1  ✡ Isa 19:1-25; Hir 46:2-26.Te igkasapulu wey daruwa (12) ne aldew, te igkasapulu (10) ne bulan, te igkasapulu (10) ne leg‑un te pegkarakepi kanami, impanengneng ad man‑e te Magbebaye ne Manama, 2 “Etew, tangke ka diye te nasud te Ihiptu, wey panagne ka te mareet meyitenged kandin, wey te langun ne keet-etawan din. 3 Kahii nu sikandin te migkahi a se Magbebaye: Kuntere ku sikeykew Paraun ne Hari te Ihiptu. Egpekeiling ka te dakel ne buaya ne mig-eeled te Weyig ne Nilu. Migkahi ka te sikeykew ka miggimu te Weyig ne Nilu, wey sikeykew degma ka kamuney. 4 Piru egpananggaten ku ka bake nu, wey egganuyen ku sikeykew diye te gakapan. Ne igmareket ku te me engil nu ka me isda wey egmakatapik e keykew diye te gakapan. 5 Ne igdegpak ku sikeykew wey ka me isda diye te disirtu. Ne egkapatey kad e diye, wey ware eglebeng keykew. Egbalaharen ku re sikeykew ne egkeenen te leew ne me mananap wey me bayaku. 6  ✡ Isa 36:6.Ne egpakanengneng e ka langun ne me matig-Ihiptu ne sikeddi ka Magbebaye ne egpekeyimu te minsan nekey ne eglalahen ku. Su egpekeiling ke man de te tuked ne tibehew ne insalihan te me Israilita. 7 Miggen-gen sikandan keykew piru nahepu ka, wey nenapalian degma ka me pamanayen dan. Migsandig sikandan keykew piru nahepu ka, wey nenapeled degma sikandan wey nenapiulan. 8 Purisu egkahi a se Magbebaye: Egpalusuran ku sikeykew te me etew ne egpangimatey te langun ne keet-etawan nu wey te me ayam nu. 9 Ne egkeyimu e ka Ihiptu ne inged ne ware mig-ugpe. Ne egpakanengneng kad e ne sikeddi ka Magbebaye.

“Ne tenged te migkahi ke ma te sikeykew ka miggimu te Weyig ne Nilu, wey sikeykew degma ka kamuney, 10 egkuntereen ku sikeykew wey ka me weyig nu. Egdereetan ku ka Ihiptu wey egkeyimu e seini ne disirtu, puun te siyudad te Migdul peendiye te siyudad te Aswan taman te eletanan te Itiyupiya. 11 Ne ware etew wey ke leew naa ne mananap ne egbaye te Ihiptu, wey warad iya eg-ugpe diye taman te hep‑at ne pulu (40) ne leg‑un. 12 Eggimuwen kud ka Ihiptu ne mammara ne inged ne ware mig-ugpe, du te langun ne nasud. Egkeyimu e ne subla ne makalelaggew ka me siyudad din tenged te warad eg-ugpe ne minsan nekey taman te hep‑at ne pulu (40) ne leg‑un. Ne egmegsusuwayen kud ka me matig-Ihiptu diye te nalein-lein ne me nasud.”

13 Piru migkahi man‑e ka Manama, “Pegkeimpus te hep‑at ne pulu (40) ne leg‑un, eglibulungen kud ka me matig-Ihiptu puun te nalein-lein ne me nasud. 14 Igpalibed kud e man‑e ka keugpe dengan te Ihiptu. Ne igmalibed kud e man‑e ka me matig-Ihiptu diye te tane te Patrus te egkariraya ne baad te Ihiptu, ka tane ne ugpaan dan mismu. Piru te an-anayan pad ne timpu egmahuye ka migharian te Ihiptu. 15 Eggimuwen ku ka Ihiptu ne subla ne mahuye wey deisek te langun ne migharian, eyew kenad seini egpakapegpeggasal, wey kenad e eghari pad te duma ne nasud. 16 Ne kenad e egsalig pad te Ihiptu ka me Israilita, su egkasuman-suman dan ma ka sale dan ne iyan ka pegsalig dan te Ihiptu. Ne egpakanengneng e ka me Israilita ne sikeddi ka Magbebaye.”

17 Te an-anayan ne aldew te an-anayan ne bulan te igkararuwa ne pulu wey pitu (27) ne leg‑un te pegkarakepi kanami, impanengneng ad man‑e te Magbebaye, 18 “Etew, ka me sundalu ni Nibukadnisar ne Hari te Babilunya, migpakannekal migpakiggira te Tiru taman te warad e me bulbul ran, wey nenallundisan e se me pamanayen dan piru warad iya nenaahew ran puun te Tiru. 19 Purisu egkahi a se Magbebaye te igbehey ku ka Ihiptu ki Nibukadnisar ne Hari te Babilunya. Egkaahew rin e ka langun ne karatuan te Ihiptu, wey igbayad din te me sundalu rin. 20 Igbehey ku kandin ka Ihiptu isip unag din wey te me sundalu rin su migpakannekal ma sikandan ka egpakiggira te Tiru para keddi. Sikeddi se Magbebaye ka miglalag kayi.

21 “Ne te seeye degma kangkuwa ne timpu, eggimuwen ku ne maresen ka me Israilita. Ne egpalalahen kud e man‑e sikeykew diye te kandan eyew egpakanengneng e sikandan ne sikeddi ka Magbebaye.”