1 Ne impanengneng ad man‑e te Magbebaye ne Manama, 2 “Etew, kahii nu ka me Israilita te migkahi a se Magbebaye: Seinid e ka katamanan te intiru ne tane te Israil.

3 “Seinid e ka katamanan niyu. Igpaneem-neem kud e kaniyu ka langet ku. Eggukuman ku sikaniyu sumale te me hinimuwan niyu wey eglegparan ku sikaniyu tenged te mallindit ne hinimuwan niyu. 4 Kena ad iya egkeyid‑u kaniyu; kenad egkabalbalawan ka suman-suman ku te peglegpad kaniyu tenged te mareet wey mallindit ne me hinimuwan niyu wey egkanengnengan niyu ne sikeddi ka Magbebaye.”

5 Ne migpabulus ka Magbebaye ne migkahi, “Eggingume e ka egmekegsinsinundul ne karereetan. 6 Sikan en iya ka katamanan niyu, wey egkengaawe kew e, 7 sikaniyu se me Israilita, seinid e ka karereetan niyu. Mahaan e ka timpu ne egkewukag kew, wey egkataman e ka me peggale-gale niyu diye te me bubungan.

8 “Te kene egkaluhey, egpasalerepen kud e sikaniyu te mangune-kune ne langet ku. Eggukuman ku sikaniyu sumale te me hinimuwan niyu wey eglegparan ku sikaniyu tenged te mallindit ne hinimuwan niyu. 9 Kena ad iya egkeyid‑u kaniyu; kenad egkabalbalawan ka suman-suman ku te peglegpad kaniyu tenged te mareet wey mallindit ne hinimuwan niyu wey egkanengnengan niyu ne sikeddi se Magbebaye ka eglegpad kaniyu. 10 Mahaan en iya ka aldew te karereetan. Suble e ka pegkamareet wey pegkaambuhen te me etew. 11 Ka mareet ne hinimuwan dan, eglibed diye te kandan isip legpad te pegkamareet dan. Ware egkasame kandan, lagkes ka langun ne karatuan dan wey kabantug dan.

12 “Miggingume e ka timpu te peglegpad. Kenad keilangan ne egmanggale-gale ka egpameli, wey kenad degma keilangan ne eglungku ka egmamelegye su egpakaneem-neem ka langun te langet ku. 13 Ke duen ma egkengeuyag ne nigusyanti, kenad e sikandan egpakaabey egpakapamelegye, su egkeyitabu iya ka langun ne ingkahi ku meyitenged te me Israilita. Ka minsan hentew ne eggimu te mareet, kene egpakaluwas te umul rin. 14 Egparahingen ka trumpita te pegpangandam te pegpakiggira, piru ware sabeka ne eggendiye te giraanan su egpakaneem-neem ma ka langun te langet ku.

15 “Ka me etew ne diye te lihawangan te siyudad, egkammatey te gira. Ne ka diye te seled, egkammatey te bitil wey dalu. 16 Ke duen ma egkasame, egpangaput sikandan diye te me bubungan. Ne egmakareg-uy e sikandan tenged te me sale dan wey egpekeiling e ka me laheng dan te egkekahi ne me selepati diye te napu. 17 Ne warad keseg te me belad dan, wey magguye e degma ka me buel ran. 18 Ne egmanaluub sikandan te saku,* Iyan igpasabut kayi ka meitem wey egdehes ne manggad ne inggimu puun te bulbul te kambing ne igsaluub te timpu te peglungku wey ke eg-inniyug naa te sale. wey egtabuluhan dan ka ulu ran te pegpapitew te peglungku dan. Ne iyan egdapit kandan ka liyas wey hilew. 19 Ne igpandegpak dan e diye te me deralanen ka me bulawan wey me pelata ran iling te mallindit ne kasangkapan. Kene seini egpakaluwas kandan te aldew ne igpaneem-neem ku kandan ka langet ku. Kene sika egpakabulung kandan su sikan ma ka egpuunan ne nakasale sikandan. 20 Inggamit dan te pegpaambug ka kateles te me palamuti dan, wey inggamit dan sika te pegpangimu te makalelanget ne me diyus-diyus dan wey maligsem ne me larawan. Purisu eggimuwen ku ne igkalindit dan ka me karatuan dan.

21 “Ne igpaahew ku sika te me lapu wey te maddeet ne etew wey eglilinditan dan e seini. 22 Egbalaharen ku re due sikandan ka eglilindit te amana ku geyinawei ne timplu. Eglelasuran seini te me takawen wey eglilinditan.

23 “Egpandakepen ka keet-etawan ku su nekeempet man e te nasud dan ka pegpeyimmimatayey, wey neempet e te mareet ne hinimuwan ka siyudad dan. 24 Igpaahew ku ka me baley ran te amana ne maddeet ne keet-etawan ne egmamuun pad te duma ne me nasud. Eg-epusen kud ka pegpaambug te mabbulut ne etew ran, wey egbalaharen kud ne eglilinditan ka me simbaanan dan. 25 Ke egginguma kandan ka mangune-kune ne liyas, egpamitew sikandan te keupianan piru kene dan seini egkakita. 26 Ne egginguma kandan ka egmekegsinsinundul ne karereetan wey maddeet ne me guhuren. Egpanginginse sikandan te me prupita piru ware egkarawat dan ne me guhuren. Ne kenad igpakapanulu te me talagpanubad ka me balaud, wey kenad e degma egmakatambag ka me pangulu. 27 Ne eglungku ka Hari wey egkaawaan te pegpallateng ka me pangulu, wey egpangelkelen te liyas ka keet-etawan. Eglegparan ku sikandan tenged te me hinimuwan dan, wey eggukuman ku sikandan iling te peggukum dan te duma. Ne egpakanengneng e sikandan ne sikeddi ka Magbebaye.”