1 Ne migpabulus pad man‑e ka Magbebaye ne Manama ne migkahi, “Te sika ne timpu, egpangaween te me kuntere dan diye te me lebeng ka me tul‑an te me Hari te Huda, te me upisyal, te me talagpanubad, te me prupita, wey te me etew te Hirusalim. 2 Ne egtalagtahen dan e seini eyew egkalayahan te aldew, te bulan, wey te me bituen ne inggeyinawaan dan, impalintutuuwan, impamakey wey insimba ran. Kenad eglibulungen ka me tul‑an dan wey ke iglebeng naa, egkatalagtag de iya seini iling te tei diye te tane. 3 Seeye se egkengasame ne makasesale te seini ne nasud, egpandeldelen ku diye te duma ne inged. Ne igkeupii ran pad ne egpatey e sikandan diye du te egkeuyag. Sikeddiey ka Amana ne Maresen ne Manama ka miglalag kayi.”

4 Ne impakahiyan keddi te Magbebaye ka me etew, “Duen naa etew ne kene egsasindeg ke egpakarugsu? Duen naa etew ne kene eglibed te igbaye din ke egkalaag sikandin te dalan? 5 He matig-Hirusalim, mania te mig-inniyuhan ad e nikaniyu wey ware kew e miglibed? Mania te kene niyu eg-engkeran e ka me diyus-diyus niyu wey eglibed e kayi te keddiey? 6 In-ay-ayaran ku sikaniyu pammineha piru neelin de iya ne ubat ka impanlalag niyu. Warad iya minsan sabeka kaniyu ne mig-inniyug te mareet ne me himu, wey ke nakamaan-maan naa te neyimu rin. Ka tagse sabeka kaniyu, nasi de iya migpabulus te dalan din iling te kudde ne migpallahuy peendiye te giraanan. 7 Kinaa ka me bayaku ne malayat se lieg, me selepati, me kaluhey-luhey, wey me tinggew, egpakanengneng ma ke uras e te peg-uli dan. Nakanengneng degma sikandan ke timpu e te peggalin dan diye te lein ne inged. Piru ka keet-etawan ku, ware nakataha te me balaud ku. 8 Kahiyen niyu buwa ne matagseb kew, wey natahaan niyu ka balaud ku? Ka malehet, imbalbalawan e seini te me ubaten ne talagpanulu te balaud ku. 9 Egkengeyilawan iya ka seeye se migsuman-suman ne me matagseb. Egpekegsendit wey egkasahilut sikandan te keungelan dan ded su mig-inniyuhan dan ma ka lalag ku. Na, matagseb naa iya sikandan? 10 Sikan naa ka igbehey kud ka me asawa ran wey ka me kamet dan diye te duma. Tenged su sikandan langun, puun te me lerew ne me etew peendiye te mabantug, egmaneleppi e pinaahi te limbung, minsan ka me prupita wey me talagpanubad. 11  ✡ Isi 13:10.Imbalahad dan de iya ka pali te keet-etawan ku minsan masumpit e seini. Egkahi re iya sikandan te egkeulian ded ka langun, piru kene ne malehet sika. 12  ✡ Hir 6:12-15.Ne ingkeyilew ran naa ka mallindit ne himu ran? Ware, su ware ma me hilew ran! Sikan naa ka egpatey sikandan iling te duma te timpu ne eglegparan kud e sikandan. Sikeddiey se Magbebaye ne Manama ka miglalag kayi.

13 “Egkeupian a ne eglibulungen ka keet-etawan ku, iling te talagbasuk ne eglimud te nahaani rin. Piru egpekeiling sikandan te paras wey iggira ne ware me behas wey minsan ka me dewun, naggangu e. Sikan naa ka egtuhutan kud e ka me lapu ne eg-ahew te tane dan.

14 “Ne egkahi sikandan, ‘Mania te egpaminpinnuu ki re kayi? Egmangendiye kid e te siyudad ne in-alad te matikang wey makepal ne batu eyew diye kid egpatey, su inggukuman kid e ne eggimatayan te Magbebaye ne Manama ta. Iling de te imbehayan ki nikandin te weyig ne due lanit eyew eg-inumen ta su nakasale ki ma kandin. 15 Mig-iman-iman ki te keupianan piru ware keupianan ne migginguma. Mig-iman-iman ki ne egkeulian ka me dalu ta, piru makaliyas-liyas de iya ka migginguma. 16 Egkarineg tad e ka egmandindineg-ey ne me kudde te me kuntere ta ne egpeendiye te igkahibang ne balabahan te siyudad te Dan. Nangelkel ka nangugpe te intiru ne inged tenged te me kudde ne egmandindineg-ey. Miggendini ka me kuntere eyew egdereet te inged wey te langun de iya—ka siyudad ta wey te langun ne mig-ugpe kayi.’ ”

17 Migkahi pad man‑e ka Magbebaye, “Pammineg kew! Igpeuyan ku ka me kuntere niyu due te kaniyu iling te me uled ne eggilu ne kene niyu egkaamuk te pangaddi, wey egpangahaten kew nikandan.”