1 Ne impanengneng ad man‑e te Magbebaye ne Manama, 2 “Etew, panagne ka te mareet meyitenged te me pangulu te Israil. Kahii nu sikandan te migkahi a se Magbebaye: Me talagtameng te Israil, makabbayad ka egkeyitabu kaniyu su mania te sikaniyu re ka migpanaman migkeen? Himu niyu ma perem ka pegpakeen te me karniru. 3 Impanlape niyu wey impangeen ka mallambeg ne karniru, wey inggimu niyu ne me kumbale ka me bulbul ran, piru ware niyu sikandan tangguwa. 4 Ware niyu tangguwa ka migmemagguye, wey ware niyu pamawii ka migmanderalu. Ware niyu panahika ka nenapiulan, ware niyu imalibed ka nenalleug-leug, wey ware niyu pamitawa ka nenallaag. Nasi niyu re iya sikandan mambaybayari. 5  ✡ Num 27:17; 1Har 22:17; Mat 9:36; Mar 6:34.Purisu nenekegsuwey-suwey e ka me karniru su ware man e talagtameng dan, wey impandawi e sikandan te leew ne me mananap. 6 Nenalleug-leug e ka me karniru ku diye te me bubungan wey me tuhal. Nenekeempet e sikandan te intiru ne kalibutan piru warad iya migpamitew kandan.

7 “Purisu sikaniyu se me talagtameng te me karniru, pammineg kew te iglalag ku kaniyu. 8 Sikeddi se Magbebaye ne ware egpatayan, egpahunlibet a ne eglegparan ku iya sikaniyu su ware niyu ma tamengi ka me karniru ku. Inlulusuran lad iya sikandan wey impandawi te leew ne me mananap. Ware niyud iya sikandan pamitawa, su iyan niyu re insuman-suman ka pegkeetew niyu. 9 Purisu sikaniyu se me talagtameng te me karniru, pammineg kew te iglalag ku kaniyu. 10 Egpakigkuntera a kaniyu te me talagtameng te me karniru. Sikaniyu ka egsenditan ku te neyitabu te me karniru ku, wey kene kud e sikaniyu egpatangguwen pad kandan. Iyan niyu man de nahud insuman-suman ka me pegkeetew niyu. Egluwasen ku ka me karniru ku puun kaniyu, eyew kene niyud sikandan egkakeen.”

11 “Egkahi a se Magbebaye te sikeddi mismu ka egpamitew wey egtanggu te me karniru ku. 12 Iling te sabeka ne talagtameng ne egpamitew te me karniru rin ne nenallaag, egpamitawen ku degma ka me karniru ku. Egluwasen ku sikandan se nenekegsuwey-suwey diye te nalein-lein ne me nasud te timpu te samuk. 13 Igmalibed ku sikandan puun te nalein-lein ne me nasud, wey eglibulungen ku diye te kandan mismu ne tane. Egpepanabtaben ku sikandan diye te me bubungan te Israil, diye te ilis te me sebseb, wey te langun ne inged ne due mahinged. 14 Egpepanabtaben ku sikandan diye te memallambeg-lambeg ne me panabtaban diye te me bubungan te Israil, wey diye sikandan egmangibat-hibat. 15 Sikeddi mismu ka egtameng te me karniru ku, wey egpeyimelayen ku sikandan. Sikeddi se Magbebaye ka miglalag kayi.

16 “Egpamitawen ku ka nenallaag, wey ka nenalleug-leug. Egpanahiken ku ka nenallepuan, wey egtangguwen ku ka magguye. Ne ka me mallambeg wey me maagsik-agsik, egtetamengan ku re. Ne egmakeenen ku sikandan langun ne ware egkaal-alangan.

17 “Ne meyitenged kaniyu te me karniru ku ne me Israilita, eggukuman ku ka tagse sabeka kaniyu. Iglein ku ka me meupiya se lawa puun te nabalbalangan, iglein ku ka me karniru puun te me kambing. 18 Piru ware kew pad neneurali ka egpanabtab te mallambeg ne panabtaban, impandi-diekan niyu pad iya man‑e ka duma ne panabtaban. Eg-inumen niyu ka mating‑ew ne weyig, wey eglebehen niyu ka kene niyu eg-inumen. 19 Egpepanabtaben niyu naa ka duma ne karniru ku te me hilamunen ne impandi-diekan niyu, wey egpeinumen te weyig ne inlebeg niyu?

20 “Purisu egkahi a se Magbebaye te sikeddi mismu ka egmeglein te me mallambeg ne karniru puun te me maggase 21 su egpanduleen man de wey egpanungayen te me mallambeg ne karniru ka me maggase ne karniru taman te egmemakarapig naan de ubag sikandan. 22 Egluwasen ku ka me karniru ku eyew kenad e sikandan egpandawiyen te leew ne me mananap. Iglein ku ka me meupiya se lawa puun te nenallepuan. 23  ✡ Imp 7:17.Ne egteilan kud sikandan te talagtameng ne kabuhalan te suluhuanen ku ne si Dabid. Egtamengan din wey egtangguwen din ka me karniru. 24  ✡ Isi 37:24.Sikeddi se Magbebaye ka egkeyimu ne Manama ran, wey egkeyimu ne pangulu ran ka kabuhalan te suluhuanen ku ne si Dabid. Sikeddi se Magbebaye ka miglalag kayi.

25 “Ne eggimu a te kasabutan duma te keet-etawan ku ne egmeupiye e ka keugpe dan. Egpangalawen ku ka mabbulut ne mananap puun te tane dan, eyew warad igkangilam dan te egmangugpe diye te me disirtu, wey egmanlipereng diye te me puwalas.

26 “Egpanalanginan ku sikandan, wey igpalingut ku igpeugpe sikandan diye te matulus ne bubungan ku. Egpeuyanan ku sikandan te uran te eleg ne timpu. Sika ka me panalangin ku kandan. 27 Ne egpamehas e ka me kayu ran wey ka duma pad ne me pinamula ran, wey egmangugpe e sikandan ne ware igkangilam. Te timpu ne egluwasen kud e sikandan puun te seeye se migmanguripen kandan, egpakanengneng e sikandan ne sikeddi ka Magbebaye. 28 Kenad e sikandan egpanlusuran wey egpangahawan te me karatuan dan te duma ne me nasud, wey kenad e sikandan egpandawiyen te leew ne me mananap. Egmangugpe e sikandan ne mariyu te karereetan, wey warad e igkangilam. 29 Egparakelen ku ka eg-uma te me pinamula ran, eyew kenad e sikandan egmanggutasan, wey kenad e degma egkarali-dian te duma ne me nasud. 30 Ne egpakanengneng e sikandan ne migduma-ruma a kandan, wey egkasabut dan ne keet-etawan ku sikandan. Sikeddi se Magbebaye ka miglalag kayi.

31 “Sikaniyu ka me karniru ku ne diye te panabtaban ku. Sikaniyu ka keet-etawan ku, wey sikeddi ka Manama niyu. Sikeddi se Magbebaye ne Manama ka miglalag kayi.”