1 Ne ingkahiyan ad e man‑e te Magbebaye ne Manama, “Etew, panagne ka meyitenged te me bubungan te Israil wey kahii nu te keilangan ne egpammineg sikandan te lalag ku. 2 Migkahi ka Magbebaye ne Manama: Migkekahi ka me kuntere niyu te naangken dan kun e ka karaan ne me bubungan niyu.

3 “Sikan naa etew, kahii nu ka me bubungan te Israil te migkahi a se Magbebaye ne Manama te inlulusuran kew wey in-eangken te me kuntere niyu puun te nalein-lein ne me nasud, wey inlelemetan kew te me etew. 4 Purisu sikaniyu se me bubungan, me labuntud, me napu, me bangalug, me inged ne nahuhus, me siyudad ne neyimu ne mammara ne inged ne ware mig-ugpe wey inlelemetan te me nasud, pammineg kew te eglalahen ku.

5 “Egkahi a se Magbebaye te nalanglangetan a te me nasud, labi en iya ka inged ne Idum ne nahale-gale wey migpanlemet ne mig-ahew te nasud ku ne amana se me panabtaban.

6 “Purisu panagne ka meyitenged te Israil. Kahii nu ka me bubungan, me tuhal, me bangalug wey me napu te migkahi a se Magbebaye: Mig-antus kew te subla ne pegpeyilew kaniyu te me nasud. Purisu nalanglangetan a se Magbebaye, 7 wey igsaad ku ne egkengeyilawan iya degma ka sika ne me nasud. 8 Piru sikaniyu se me bubungan te Israil, egmanubu ka me kayu due te kaniyu, wey egpanusugpang seini wey egpamehas para te keet-etawan ku ne me Israilita su mahaan man e sikandan egmanguli. 9 Egtangguwen ku sikaniyu. Egsihuruwen ku ne egdaruwen kew wey egpamulaan. 10 Ne egpamasuluhen ku ka me Israilita due te kaniyu. Ne egbalbalawan e ka nagguhus ne siyudad wey masulug e man‑e ka egmangugpe ne etew. 11 Egpamasuluhen ku ka me etew wey ka me mananap ne egmangugpe due te kaniyu iling te dengan, wey egmatubungen ku sikaniyu labew pad te dengan ne katubung niyu. Ne egpakanengneng kew e ne sikeddi ka Magbebaye. 12 Ne egmanleug-leug e man‑e due te kaniyu ka keet-etawan ku ne me Israilita. Egkaangken kew e nikandan isip egkapanunud dan, wey kenad e egpatey ka me anak dan te gutas.”

13 Ne migpabulus-bulus ka Magbebaye ne migkahi, “Migkahi ka me etew te duma ne me nasud te impangimatayan niyu kun ka me mahinged due te kaniyu, lagkes ka me bate. 14 Piru puun kuntee, kene niyud egpangimatayan ka me mahinged due te kaniyu lagkes ka me bate. Sikeddi se Magbebaye ka miglalag kayi. 15 Ne kene kew e egpakarineg te duma ne nasud ne egderali-di wey ke egpeyilew naa kaniyu, wey kene kew e degma egkatalu pad nikandan. Sikeddi se Magbebaye ka miglalag kayi.”

16 Ne migpabulus-bulus ka Magbebaye ne migpanengneng keddi, 17 “Etew, inlinditan te me Israilita ka tane dan tenged te maddeet ne hinimuwan dan te diye pad sikandan mig-ugpe. Te suman-suman ku, egpekeiling kalindit ka hinimuwan dan te eglangeseen ne malitan. 18 Purisu impaneem-neem ku kandan ka langet ku tenged te pegpangimatey ran diye te tane te Israil, wey tenged te pegsimba ran te mallindit ne me diyus-diyus ne iyan nakamalindit te tane dan. 19 Impegsuwey-suwey ku sikandan diye te nalein-lein ne me nasud. Inlegparan ku sikandan te eleg te maddeet ne me hinimuwan dan. 20 Piru minsan te diyad sikandan te nalein-lein ne me nasud, napeyilawan dan iya ka matulus ne ngaran ku. Migkekahi nahud ka me etew, ‘Me keet-etawan sikandan te Manama, piru indeldel rin sikandan puun te nasud dan.’ 21 Ne tenged due, amana a nalaggew te matulus ne ngaran ku ne napeyilawan de te keet-etawan ku diye te me nasud ne nangendiyaan dan.

