1 Ne impanengneng ad man‑e te Magbebaye ne Manama, 2 “Etew, kahii nu ka me duma nu ne me Israilita te migkahi a se Magbebaye, ‘Emun ke egpalusuran kud e te me kuntere ka nasud niyu, keilangan ne eg-alam kew te sabeka kaniyu ne eggimuwen ne talagtameng. 3 Ne emun egkakita rin e ka me kuntere ne eglusud kandan, keilangan ne egparahingen din ka trumpita te pegpaney-paney te keet-etawan. 4 Ne ka seeye se egpakarineg te trumpita piru kene eglinga-linga wey egkeyimatayan te me kuntere, sikandin de iya degma ka egkabasuli te kamatayen din. 5 Ke miglinga-linga pa perem sikandin, egpakapallahuy perem sikandin. 6 Piru ke nakita te talagtameng ka me kuntere ne eggingume e, wey ware sikandin migparahing te trumpita te pegpaney-paney te keet-etawan, wey nataman nakalasud e ka me kuntere wey impangimatayan e ka me etew, ka talagtameng ka egbasulien ku te kamatayen te me etew minsan pad ke migpatey sikandan tenged te me sale dan.’

7 “Sikan naa etew ka in-alam ku sikeykew isip talagtameng te me Israilita. Purisu sikeykew ka egpaney-paney kandan te minsan nekey ne egkarineg nu ne eglalahen ku. 8 Ke egkahiyan ku ka mareet ne etew te egpatey sikandin tenged te me sale din, piru ware nu sikandin panpanayi ne eg-engked te mareet ne hinimuwan din, egpatey iya sikandin piru sikeykew ka egbasulien ku te kamatayen din. 9 Piru ke egpanpanayan nu sikandin wey kene sikandin eg-inniyug te mareet ne hinimuwan din, egpatey iya sikandin tenged te sale din, piru egkaluwas ka mule.”

10 Ne ingkahiyan a te Magbebaye ne Manama, “Etew, iabey nu ihuhud te me Israilita ka ingkahi ran ne miggenendue, ‘Ka me sale ney ka egpuunan ne mig-antus key te kalised wey mahaan key e egpatey. Egmenuwen ney naan pad te egkeuyag?’ 11 Ne kahii nu naa sikandan: Kene egkahale ka Magbebaye ne Manama ke egpatey ka mareet ne etew. Wey re sikandin egkahale ke eg-inniyug te mareet ne hinimuwan ka etew, wey kenad e sikandin egpatey. Purisu engked kew e te mareet ne hinimuwan niyu. Mania iya mule te egkeupian kew ne egpatey me Israilita?

12 “Ne etew, kahii nu ka me duma nu ne me Israilita te ka meupiya ne hinimuwan te etew, kene egpakaluwas kandin ke eggimu sikandin te mareet. Ne ka mareet degma ne etew, kene eglegparan ke eg-inniyug sikandin te mareet ne hinimuwan din. Ne ka pegkamatareng te etew, egkeyimu e ne ware karuan ke eggimu pad sikandin te sale. 13 Ne minsan ke egkahiyan ku ka matareng ne etew te kene sikandin egpatey, piru ke eggimu sikandin te sale su migsuman-suman sikandin ne egkaluwas ded tenged te memeupiya ne hinimuwan din, piru ka malehet, eglingawan ku red iya ka langun ne meupiya ne hinimuwan din. Egpatey red iya sikandin tenged te me sale din. 14 Ne minsan degma ke egkahiyan ku ka mareet ne etew te egpatey sikandin, piru ke eg-inniyug sikandin te mareet ne hinimuwan din, wey eggimu e ke nekey ka eleg wey nekeikul te me balaud, 15 ig-uli din ka gerentiya te nekeutang kandin wey ke tinakew rin naa, wey eg-ikul e sikandin ke nekey ka eleg wey matareng, kene ded sikandin egpatey. 16 Eglingawan kud e ka langun ne sale din wey kene ded sikandin egpatey su miggimu man e sikandin ke nekey ka eleg wey nekeikul te me balaud.

