1 Ne impanengneng ad man‑e te Magbebaye ne Manama, 2 “Etew, panagne ka te mareet meyitenged te me prupita te Israil ne migmanagne te egpuun de te suman-suman dan. Kahii nu sikandan te keilangan ne egpammineg te eglalahen ku.”

3 Migkahi ka Magbebaye, “Mekeyid‑u-hid‑u ka egkeyitabu te me ungel ne prupita ne migmanagne de due minsan ware immakita kandan. 4 He keet-etawan te Israil, egmekeiling ka me prupita niyu te me leew ne miyew ne diye te taliware te nagguhus ne siyudad su iyan dan man de igkeupii ne egkaangken ka para te kandan de ne keupianan te ware pegsuman-suman ne sikandan de ka egpuunan te subla pad ne karereetan. 5 Ware dan panpanayi ka keet-etawan. Ware dan ay-ayari ka nagguhus ne matikang wey makepal ne batu ne alad te siyudad te Israil, eyew egmalig‑en seini te timpu te gubut, te aldew ne eggukum ka Magbebaye. 6 Kene ne mallehet ka nenakita ran, wey ubat ka me panagne dan. Migkahi sikandan te egpuun te Magbebaye ka impanlalag dan. Piru ka malehet, ware ku sikandan suhua. Ne migtetahad sikandan ne egkatuman ka impanlalag dan. 7 Kene ne malehet ka nenakita ran ne immakita ku kun kandan, wey ubat ka me panagne dan. Migkahi sikandan te me lalag ku kun seeye, minsan wara a migpakiglalag kandan.

8 “Purisu egkahi a se Magbebaye te egkuntereen ku sikandan, su ubat ka immanlalag dan, wey kene ne mallehet ne due immakita kandan. 9 Egparusaan ku ka me prupita ne migmanagne te ubat, tenged te kene ne malehet ka nenakita ran ne immakita ku kun kandan. Kenad sikandan egpaapilen te punduk te keet-etawan ku, wey kene eglisteen ka me ngaran dan te listaan te me Israilita, wey kene sikandan egpakaseled te tane te Israil. Ne egpekeile e sikandan ne sikeddi ka Magbebaye.

10  ✡ Hir 6:14; 8:11.“Inlaag te ubaten ne me prupita ka keet-etawan ku pinaahi te pegkahi ran ne due keupianan te langun minsan ware. Egpekeiling de te migpasasindeg ka me etew te me alad ne magguye, wey impamulitan de seini te me prupita te linuyang ne apug. 11 Purisu kahii nu sikandan se talagpamulit te egkatempag iya ka alad dan su egpeuranan ku seini te makeseg, duma te derakel ne apiyew. Ne egkasuhat seini te makeseg ne kalamag. 12 Ne emun ke egkatempag ka alad ne batu, egderali-dian e sikandan te me etew te egkahi, ‘Meddag se impulitan ne mania te natempag ded.’ ”

13 Purisu egkahi a se Magbebaye, “Tenged te langet ku, egtempahen ku iya ka alad pinaahi te makeseg ne kalamag, uran, wey te derakel ne apiyew. 14 Egtamtamanan ku te egtempag ka alad ne impulitan dan te apug, taman te egkiteen e ka me pabunsuran kayi. Ne egkabunbunan sikandan wey egkammatey. Ne egpakanengneng e sikandan ne sikeddi ka Magbebaye.

15 “Igpalihawang ku ka langet ku diye te alad ne batu, wey igpaneem-neem ku seini te seeye se migpamulit te apug. Ne igpanengneng ku kaniyu ne warad e ka alad wey nammatey e seeye se migkulit te linuyang ne apug 16 ne iyan ka me prupita te Israil ne migkahi te duen kun keupianan te Hirusalim, minsan ware. Sikeddi se Magbebaye ka miglalag kayi.”

17 Ne migpabulus-bulus ka Magbebaye ne migkahi, “Ne sikeykew etew, pangendiyei nu ka me malitan ne migmanagne te egpuun de te me suman-suman dan. Panagne ka te mareet meyitenged kandan. 18 Kahii nu sikandan te migkahi a se Magbebaye: Mekeyid‑u-hid‑u ka egkeyitabu kaniyu te me malitan ne miggalung te keet-etawan, bate ma wey se buyag pinaahi te pakebel. Immabibinukul niyu sikandan wey immalelangkus te due me pakebel. Igkeupii niyu ne egkahalungan ka keet-etawan ku para te keupianan niyu. 19 Imbaley-baley a nikaniyu diye te tangkaan te keet-etawan ku tenged de te pila-pila ne kemkem ne trigu wey paan. Inggimatayan niyu ka etew ne kene ne eleg ne egpatey, piru ware niyu mule himatayi ka etew ne iyan iya perem eleg ne egpatey, pinaahi te peg-uubat niyu te keet-etawan ku wey migpalintutuu sikandan kaniyu.”

20 “Purisu egkahi a se Magbebaye te kuntere ku iya ka me pakebel ne inggamit niyu te pegpasahap te me etew iling te impandakep ne bayaku. Ne egdereetan ku ka me pakebel niyu, wey igmalihawang ku ka me etew iling te impandakep niyu ne me bayaku. 21 Egpamindasen ku degma ka me langkus niyu, wey egluwasen ku ka keet-etawan ku puun kaniyu, wey kene niyud sikandan egkahalungan te geem niyu. Ne egpakanengneng kew e ne sikeddi ka Magbebaye.

22 “Nalaggew ka me matareng tenged te me peg-uubat niyu, minsan ware ku sikandan laggawa. Ne imbagget niyu nasi ka me maddeet ne kene eg-inniyug te mareet ne hinimuwan dan, su emun ke eg-inniyug sikandan, egkaluwas sikandan puun te kamatayen. 23 Purisu kuntee, egkataman e ka ubat ne hendue te me taheinep niyu wey ka pegpahehane niyu. Egluwasen ku ka keet-etawan ku puun kaniyu. Ne egpakanengneng kew ne sikeddi ka Magbebaye.”