1 Ne migkahi keddi ka laheng, “Etew,* Te Hibruwanen: Anak te etew. sasindeg ka su due iglalag ku keykew.” 2 Te peglalag din keddi, in-umaan a te Panisingan te Manama wey impasasindeg a. Ne migpammineg a mig-ayad-ayad te laheng ne migpakiglalag keddi. 3 Migkahi sikandin keddi, “Etew, igpeendiye ku sikeykew te me Israilita, ka keet-etawan ne masinupaken keddi. Migsukul sikandan keddi taman kuntee, iling te me kaap-apuan dan dengan. 4 Me makehal se me ulu ran, wey me masinupaken sikandan keddi. Purisu igpeendiye ku sikeykew te kandan eyew te pegkahi, ‘Seini ka lalag te Magbebaye ne Manama,’ 5 su eyew egkanengnengan dan ne duen bes ded prupita diye te taliware dan. Balahad e ke kene sikandan egpammineg tenged te pegkamasinupaken dan.

6 “Ne sikeykew etew, kene ka kaaldek kandan, wey te me masakit ne egmanlalahen dan; minsan pad eglingutan ka nikandan iling te me duhi, wey minsan eg-ugpe ka ne iling te miglemung te me tapilak. Kene ka kaaldek kandan minsan ke iling te mabbulut naan de iya sikandan, su nakanengneng kad ma ne me masinupaken iya sikandan. 7 Keilangan ne igguhud nu kandan ka lalag ku, egpammineg ma sikandan wey se kene, tenged te pegkamasinupaken dan. 8 Piru sikeykew etew, pammineg ka te eglalahen ku. Kene ka supak keddi iling kandan. Na, hinganga ka wey keena nu ka igbehey ku keykew.” 9  ✡ Imp 5:1.Te pegtengteng ku, iyan kud e se belad ne ingketeng peengkayi te keddi wey due inggen-genan ne eglulunen ne baseen. 10 Ne imbelat seini kayi te tangkaan ku, wey due immanulat diye te tagse limang. Me lalag seeye te peglungku, pegkalaggew, wey pegpandalawit.