpusan nud e te eglinis ka altar, kuwa kad e man‑e te lein ne turu ne nati te baka, wey lukesan ne karniru ne neelin ne ware nabalbalangi, 24 wey uyana nu kayi te tangkaan ku. Ne ka eggimuwen te me talagpanubad, egpamukbukan dan seini te asin, wey igpanubad dan e isip egtutungen ne igpanubad. 25 Ne tagse aldew te pitu ne aldew, panubad ka te sabeka ne lukesan ne kambing, sabeka ne turu ne nati te baka, wey sabeka ne karniru ne neelin ne ware nabalbalangi isip igpanubad te peglinis te sale. 26 Sabeka ne simana ka eggimuwen te me talagpanubad ne pegpalangesa te pegmatulus te altar eyew egkaayun e ne eggamiten. 27 Te igkawalu ne aldew, egkaayun e ne egtutungan seini te me talagpanubad te egtutungen ne igpanubad niyu, wey te igpanubad para te keupianan. Ne egdawaten kud e sikaniyu. Sikeddi se Magbebaye ne Manama ka miglalag kayi.”