1  ✡ Huwil 3:4-8; Amu 1:9-10.Te an-anayan ne aldew te igkarangeb ne bulan te igkasapulu wey sabeka (11) ne leg‑un te pegkarakepi kanami, impanengneng ad man‑e te Magbebaye ne Manama, 2 “Etew, migmanggale-gale ka me matig-Tiru te pegkahuhus te Hirusalim. Migmanguleyi sikandan, ‘Pitawa niyu! Nahuhus lad iya ka nekeelet te egbayaan ta peendiye te duma ne nasud. Ne kuntee warad e egpakabanggew kanta te egnigusyu diye te dapit te igsile wey sikante e degma ka egmatubung.’ ”

3 “Purisu egkahi a se Magbebaye: Egkuntereen ku sikaniyu, he matig-Tiru. Egpalusuran ku sikaniyu te keet-etawan te susuluhi ne nasud, ne egpekeiling e te me bunlud te dahat. 4 Egpanempahen dan ka me matikang wey makepal ne alad niyu ne batu, lagkes ka me matikang ne baley niyu. Ne egpangaliyen ku ka tane taman te batu naan de ka egkasame. 5 Ne egkeyimu e ka Tiru ne iling te maluag ne batu ne dampilanan te me biyale te me mangngengalap diye te dahat. Igbehey ku sikaniyu te duma ne nasud ne eg-ahew te me karatuan niyu. Sikeddi se Magbebaye ka miglalag kayi. 6 Ne egpangimatayan pinaahi te kampilan seeye se nangugpe diye te me bariyu. Ne egpakanengneng kew e ne sikeddi ka Magbebaye.”

7 Ne migpabulus-bulus ka Magbebaye ne migkahi, “Egpalusuran ku sikaniyu ki Nibukadnisar ne Hari te Babilunya, ka amana ne mabantug ne Hari. Eglusud sikandin puun te igkahibang ne balabahan, duma te susuluhi ne sundalu rin, me karwahi, me kudde, wey te egmangudde. 8 Egpangimatayan din pinaahi te kampilan ka nangugpe diye te me sakup niyu ne me bariyu. Ne eglusud ka me sundalu rin ne egmaneterung te me kalasag dan, wey eglingutan dan egpatamunduwi te tane ka me matikang wey makepal ne batu ne alad niyu eyew egpanakerehan dan te eglasud te siyudad niyu. 9 Ne igpepamundul ni Nibukadnisar te derakel ne terusu ka me matikang wey makepal ne alad niyu ne batu, wey igpatempag din ka me matikang ne baley pinaahi te wasey. 10 Ne tenged te susuluhi ne kudde ne egpamallahuy, egkengeelin-elin kew ne alinepung se me matig-Tiru. Egkengaantag ka me matikang wey makepal ne alad niyu ne batu tenged te susuluhi ne karwahi, wey me kudde ne egpamallahuy ne eglasud diye te gumawan. 11 Ne eg-empeten ni Nibukadnisar te egpabaye te me kudde din ka me dalan niyu, wey egpangimatayan kew nikandin pinaahi te kampilan, wey egpanempahen din ka mallig‑en ne sungkaleg niyu. 12 Ne egpangahawen dan ka me karatuan niyu wey ka igmamelegye niyu. Egpangguhusen dan ka me alad niyu ne matikang wey makepal ne batu, wey ka me mateles ne baley niyu. Ne igpandegpak dan e diye te dahat ka me batu, me kayu, wey ka langun ne nagguhus. 13 Egtamanen kud e ka peg-ulahing niyu, wey ka pegparahing niyu te me alpa. 14 Ne eggimuwen kud e ka inged niyu ne egpekeiling te maluag ne batu ne dampilanan te me biyale. Kenad en iya igpakapasasindeg pad ka siyudad niyu. Sikeddi se Magbebaye ka miglalag kayi.”

15 Ne migpabulus-bulus ka Magbebaye ne migkahi diye te me matig-Tiru, “Ke egkatalu kew e, egpangelkelen te liyas ka langun ne nangugpe diye te ilis te dahat, ke egpakarineg e sikandan te deg-uyan te nenapalian, wey te seeye se egkammatey. 16 Ne ka langun ne pangulu te me nasud ne diye te ilis te dahat, egmamaneug te trunu ran, wey egmanluluung te me kumbale dan ne immandayan-dayanan te impaneyi. Ne egpaminnuu sikandan te tane ka egpangelkelen tenged te pegkaaldek dan. 17 Ne egmangulahing sikandan te ulahingen te peglungku para kaniyu ne egkahi,

19 Ne migkahi ka Magbebaye, “Tiru, eggimuwen ku sikeykew ne egpekeiling te inged ne ware mig-ugpe, wey eg-alepen ku sikeykew te dahat. 20 Igpeendiye ku sikeykew te inged te me minatey eyew egpakalemung kad e te me etew te karaan ne timpu. Igpeugpe ku sikeykew diye te diralem te kalibutan, duma te me etew ne migmangendiye te kinariraleman. Ne kene kad e egkeugpaan. 21  ✡ Imp 18:21.Egtamanen kud e sikeykew, wey makaliyas-liyas ka katamanan nu, wey egkaawe kad e. Ne minsan pad egpamitawen ka, kene kad en iya egkakita. Sikeddi se Magbebaye ka miglalag kayi.”