1 Ne ingkahiyan ad e man‑e te Magbebaye ne Manama, “Etew, panagne ka te mareet meyitenged ki Gug ka labew ne pangulu te Misik wey Tubal. Kahii nu sikandin te migkahi a se Magbebaye: Egpakigkuntera a keykew Gug. 2 Egtabilengen ku sikeykew, wey egganuyen ku sikeykew puun te mariyu ne inged diye te igkahibang ne balabahan, peendiye te me bubungan te Israil. 3 Ne egpanggepuen ku ka me panganiban nu, wey eg-engkeran kud sikeykew ne warad egpakabulig. 4 Ne egkapatey kad e wey ka me sundalu nu diye te me bubungan te Israil, lagkes ka langun ne migpakigsabeka keykew, wey igpakeen kud e sikaniyu te me manuk-manuk wey me leew ne mananap. 5 Egpatey kew iya diye te me kamet. Sikeddi se Magbebaye ka miglalag kayi. 6 Ne egsilaban ku ka Magug lagkes seeye se me ware igkekangilam ne nangugpe diye te me ilis te dahat. Ne egpakanengneng kew e ne sikeddi ka Magbebaye. 7 Igpeila ku te keet-etawan ku ne me Israilita ne matulus ka ngaran ku, wey kene kud e egtuhutan ne egpeyilawan pad ka ngaran ku. Ne egpakanengneng e ka keet-etawan te me nasud ne sikeddi ka matulus ne Magbebaye ne Manama te Israil.

8 “Tantanuri niyu ne egkeyitabu iya ka ingkahi ku. Sikeddi se Magbebaye ka miglalag kayi. 9 Ne egpanlimuren e te me Israilita ne nangugpe te me siyudad ka me panganiban niyu—ka derakel wey dereisek ne me kalasag, me piet wey me tunud, me lampes wey me kelaab. Ne igpangundul ran e seini taman te pitu ne leg‑un. 10 Ne kenad e keilangan ne egpangayu pad sikandan diye te me kamet, wey me puwalas su iyan dan man e igpangundul ka me panganiban niyu. Egsulian dan e degma egpangahawi te karatuan seeye se migmangahew te karatuan dan. Sikeddi se Magbebaye ka miglalag kayi.”

11 Ne migkahi ka Magbebaye, “Te seeye kangkuwa ne aldew, igbehey ku ki Gug ka bangalug diye te Israil ne egngaranan te Bangalug te Egmangipanew ne diye te igsile wey marani te Namatey ne Dahat isip lebenganan din wey te susuluhi ne me sundalu rin. Dakel seini ne lebenganan ne egpekeelet te egbayaan te seeye se eggipanew. Ne egngaranan e ka seeye ne bangalug te Bangalug te Susuluhi ne me Sundalu ni Gug. 12 Iglelebeng sikandan te keet-etawan te Israil eyew egkalinisan ka tane wey eggingumaan te pitu ne bulan ka peglebeng kandan. 13 Iglelebeng sikandan te susuluhi ne keet-etawan te Israil. Ne egkareyrey ka me Israilita te sika ne timpu te pegpanalu ku wey kene dan en iya sika egkalingawan. Sikeddi se Magbebaye ka miglalag kayi. 14 Ke eglihad e ka pitu ne bulan, due me etew ne egsuhuen ne egleug-leug te intiru ne nasud eyew egpitawen ke duen naan pad me minatey ne ware pad ikalebeng. Ne igpalebeng dan naa seini eyew egkalinisan e ka tane. 15 Ne emun ke due egkakita ran ne tul‑an te etew, egtuusan dan seini eyew egkanengnengan te me talaglebeng wey igpakalebeng dan e seini diye te bangalug ne egngaranan te Bangalug te Susuluhi ne me Sundalu ni Gug. 16 (Due degma marani ne lungsud diye ne egngaranan te Susuluhi ne Etew.)* Te Hibruwanen: ‘Hamuna’. Ne egkalinisan dan en iya ka tane.”

17  ✡ Imp 19:17-18.Ne ingkahiyan a te Magbebaye, “Etew, libulunga nu ka langun ne klasi te me bayaku wey leew ne me mananap diye te bubungan te Israil su egpanubad a diye te pegsahakeen para kandan. 18 Egpangeen sikandan te me sapu wey egpanupsup te langesa te mabbulut ne sundalu wey te me pangulu. Egpekeiling de sikandan te egkekeen te karniru, me baka, wey me kambing ne impalambeg diye te Basan. 19 Te sika ne sahakeen ne eg-andamen ku para kandan, egkengeuralan sikandan ka egpangeen wey egpanginum taman te egkengabulung sikandan wey egkengewubug. 20 Egkengeuralan sikandan ka egpangeen te me kudde, lagkes ka migmangudde, wey ka langun ne mabbulut ne me sundalu. Sikeddi se Magbebaye ka miglalag kayi.”

21 Ne migpabulus-bulus ka Magbebaye ne migkahi, “Igpapitew ku te keet-etawan te langun ne nasud ka kabantug ku, wey egpakanengneng e sikandan te geem ku te peggimu te minsan nekey ne igkeupii ku. 22 Te seeye kangkuwa ne timpu, egpakanengneng e ka me Israilita ne sikeddi ka Magbebaye ne Manama ran te ware egtamanan. 23 Ne egkanengnengan degma te keet-etawan te me nasud ne naddakep ka me Israilita tenged te me sale dan keddi, tenged te ware migtuman sikandan keddi. Imbalahad kud sikandan ne egpanlusuran wey egpangimatayan te me kuntere dan. 24 Inlegparan ku sikandan te eleg te me sale dan, wey imbalahad ku sikandan.”

25 Ne migpabulus-bulus ka Magbebaye ne migkahi, “Piru kuntee, igmalibed kud e ka me Israilita ne kabuhalan ni Hakub, te meupiya ne keugpe dan dengan su neyimenawan ad e kandan, egmatubungen kud e man‑e sikandan eyew egkareyrey ka matulus ne ngaran ku. 26 Ke egmangugpe e ka me Israilita ne ware igkabantali diye te tane dan, egkalingawan dan e ka hilew ne nasalerepan dan tenged te pegsupak dan keddi. 27 Igmalibed ku sikandan diye te me ugpaan dan puun te me nasud te me kuntere dan. Ne egkakite e te keet-etawan te me nasud ka pegkamatulus ku. 28 Ne egpakanengneng e ka me Israilita ne sikeddi iya ka Magbebaye ne Manama ran su minsan immarakep ku sikandan te duma ne me nasud, eglibulungen ku red sikandan diye te tane dan mismu, wey ware minsan sabeka kandan ne egkahaat. 29 Ne kene kud e sikandan egbalaharen wey igbehey ku kandan ka panisingan ku. Sikeddi se Magbebaye ka miglalag kayi.”