1 Ne impanengneng ad man‑e te Magbebaye ne Manama, 2 “Etew, tangke ka te me bubungan te Israil wey panagne ka te mareet diye te kandan te egkahi: 3 He me bubungan te Israil, me labuntud, me beuhan, wey me kanappuan, pammineha niyu ka inlalag te Magbebaye ne miggenendue: egpeuyanan ku sikaniyu te gira, wey egpangguhusen ku ka me panubaran niyu diye te me bubungan. 4 Egkagguhus ka me altar niyu ne tutunganan te igpanubad, wey ka me tutunganan niyu te insinsu. Ne egpangimatayan ku diye te tangkaan te me diyus-diyus ka me mahinged due te kaniyu. 5 Igmabahed ku ka nammatey ne Israilita diye te tangkaan te me diyus-diyus dan, wey iglingut ku igtalagtag ka me tul‑an dan diye te me altar niyu. 6 Egpangguhusen ku ka me siyudad niyu, wey ka me panubaran niyu diye te me bubungan, me diyus-diyus, wey ka me tutunganan niyu te insinsu, wey egkengaawe ka langun ne immangimu niyu. 7 Egkammatey ka me mahinged due te kaniyu, wey ka egkengasame, egpakanengneng e ne sikeddi ka Magbebaye.

8 “Kene ku sikandan eg-aminen te egpangimatey. Egmegsusuwayen ku ka duma diye te duma ne me nasud isip me dinakep. 9 Ne egkatanuran a nikandan diye, wey egkasuman-suman dan ne nasilag a kandan tenged te peg-inniyug dan keddi, wey tenged te pegsimba ran te me diyus-diyus. Ne egkaalimedmeran e sikandan te pegkeetew ran tenged te mallindit ne hinimuwan dan. 10 Ne egkanengnengan dan e ne sikeddi se Magbebaye, egmaleheten ku iya ka inlalag ku ne igpasalerep ku kandan ka seini ne karereetan.”

11 Ne migpabulus-bulus ka Magbebaye ne migkahi keddi, “Pegtagpi ka te pegpapitew te langet wey taktakerang ka, wey panagyawan ka te pegpapitew te langet nu tenged te mallindit ne hinimuwan te me Israilita ne igkalangeti ku, su egpatey sikandan te gira, bitil, wey dalu. 12 Ka seeye se diye te mariyu, egkapatey te dalu, ka due te marani, egkapatey te gira, wey ka egkasame, egkapatey te bitil. Te iling due, igpakapaneem-neem ku kandan ka langet ku. 13 Ne egmakabahed duma te me diyus-diyus ka lawa te nammatey ne egpakalingut te me altar ne tutunganan te igpanubad, diye te me labuntud, diye te puntul te me bubungan, diye te lebut te derakel ne me kayu, wey diye te lebut te mallapung ne me kayu ne Uk—sika ka me inged ne tutunganan te igmanubad dan diye te me diyus-diyus dan. Ne egpakanengneng e sikandan ne sikeddi ka Magbebaye. 14 Eglegparan ku sikandan egpatamtamani wey egkeyimu e ka inged dan ne mammara ne inged ne ware eg-ugpe, puun te disirtu diye te igkakawanan ne balabahan, taman te Dibla ne diye te igkahibang ne balabahan. Ne egpakanengneng e sikandan ne sikeddi ka Magbebaye.”