1-3  ✡ Imp 19:11; 2Har 24:10-16; 2Kru 36:9-10.Sikeddi si Isikil. Sabeka a ne talagpanubad wey anak a ni Busi. Sabeka a te me Hudiyu ne naddakep ne impanguyan diye te Babilunya. Seeye ne timpu, diya a mig-ugpe te ilis te Weyig ne Kibar, duma te duma ne me dinakep. Te igkalalimma ne aldew, te igkeep‑at ne bulan, te igkatatelu ne pulu (30) ne leg‑un, impanengneng a te Manama wey in-umaan a te Panisingan din, wey nakita ku ne nalukatan ka langit, wey due immakita rin keddi. Neyitabu seeye te igkalalimma ne leg‑un te pegkarakepi ki Hari Huwakim.

4 Te pegtengteng ku, iyan kud e se balisusu ne egpuun te igkahibang ne balabahan, duma te kekepali ne gapun ne nalingutan te egmangilak-ilak. Ne due migpanggeteb ne kilat puun te makepal ne gapun, wey egpekeiling seini te egpangilak-ilak ne burunsi. 5  ✡ Imp 4:6.Ne diye te taliware te gapun, due nakita ku ne hep‑at ne hinimuwan ne eggeheyinawa ne egmekeiling te etew. 6 Piru hep‑at se ulaula wey hep‑at se pakpak te tagse sabeka kandan. 7 Me matul-id se me bubun dan taman te balitekenan. Piru egpekeiling te me paa te baka ka me paa ran, wey egpangilak-ilak seini iling te impasilak ne burunsi. 8 Ne due me belad dan diye te diddiralem te me pakpak dan, diye te katangkaan dan, keinniyuhan, igkakawanan, wey igkahibang. Purisu ka tagse sabeka kandan due me ulaula wey me pakpak. 9 Ne nekegdagket ka me pulipusan te me pakpak dan, wey egmekegdengan sikandan ka eglayang minsan hendei, wey kenad keilangan ne egbaliyung.

10  ✡ Isra 1:5; 10; 10:4; Isi 10:14; Imp 4:7.Hep‑at se me ulaula te tagse sabeka te seini ne me hinimuwan: ka katangkaan, ulaula te etew, ka keinniyuhan, ulaula te agila, ka igkakawanan, ulaula te liyun, wey ka igkahibang, ulaula te turu ne baka. 11 Nenabelat ka tagse daruwa ne pakpak dan, wey nenekegdagket ka me pulipusan te me pakpak dan. Ne ka lein ne daruwa ne pakpak dan, nakabunbun te me lawa ran. 12 Ne minsan hendei sikandan eg-uyana te panisingan, diye iya degma sikandan egpabulus-bulus, wey kenad sikandan keilangan ne egbagkeleng pad te igkakawanan wey ke igkahibang naa.

13  ✡ Imp 4:5.Egmekeiling sikandan te egkalegleg ne baha. Ne due egleug-leug diye te taliware dan ne egpekeiling te egkalegleg ne sulu ne amana ne masil‑ew. Ne puun te seeye ne sulu, due migpanggeteb ne kilat. 14 Ne amana memeiyal ne egmanweil-weil ka seeye ne me hinimuwan; migpabulus wey mig-isues ne egmekeiling de te kilat.

15  ✡ Isi 10:9-13.Ne taheed te migtetengteng a te seeye se hep‑at ne hinimuwan, iyan kud e man‑e se hep‑at ne liggid. Sabeka ne liggid diye te kakiliran te tagse sabeka kandan. Nenakaragket te tane ka seeye ne me liggid. 16 Nenekeg-iling ka hep‑at ne liggid ne egmangilak-ilak iling te mahal ne batu ne egngaranan te kristal. Ne ka tagse sabeka te seeye ne me liggid, egpekeiling te insumbalakan te lein ne liggid ka diye te taliware. 17 Ne egpekeendiye te minsan hendei ka seeye ne me liggid duma te me hinimuwan, wey kenad keilangan ne egbaliyung. 18  ✡ Imp 4:8.Memallayat ka me yantas te me liggid, wey makaliyas-liyas ne egtengtengan su duen ma me mata ne nakalingut. 19 Ne minsan hendei egpabulus ka me hinimuwan, tapik de degma ka me liggid. Ke egparibabew sikandan, egparibabew degma ka me liggid. 20 Diye te seeye ne me liggid ka panisingan te me hinimuwan ne eggeheyinawa. Purisu minsan hendei egpatangke ka panisingan, diye degma ka me liggid. 21 Purisu te tagse timpu ne eggipanew ka me hinimuwan wey ke eglene naa wey ke eglayang, egtapik de iya degma ka me liggid, su ka panisingan ma te me hinimuwan ne eggeheyinawa ka egpaweil te me liggid.

22  ✡ Imp 4:6.Ne diye te ampew-ampew te me ulu te hinimuwan, due me atep‑atep ne egpekeiling te kristal ne egpangilak-ilak, wey kein-inuwan ne egtengtengan. 23 Ne diye te diddiralem te me atep‑atep, nenabelat ka tagse daruwa ne pakpak te me hinimuwan, wey nenekegdagket ka me pulipusan te me pakpak te tagse sabeka kandan. Ne ka lein ne daruwa ne pakpak dan ka nakabunbun te me lawa ran. 24  ✡ Imp 1:4-15; 19:6.Ne emun ke eglayang sikandan, egpekeiling te lehes te dahat ka kahulub te me pakpak dan, wey iling te laheng te Maresen ne Manama, wey te kahulub te susuluhi ne sundalu. Ne emun kenad sikandan eglayang, igpangayepkep dan e man‑e ka me pakpak dan, 25 piru duen pad iya man‑e laheng ne egpuun te atep‑atep ne diye te dibdibabew te me ulu ran.

26  ✡ Isi 10:1; Imp 4:2-3.Ne diye te dibdibabew te atep‑atep, due egpekeiling te trunu ne batu ne egngaranan te sapiru, wey due migpinnuu dutu ne iling te etew. 27  ✡ Isi 8:2.Ne nakita ku ne egpekeiling te burunsi ne eg-ilak-ilak ka puun te liwaraan din peendiye te ulu, wey egpekeiling te egkalegleg ne hapuy ka peendiye te paa. Ne nalingutan sikandin te layag ne sisil-awi amana. 28 Ne ka layag ne nakalingut kandin, egpekeiling te baluntu diye te gapun te timpu ne eg-uran. Iyan seeye ka layag te katelesan te Magbebaye ne Manama. Te pegkakita ku dutu, napeled a te kaaldek, wey due narineg ku ne laheng ne migpakiglalag keddi.