17 “Piru migkahi ka duma nu ne me Israilita, ‘Kene ne eleg ka paahi te Magbebaye ne Manama.’ Piru ka malehet, ka kandan ne me paahi ka kene ne eleg. 18 Ke eg-engked ka matareng ne etew te meupiya ne hinimuwan din, wey nasi e eggimu te mareet, egpatey iya sikandin tenged due. 19 Ne emun degma eg-engked ka mareet ne etew te mareet ne hinimuwan din, wey eggimu e ke nekey ka eleg wey nekeikul te me balaud, kene ded sikandin egpatey. 20 Piru egkahi kew pad iya man‑e te kene ne eleg ka me paahi ku. He keet-etawan te Israil, eggukuman ku ka tagse sabeka kaniyu sumale te me hinimuwan niyu.”

21  ✡ 2Har 25:3-10; Hir 39:2-8; 52:4-14.Te igkalalimma ne aldew, te igkasapulu (10) ne bulan, te igkasapulu wey daruwa (12) ne leg‑un te pegkarakepi kanami, due sabeka ne etew ne nakapallahuy puun te Hirusalim, wey miggendini te keddi ka migpangguhud te migkahi, “Nahuhus e ka siyudad te Hirusalim.” 22 Piru te miglihad ne marusilem, te ware pad miglepew ka etew, in-umaan a te Panisingan te Manama, wey nakalalag ad e man‑e. Purisu te pegginguma te seeye ne etew te maselem, nakalalag ad e.

23 Ne impanengneng a te Magbebaye ne Manama, 24 “Etew, migkekahi ka keet-etawan ne nangugpe diye te nahuhus ne siyudad te Hirusalim, ‘Si Abraham de dengan sabeka piru imbehey kandin ka intiru ne tane. Piru masulug ta mule kuntee, purisu egkaangken tad iya ka seini ne tane.’

25 “Ne kahii nu naa sikandan te migkahi a se Magbebaye ne Manama, ‘Migkeen kew te ngalap lagkes ka langesa, migsimba kew te me diyus-diyus, wey migpangimatey kew te me etew. Ne kuntee, egsuman-suman kew ubag ne egkaangken niyu seini se intiru ne tane? 26 Migsalig kew re te me kampilan niyu. Miggimu kew te me mallindit ne hinimuwan, wey migmanlibug kew. Ne egkahi kew ubag te egkaangken niyu seini se intiru ne tane?’

27 “Sikeddi se Magbebaye, egpahunlibet a ne ka seeye se nenasame ne neuyag ne nangugpe diye te nagguhus ne siyudad, egkammatey red iya man‑e te gira. Ne ka seeye se diye nangugpe te me kamet, egpangimatayan te leew ne me mananap. Ne ka seeye se nangugpe te impalig‑enan ne me siyudad, wey te me sulung, egkammatey te dalu. 28 Eggimuwen kud e ka Israil ne mammara ne inged ne ware mig-ugpe, wey egkataman e ka impaambug dan ne geem dan. Minsan ka me bubungan dan, warad e egmamaye-baye. 29 Ne egpakanengneng e ka keet-etawan te Israil ne sikeddi ka Magbebaye ke egdereetan kud e ka intiru ne nasud dan tenged te langun ne malindit ne hinimuwan dan.”

30 Ne ingkahiyan a te Magbebaye ne Manama, “Etew, migmalalahey meyitenged keykew ka me duma nu ne me Israilita diye te matikang wey makepal ne batu ne me alad te siyudad, wey diye te me gumawan te baley ran. Migmeyinghinggatey sikandan te migkahi, ‘Hendini kew, egpammineg ki te lalag te Magbebaye ne Manama ne igguhud ni Isikil.’ 31 Purisu egmangendue sikandan te keykew ne egluyud isip me keet-etawan ku. Egpamminehen dan ka eglalahen nu piru kene dan seini egtumanen. Egkahi sikandan te inggeyinawaan e kun nikandan, piru ka diye te pusung dan, iyan de ka kandan ne keupianan. 32 Para kandan, egpekeiling ke kun te sabeka ne mangngulahing te ulahingen meyitenged te geyinawa, meupiya se laheng, wey mangngateu ne egparahing te alpa. Egpamminehen dan ka eglalahen nu piru kene dan seini egtumanen. 33 Piru te timpu ne egkatuman e ka impahuhud ku keykew, egpakanengneng e sikandan ne duen bes prupita ne duma ran.”