1  ✡ Imp 10:9-10.Ne migpabulus ka laheng ne migkahi keddi, “Etew, keena nu seini se eglulunen ne baseen. Ne hendiyei nud e ka me Israilita wey guhuri nud e sikandan.” 2 Purisu migginganga a, wey insungit din e keddi ka eglulunen ne baseen.

3 Ne migkahi sikandin, “Na, sepaa nud e sika wey abelenga nud eyew egkabulung ka.” Purisu in-abeleng kud e ka eglulunen ne baseen. Meemis seini iling te teneb.

4 Ne migkahi e man‑e sikandin keddi, “Etew, hendiye kad te me Israilita, wey guhuri nud e sikandan te iglalag ku keykew. 5 Kene ku sikeykew igpeendiye te keet-etawan ne lein se me linalahan, wey malised ne egsabuten, ke kene, diye de iya te me Israilita. 6 Emun ke igpeendiye ku sikeykew te keet-etawan ne lein se me linalahan wey malised ne egsabuten, egpammineg iya mule sikandan keykew. 7 Piru ka me Israilita, kene egpammineg keykew, su kene ma sikandan egkeupian ne egpammineg keddi. Me makehal se me ulu ran langun, wey me masinupaken sikandan keddi. 8 Piru egbehayan ku sikeykew te kabulut te peglalag kandan, 9 wey eggimuwen ku ka ulu nu ne iling kakehal te sumalem ne batu. Purisu kene ka kaaldek kandan minsan ke iling te mabbulut naan de iya sikandan su me masinupaken ma sikandan.”

10 Ne migpabulus sikandin ka migkahi keddi, “Etew, pammineha nu ay-ayari ka langun ne iglalag ku keykew, wey itines nu seini te pusung nu. 11 Hendiyei nud e ka me duma nu te naddakep, wey guhuri nud e sikandan te iglalag ku kandan, egpammineg ma sikandan wey se kene. Kahii nu sikandan, ‘Seini ka inlalag te Magbebaye ne Manama.’ ”

12 Ne ingkayew a te Panisingan, wey due narineg ku ne laheng ne migderaheneg diye te keinniyuhan ku ne migkahi, “Egdayanen ka geem te Magbebaye ne diye te langit.” 13 Ne narineg ku degma ka dahing te egmekegdagket-dagket ne me pakpak te me hinimuwan ne eggeheyinawa, wey ka dahing te me liggid ne hendue te linug ne diye te kakiliran te tagse sabeka kandan. 14 Ne in-umaan a te Panisingan te Manama, wey amana a nalangeti piru impegnel a nikandin. Ne inggenat a te Panisingan wey in-uyan a diye te mariyu. 15 Ne nekeuma a diye te me dinakep ne nangugpe diye te Til-Abib, ilis te Weyig te Kibar. Ne mig-uugpa a diye duma kandan te pitu ne aldew. Ne migmahuya a tenged te nenakita ku.

16 Peglihad te pitu ne aldew, impanengneng a te Magbebaye, 17 “Etew, in-alam ku sikeykew ne talagtameng te me Israilita. Purisu sikeykew ka egpaney-paney kandan te minsan nekey ne egkarineg nu ne eglalahen ku. 18 Ne emun ke egkahiyan ku ka mareet ne etew te egpatey sikandin tenged te me sale din, piru ware nu sikandin panpanayi ne eg-engked te mareet ne hinimuwan din eyew egkaluwas ded, sikeykew ka egbasulien ku te kamatayen din. 19 Piru ke egpanpanayan nu sikandin wey kene sikandin eg-inniyug te mareet ne hinimuwan din, egpatey iya sikandin tenged te sale din, piru egkaluwas ka mule.

20 “Ne emun ke eggimu te mareet ka matareng ne etew, wey egpaantusen ku sikandin, egpatey iya sikandin ke kene nu egpanpanayan. Ne eglingawan ku ka meupiya ne hinimuwan din, wey egbasulien ku sikeykew te kamatayen din. 21 Piru ke egpanpanayan nu sikandin, wey egtumanen din ka me paney-paney nu, kene ded iya sikandin egpatey, wey kene ku degma sikeykew eglegparan.”

22 Ne in-umaan ad e man‑e te Panisingan te Manama, wey migkahiyan a nikandin, “Hendiye ka kuntee te napu, su egpakiglalag a keykew diye.”

23 Purisu miggendiya ad e te napu, wey nakita ku diye ka katelesan te Magbebaye iling te nakita ku diye te ilis te Weyig ne Kibar. Ne miglangkeb ad e man‑e. 24 Piru in-umaan a te Panisingan te Manama, wey impasasindeg a, wey ingkahiyan a, “Uli ka diye te baley nu, wey lelekeb ka. 25 Ne diye, egbebakuen ka te me duma nu te lubid eyew kene ka egpakaliglihawang duma kandan. 26 Ne eggimuwen ku sikeykew ne ummew eyew kene ka egpakasapad kandan te me masinupaken ne keet-etawan. 27 Ne wey ke re egpakalalag ke egpakiglalag a keykew, wey eglalahan nu sikandan te lalag ne egpuun keddi, te Magbebaye ne Manama. Egpammineg ka duma kandan, piru ka duma, kene su me masinupaken ma iya sikandan.”