22 “Sikan naa, kahii nu ka me Israilita te migkahi a se Magbebaye: He me Israilita, egpeulien kud e sikaniyu diye te tane niyu. Piru kene ne tenged te eleg kew ne egpeulien, ke kene, tenged te matulus ne ngaran ku ne impeyilawan niyu diye te minsan hendei ne nasud ne nangendiyaan niyu. 23 Igpapitew ku te me nasud ka pegkamatulus wey pegkamabantug te ngaran ku ne impeyilawan niyu. Ne pinaahi te eggimuwen ku kaniyu, egpakanengneng e ka sika ne me nasud ne sikeddi ka Magbebaye te timpu ne igpapitew kud e ka pegmatulus te ngaran ku. Sikeddi se Magbebaye ka miglalag kayi. 24 Eglibulungen ku sikaniyu puun te nalein-lein ne me nasud, wey igmalibed kud e sikaniyu diye te tane niyu mismu. 25 Ne egmapespesikan ku sikaniyu te malinis ne weyig eyew egkalinisan kew e puun te langun ne malindit ne hinimuwan niyu wey te pegsimba niyu te me diyus-diyus. 26  ✡ Isi 11:19-20.Ne egbehayan ku sikaniyu te iyam ne pusung, wey iyam ne suman-suman. Egpanliwanan kud e ka me pusung niyu ne masinupaken te pusung ne matinumanen. 27 Igpeugpe ku due te pusung niyu ka panisingan ku, eyew egmatinumanen kew e te me balaud ku wey me suhu ku. 28 Ne egmangugpe kew e te tane ne imbehey ku te me kabuybuyahan niyu, wey egkeyimu kew e ne keet-etawan ku wey egkeyimu ad e ne Manama niyu. 29 Eglinisan kud e sikaniyu puun te langun ne malindit ne hinimuwan niyu. Ne egpamehayan ku sikaniyu te dakel ne pegkeen eyew kene kew egmanggutasan. 30 Egparakelen ku ka me behas te me kayu niyu wey ka eg-uma te me pinamula niyu. Ne kene kew e eg-antus te gutas ne iyan egpuunan ne impeyilawan kew te duma ne me nasud. 31 Ne egkengasuman-suman niyu ka maddeet ne hinimuwan niyu, ka seyyup niyu, ka me sale niyu, wey ka makalelanget ne me hinimuwan niyu, wey egkaalimedmeran kew e te pegkeetew niyu tenged due. 32 Piru tantanuri niyu ne kene ne para kaniyu ka eggimuwen ku. Keet-etawan te Israil, eleg ne egkeyilew kew tenged te me hinimuwan niyu. Sikeddi se Magbebaye ka miglalag kayi.”

33 Ne migpabulus-bulus ka Magbebaye ne migkahi, “Te timpu ne eglinisan kud e sikaniyu puun te langun ne sale niyu, egpeugpeen kud e man‑e sikaniyu te me siyudad niyu, wey egbalbalawan niyud e man‑e ka me inged niyu ne neyimu ne mammara ne inged ne ware mig-ugpe. 34 Ne ka tane ne mammara ne ware mig-ugpe dengan, egdaruwen e. Ne ka langun ne egpakakita kayi, 35 egpakakahi, ‘Ka mammara dengan ne tane ne ware mig-ugpe, egpekeiling e te pinamulaan te Idin. Ka siyudad dengan ne neyimu ne mammara ne inged ne warad mig-ugpe, duen e me malig‑en ne alad wey neugpaan e.’ 36 Ne ka nenasame ne keet-etawan te me nasud ne nakalingut kaniyu, egpakanengneng e ne sikeddi se Magbebaye ka migpabalew-balew te nagguhus ne siyudad, wey migpepamula te mammara ne tane ne ware dengan ne mig-ugpe. Sikeddi se Magbebaye ka miglalag kayi, wey eggimuwen ku iya ka inlalag ku.”

37 Ne migpabulus-bulus pad iya man‑e ka Magbebaye ne migkahi, “Egpamminehen ku man‑e ka me peg-ampu te me Israilita ne egpamasuluhen ku sikandan ne iling kasulug te me karniru 38 ne impanubad te timpu te me sahakeen diye te Hirusalim. Purisu masulug e man‑e ka egmangugpe ne etew diye te nagguhus ne siyudad. Ne egpakanengneng e sikandan ne sikeddi ka Magbebaye.”