30
Ka peglegpad te Manama te Ihiptu
1 Ne impanengneng ad man‑e te Magbebaye ne Manama,
2 “Etew, panagne ka te mareet meyitenged te me matig-Ihiptu. Kahii nu sikandan te migkahi a se Magbebaye:
Pandalawit kew tenged te karereetan ne egginguma kaniyu!
3 Mahaan e ka aldew ne eggukum ka Magbebaye ne Manama.
Ka aldew ne egpaddusilem,
wey egpakasalerep te karereetan ka me nasud.
4 Eglusuran te me kuntere ka Ihiptu,
wey egkabaybayaran degma te masakit ka me matig-Itiyupiya.
Egpangimatayan ka me matig-Ihiptu,
wey egpanguen te duma ne nasud ka me karatuan dan.
Ne egpangguhusen e ka me siyudad dan.
5 “Te sika ne gira, egkammatey ka me matig-Itiyupiya, me matig-Put, me matig-Lud, me matig-Lidya, me matig-Arabya, me matig-Libya, wey ka duma pad ne keet-etawan te me nasud ne migpakigsabeka te Ihiptu.”
6 “Egkahi a se Magbebaye ne Manama:
Egkareetan iya ka langun ne migpakigsabeka te Ihiptu,
wey egkaawe e ka impaambug din ne geem din.
Egpatey ka langun ne mahinged te Ihiptu puun te Migdul taman te Aswan.
7 Te langun ne nasud te intiru ne kalibutan,
ka Ihiptu ka egkeyimu ne mammara ne inged ne warad eg-ugpe,
wey egkatamtamanan e egkallundus ka me siyudad diye.
8 Emun ke egsilaban kud e ka Ihiptu,
wey egpatey e ka langun ne migpakigsabeka te sika ne nasud,
egpakanengneng e ka me matig-Ihiptu ne sikeddi ka Magbebaye ne Manama.
9 “Te seeye kangkuwa ne timpu,
egsuhu a te me suluhuanen ku ne egmanguntud te barku eyew egginalat te me matig-Itiyupiya ne migsuman-suman ne ware mareet ne egkeyitabu kandan.
Ne egkengaaldek ka langun ne matig-Itiyupiya. Egkeyitabu iya sika te kene egkaluhey.”
10 Migpabulus-bulus ka Magbebaye ne Manama ne migkahi,
“Eggamiten ku si Nibukadnisar ne Hari te Babilunya
eyew te pegpangimatey te langun ne matig-Ihiptu.
11 Eggamiten ku sikandin wey ka langun ne mabbulut ne sundalu rin,
eyew te pegdereet te Ihiptu.
Egpangimatayan dan ka langun ne matig-Ihiptu
wey egmekeempet de iya ka me minatey.
12 Ne egpeetiyan ku ka Weyig ne Nilu,
wey igbehey ku ka Ihiptu diye te maddeet ne etew.
Egdereetan ku ka intiru ne Ihiptu pinaahi te me lapu, wey ka langun ne diye.
Sikeddi se Magbebaye ka miglalag kayi.”
13 Ne migpabulus-bulus ka Magbebaye ne migkahi,
“Egpandereetan ku degma ka me larawan te me diyus-diyus diye te siyudad te Mimpis.
Ne warad e egpangulu te Ihiptu,
wey egpanginalatan ku ka langun ne mahinged diye.
14 Eggimuwen ku ne inged ne warad eg-ugpe ka Patrus ne egkariraya te Ihiptu,
wey egsilaban ku ka Suwan ne egkaribabe.
Ne egparusaan ku ka Tibis ne iney ne siyudad te igkakawanan ne balabahan te Ihiptu.
15 Igpaneem-neem ku ka langet ku diye te Pilusiyum,* Te Hibruwanen: Sin.
ka malig‑en ne siyudad te Ihiptu,
wey egpangimatayan ku ka susuluhi ne keet-etawan te Tibis.
16 Egsilaban ku ka Ihiptu,
wey eg-antus ka me matig-Pilusiyum te subla ne masakit.
Egguhusen ku ka matikang wey makepal ne batu ne alad te Tibis
wey layun naan de egkaaldek ka keet-etawan te Mimpis.† Te Hibruwanen: Eglusuran te me kuntere ka Mimpis te maaldew.
17 Egpatey te gira ka me bate-bate pad ne me lukes diye te Un wey Pibisit,
wey egpandakepen ka langun ne duma pad ne keet-etawan te sika ne me siyudad.
18 Ke egdereetan kud e ka Ihiptu, timpu sika ne egpekeiling te delem diye te Tapanhis.
Egkaawe e ka geem ne impaambug te Ihiptu.
Egkabukusan e sikandin te delem,
wey egpandakepen ka me mahinged te langun ne siyudad din.
19 Iling due ka iglegpad ku te Ihiptu.
Te seeye kangkuwa ne timpu, egpakanengneng e sikandan ne sikeddi ka Magbebaye.”
Ka peg-awe te Manama te geem te Hari te Ihiptu
20 Te igkapitu ne aldew, te an-anayan ne bulan, te igkasapulu wey sabeka (11) ne leg‑un te pegkarakepi kanami, impanengneng ad man‑e te Magbebaye ne Manama, 21 “Etew, inggepu kud e ka limang ne belad te Hari te Ihiptu. Ne warad iya minsan sabeka ne migtahik te belad din, wey kenad e sikandin egpakahen-gen te kampilan. 22 Purisu sikeddi se Magbebaye egkuntereen ku ka Hari te Ihiptu. Egpanggepuen ku ka me belad din, eg-ulaten ku ka nahepu e eyew egkalekaan din en iya ka ingkekemkem din ne kampilan. 23 Egmegsusuwayen ku ka me matig-Ihiptu diye te nalein-lein ne me nasud. 24 Ne eglig‑enen ku ka belad te Hari te Babilunya, wey egpahen-genan ku kandin ka kampilan ku. Piru egpanggepuen ku mule ka belad te Hari te Ihiptu, wey egdeg-uy sikandin diye te tangkaan te Hari te Babilunya iling te etew ne tahapali ne mahaan e egkapatey. 25 Eg-awaan ku iya te keseg ka belad te Hari te Ihiptu, piru eglig‑enen ku mule ka belad te Hari te Babilunya. Te timpu ne egpahen-genan kud e te Hari te Babilunya ka kampilan ku wey eggamiten din seini te pegkuntere te Ihiptu, egpakanengneng e ka me matig-Ihiptu ne sikeddi ka Magbebaye. 26 Ne egmegsusuwayen ku ka me matig-Ihiptu diye te nalein-lein ne me nasud. Ne egpakanengneng e sikandan ne sikeddi ka Magbebaye.”