1  ✡ Hir 49:1-6; Isi 21:28-32; Amu 1:13-15; Sup 2:8-11.Ne impanengneng a te Magbebaye ne Manama, 2 “Etew, tangke ka diye te me Amunihanen, wey panagne ka te mareet meyitenged kandan. 3 Kahii nu sikandan te migkahi a se Magbebaye: Tenged te nasi niyu ma ikahale ka pegkahuhus te timplu ku, wey ka pegkeyimu te Israil ne mammara ne inged ne ware mig-ugpe, wey ka pegkarakep te me matig-Huda, 4 igpasakup ku sikaniyu te me etew ne diye nangugpe te igsile, wey egsakupen kew nikandan. Egmangekampu sikandan due te kaniyu. Ne egmangeenen dan e ka me prutas niyu, wey egmanginumen dan e ka me gatas ne egpuun te me baka niyu. 5 Ne eggimuwen kud e ka siyudad te Raba ne panabtaban te me kamil. Ne eggimuwen kud e ka intiru ne tane te Amun ne himelayanan te me karniru wey me kambing. Ne egpakanengneng kew e ne sikeddi ka Magbebaye.

6 “Egkahi a se Magbebaye: Tenged su migpegtagpi kew wey migmanletu-letu te kahale ka eglelemet te Israil te pegkahuhus te inged dan, 7 eglegparan ku iya sikaniyu egpatamtamani, wey igbehey ku diye te duma ne nasud, wey egpangahawen dan ka me karatuan niyu. Egguleen ku sikaniyu se sabeka ne nasud taman te warad egkasame. Ne egpakanengneng kew e ne sikeddi ka Magbebaye.”

8  ✡ Hin 19:36-37; 25:10-12; Hir 48:1-47; Amu 2:1-3; Sup 2:8-11.Ne migpabulus-bulus ka Magbebaye ne migkahi, “Ka me matig-Muwab degma, migkahi ne ka Huda, iling ded te duma ne nasud. 9 Purisu egpalusuran ku ka me siyudad ne diye te eletanan te Muwab, lagkes ka me kasunguwan ne siyudad ne impaambug dan iling te Bit-Hisimut, Baal-Miyun, wey Kiryataim. 10 Ne igpasakup ku degma sikandan te me etew ne diye nangugpe te igsile, duma te me Amunihanen. Ne kenad e eg-isipen ka Amun ne sabeka ne nasud. 11 Te iling due ne paahi, eglegparan ku iya ka me matig-Muwab, wey egpakanengneng e sikandan ne sikeddi ka Magbebaye.”

12  ✡ Hin 25:24-34; 36:39; Hir 49:7-22; Isi 35:1-15; Hir 49:7-22; Ubd 1-14; Mal 1:2-5.Ne migpabulus-bulus ka Magbebaye ne migkahi, “Ka me matig-Idum, migsuli te me matig-Huda, ne tenged due, dakel ka sale te me matig-Idum. 13 Purisu eglegparan ku sikandan egpatamtamani lagkes ka me ayam dan. Eggimuwen kud e ka Idum ne mammara ne inged ne ware mig-ugpe, puun te siyudad te Timan taman te siyudad te Didan, wey egkengammatey te gira ka me mahinged diye. 14 Egsulian ku ka inged ne Idum pinaahi te keet-etawan ku ne me Israilita. Eglegparan dan ka me matig-Idum iling te mangune-kune ne langet ku, wey egpakanengneng e ka me matig-Idum ne sikeddi ka migsuli kandan. Sikeddi se Magbebaye ka miglalag kayi.”

15  ✡ Huwil 3:4-8; Amu 1:6-8; Tal 13:1; 1Sam 4:1.Ne migpabulus-bulus ka Magbebaye ne migkahi, “Insulian patamtamani te me Pilistihanen ka Huda. Migpakannekal sikandan ne egdereetan ka keet-etawan ku tenged te naluhey re ne langet dan. 16 Ne tenged due, eglegparan ku degma egpatamtamani ka me Pilistihanen. Egpangimatayan ku ka me Kiritihanen, wey ka duma pad ne diye nangugpe te ilis te dahat. 17 Igpaneem-neem ku kandan ka makaalat-halat ne pegsuli ku. Ne egpakanengneng e sikandan ne sikeddi ka Magbebaye ke egsulian kud e sikandan.”