1 Ne hendue te inggenat a te Panisingan te Magbebaye ne Manama, wey in-uyan a diye te dapit te igsile ne gumawan te timplu. Ne due nakita ku ne daruwa ne pulu wey lalimma (25) ne etew diye te gumawan lagkes en iya ka daruwa ne pangulu te keet-etawan ne iyan si Hasaniyas ne anak ni Hasur wey si Pilatiyas ne anak ni Binayas.

2 Ne ingkahiyan a te Magbebaye, “Etew, seini ka me etew ne migsuman-suman te mareet, wey migmanambag te kene ne eleg kayi te seini ne siyudad. 3 Migkahi sikandan, ‘Mahaan e ka eleg ne timpu ne egmamebaley ki. Ware egpakapasakit kanta su ka siyudad ta, egpekeiling te kendiru, wey iling ki te sapu te ngalap ne diye te seled, wey kene ki egkamenu.’ 4 Purisu panagne ka te mareet meyitenged kandan.”

5 Ne in-umaan a te Panisingan te Magbebaye wey impalalag a nikandin te migkahi, “Seini ka ingkahi te Magbebaye: Keet-etawan te Israil, nakanengneng a te insuman-suman niyu. 6 Masulug ka impangimatayan niyu te seini ne siyudad, wey in-empet niyu diye te me dalan ka me minatey.

7 “Purisu egkahi a se Magbebaye: Malehet iya ne ka seini ne siyudad iling te kendiru, piru ka me ngalap, iyan seeye se me minatey. Ne egpandeldelen ku sikaniyu puun te seini ne siyudad. 8 Egkengaaldek kew te gira, piru egpalusuran ku nasi sikaniyu te me kuntere niyu. Sikeddiey se Magbebaye ka miglalag kayi. 9 Egpandeldelen ku sikaniyu puun te seini ne siyudad, wey igparakep ku sikaniyu te me lapu; egparusaan ku sikaniyu pinaahi kandan. 10 Egkammatey kew te gira diye mismu te eletanan te nasud niyu ne Israil. Ne egpakanengneng kew e ne sikeddi ka Magbebaye. 11 Ka seini ne siyudad kene egpekeiling te kendiru para kaniyu, wey kene kew egpekeiling te ngalap diye te kendiru, su egparusaan ku ma sikaniyu diye mismu te eletanan te Israil. 12 Ne egpakanengneng kew e ne sikeddi ka Magbebaye. Eggimuwen ku seini su ware kew ma migtuman te me balaud wey me suhu ku, wey iyan niyud intuman ka me suhu te me nasud ne nakalingut kaniyu.”

13 Ne taheed te migpangguhud a te lalag te Manama, migpatey e si Pilatiyas ne anak ni Binayas. Ne miglangkeb a wey migpanguleyi a te meemen, “He Magbebaye, eg-aminen nu naa te egpangimatey ka nenasame ne Israilita?”

14 Ne impanengneng ad man‑e te Magbebaye, 15 “Etew, ka keet-etawan ne nasame diye te Hirusalim, sikeykew naan de iya ka egkatanuran wey ka me pamilya nu, me karumaan nu wey ka me duma nu te Israilita ne narakep. Migkahi sikandan, ‘Mariyu e te Magbebaye ka naddakep, wey imbehey e te Magbebaye kanta ka seini ne tane.’

16 “Purisu kahii nu ka me duma nu te narakep te seini ka ingkahi te Magbebaye, ‘Minsan immarakep ku wey impegsuwey-suwey ku sikaniyu diye te duma ne me nasud, duma niyu red iya man‑e ka katelesan ku.’

17 “Purisu kahii nu sikandan te migkahi a se Magbebaye, ‘Eglibulungen ku red sikaniyu puun te me nasud ne in-empetan ku kaniyu, wey igbehey ku red kaniyu ka tane te Israil. 18 Ne emun ke egginguma kew e diye te Israil, pangawaa niyu ka langun ne mallindit ne me diyus-diyus diye. 19  ✡ Isi 36:26-28.Ne eggimuwen kud e ne sikeddi naan de ka egpamakayen niyu, wey eggimuwen ku ne iyam ka me suman-suman niyu. Eg-aween kud e ka me makehal ne pusung niyu, wey egliwanan ku te pusung ne maparuma-ruma keddiey. 20 Ne egtumanen niyud ka me balaud ku wey me suhu. Egkeyimu kew e ne keet-etawan ku wey egkeyimu ad ne Manama niyu. 21 Piru egparusaan ku seeye se migsimba te makalelanget ne me diyus-diyus, tenged te mallindit ne me hinimuwan dan. Sikeddi se Magbebaye ka miglalag kayi.’ ”

22  ✡ Isi 43:2-5.Ne imbekal te me kirubin ka me pakpak dan wey migparibabew e puun te tane duma te me liggid ne diye te dangdang dan, wey diye te ampew ran ka katelesan te Manama te Israil. 23 Ne mig-awe puun te taliware te siyudad ka katelesan te Magbebaye, wey diye seini migsanggel te bubungan ne kakiliran te siyudad, dapit te igsile. 24 Ne diye te impakita te Manama keddi, inggenat a te Panisingan, wey impalibed ad diye naddakep ne diye te Babilunya. Ne naawe e ka impakita keddi. 25 Ne impangguhuran kud ka naddakep meyitenged te langun ne impakita keddi te Magbebaye.