1 Ne narineg ku ka Manama ne migpangumew te meemen ne miggenendue, “Pangendini kew se me talagdereet te siyudad, wey panguyan kew te me panganiban te pegdereet.” 2 Ne due nakita ku ne hen‑em ne etew ne miglasud diye te gumawan ne dapit te igkahibang ne balabahan wey migpanguyan sikandan te me panganiban te peggimatey. Ne due duma ran ne sabeka ne etew ne migkukumbale te linu, wey migkekemkem te me himan ne igsulat. Migsasindeg sikandan diye te dangdang te burunsi ne altar.

3 Ne mig-awe ka katelesan te Manama te Israil, puun te me kirubin ne diye te ampew te Tahuanan te Kasabutan diye te seled te amana ne matulus ne sinabeng, wey miggalin diye te gumawan te timplu. Ne in-umew te Magbebaye ne Manama ka etew ne migkukumbale te linu wey migkekemkem te me himan ne igsulat,* Egkakita ka me hinimuwan ne eggeheyinawa diye te Isikil 1:5-12 wey diye Isikil 10:1. 4  ✡ Imp 7:1-8; 9:4; 14:1.wey ingkahiyan te Magbebaye ka etew, “Lasud ka te siyudad te Hirusalim, wey panahui nu te palinneu ka me buked te langun ne miglungku tenged te mallindit ne hinimuwan diye te seled te siyudad.”

5 Ne narineg ku ne ingkahiyan degma te Manama ka hen‑em ne etew, “Sinundul kew kandin diye te siyudad, wey pangimatayi niyu te ware pegkeyid‑u ka langun ne ware palinneu te me buked wey kene niyud balbalawi ka suman-suman niyu te peglegpad kandan. 6 Pangimatayi niyu ka me buyag, me kanakan, me mengebay, me iney wey me anak. Piru kene niyu ilagkes ka langun ne due palinneu te buked. Bunsud kew diye te timplu ku.” Purisu inggun‑aan dan te egpangimatey ka me igbuyag ne diye te timplu.

7 Ne ingkahiyan e man‑e sikandan te Manama, “Linditi niyu ka timplu pinaahi te pegpanambu te impangimatayan niyu diye te seled. Hipanew kew e, himuwa niyud seini.” Purisu miggendiyad sikandan wey impangimatayan dan e ka langun ne mahinged te siyudad.

8 Te sasangan e sikandan ka egpangimatey diye te siyudad, wey te sabsabeka ku naan de te nahaat, miglangkeb a wey migpangumew a te Manama, “He Magbebaye, eg-aminen nu naa te egpangimatey ka nenasame ne me Israilita tenged te langet nu te Hirusalim?”

9 Ne migtabak ka Manama, “Suble e ka sale te keet-etawan te Israil wey Huda. Neempet e te pegpeyimmimatayey ka intiru ne nasud wey warad eleg ne peggukum diye te siyudad te Hirusalim. Ne migkahi pad man‑e sikandan te in-engkeran ku kun e ka nasud, wey kene ku kun e sikandan egkiteen. 10 Purisu kene ku sikandan igkeyid‑u wey kenad egkabalbalawan ka suman-suman ku te peglegpad kandan, wey eggimuwen ku diye te kandan ka inggimu ran diye te duma.”

11 Ne miglibed ka etew ne migkukumbale te linu wey due me himan ne igsulat, wey migkahi, “Neimpusan kud ka insuhu nu keddi.”