1 Te igkasapulu (10) ne aldew, te an-anayan ne bulan, te igkararuwa ne pulu wey lalimma (25) ne leg‑un te pegkarakepi kanami, te igkasapulu wey hep‑at (14) ne leg‑un puun te pegkahuhus te Hirusalim, in-umaan a te Panisingan te Magbebaye ne Manama 2  ✡ Imp 21:10.wey due impakita rin keddi. Te seeye ne impakita keddi, in-uyan a nikandin diye te titikangi ne bubungan te Israil. Te pegtengteng ku diye te igkakawanan ne balabahan, due nakita ku ne egpekeiling te siyudad. 3  ✡ Imp 11:1; 21:15.Ne imparani-rani a te panisingan diye wey due nakita ku ne etew ne eg-ilak-ilak se ulaula iling te burunsi. Migsasindeg ka etew diye te gumawan wey due inggehen-genan din ne daruwa ne igseked. Linu ne lubid ka sabeka, wey kayu ka sabeka.

4 Ne ingkahiyan a te etew, “Etew, pammineg ka. Tengtengi nu ay-ayari ka igpakita ku keykew su sika ka egpuunan ne in-uyan ku sikeykew kayi. Ne ihuhud nu naa te keet-etawan te Israil ka langun ne egkakita nu.”

5  ✡ 1Har 6:1-38; 2Kru 3:1-9.Ne iyan ku nakita se timplu ne nalingut te alad. Ne ingkuwa te etew ka kayu ne igseked ne tatelu ne mitrus se kalayat, wey inseked din ka alad. Tatelu ne mitrus ka katikang dutu, wey tatelu degma ne mitrus ka kakepal. 6 Ne miggendiye te gumawan te alad ka etew wey migtangke diye te igsile. Ne migpamaneyik sikandin te haheran wey inseked din ka me sungkaleg te gumawan ne egpeendiye te lama te timplu, wey tatelu ne mitrus ka katikang dutu. 7 Ne ka tagse kakiliran te bayaanan, due tatelu ne sinabeng te me talagbantey. Kuwadradu ka seeye ne me sinabeng ne tatelu ne mitrus ka kalayat wey ka kaluag. Ne in-alad ka eletanan te tagse sinabeng wey daruwa wey liware te mitrus ka kakepal te seeye ne alad. Ne seup te seeye ne me sinabeng due man‑e bayaanan ne egpeendiye te likansu ne nakatangke diye te timplu. Tatelu ne mitrus se kariyuan te seeye ne bayaanan puun te gumawan peendiye te seled. 8 Ne inseked degma te etew ka likansu, wey hep‑at ne mitrus se kalayat dutu. 9 Ne tighep‑at ne dangew ka kakepal te alad diye te tagse kakiliran te seeye ne bayaanan. 10 Nekeg-iling-iling ka kaluag ka tatelu ne sinabeng te me talagbantey, wey nekeg-iling-iling degma kakepal ka me alad te eletanan te seeye ne me sinabeng.

11 Ne inseked degma te etew ka bayaanan ne egpeendiye te likansu te timplu, hen‑em wey liware ne mitrus ka kaluag dutu. Piru lalimma ne mitrus ka kaluag te gumawan. 12 Ne diye te egkatangkaan te tagse sinabeng te me talagbantey, due alad ne lalimma ne pulu (50) ne sintimitru ka katikang, wey lalimma ne pulu ne sintimitru (50) degma ka kakepal. (Tetelu ne mitrus ka kaluag te me sinabeng.) 13 Ne inseked te etew ka kaluag te intiru ne bayaanan peendiye te lama te timplu, wey daruwa ne pulu wey liware ne mitrus seini. Inseked din seeye puun te kineilisan te atep te sabeka ne sinabeng taman te kineilisan degma te atep te talipag ne sinabeng. 14 Ne inseked din degma ka bayaanan ne egpeendiye te likansu ne nakatangke diye te lama, wey siyam ne mitrus se kariyuan dutu. 15 Ne daruwa ne pulu wey lalimma (25) ne mitrus ka kariyuan puun te katangkaan te bayaanan peendiye te likansu. 16 Ne due ubag mallig-et ne bintana te tagse sinabeng te me talagbantey, wey iling ded degma ka tagse alad te eletanan te tagse sinabeng. Ne due me palmira ne ingkulit diye te seeye ne me alad.

17 Ne in-uyan a te etew diye te lama te timplu. Ne due nakita ku diye ne tatelu ne pulu (30) ne sinabeng diye te ilis te bayaanan ne batu ne impalingut te lama. 18 Ne ka seeye se bayaanan ne batu, nakaseked de te bayaanan ne egpeendiye te seled. Seeye ka diddiralem ne bayaanan ne batu. 19 Ne inseked te etew ka eletanan te bayaanan puun te katangkaan te diddiralem ne gumawan, taman diye te katangkaan te gumawan ne egpeendiye te Matulus wey maluag ne seled te timplu. Ne lalimma ne pulu (50) ne mitrus ka kariyuan dutu.

20 Ne due bayaanan dapit te igkahibang ne balabahan, wey egpeendiye te lama ka seeye ne bayaanan. Ne inseked te etew ka kalayat wey kaluag te seeye ne bayaanan. 21 Ne ka tagse kakiliran te seeye ne bayaanan, due tigtatelu ne sinabeng te me talagbantey. Ne ka me seked te seeye ne me sinabeng, me alad te eletanan, wey ka me likansu, iling ded te seked te bayaanan ne dapit te igsile. Daruwa ne pulu wey lalimma (25) ne mitrus ka kalayat te bayaanan dapit te igkahibang ne balabahan, wey sabeka ne pulu wey daruwa wey liware te mitrus ka kaluag. 22 Ne ka me bintana, me likansu, wey ka ingkulit ne me palmira, iling ded degma te sika se diye te bayaanan ne dapit te igsile. Ne due haheran ne pitu ne ang-ang ne egpatakereg diye te bayaanan, wey due likansu diye te keepusan te seeye ne haheran. 23 Ne diye te igkahibang ne balabahan, due man‑e lein ne bayaanan ne egpeendiye te igkarangeb ne lama* Malig-et seini ne lama diye te egkatangkaan te Matulus ne Sinabeng te timplu. te timplu, iling te bayaanan ne diye dapit te igsile. Ne inseked degma te etew ka kariyuan te seeye se nekegtalipag ne bayaanan, wey lalimma ne pulu (50) seeye ne mitrus.

24 Ne in-uyan a te etew diye te igkakawanan ne balabahan, wey due man‑e nakita ku diye ne bayaanan. Ne inseked din ka likansu wey ka tagse alad diye te kakiliran te seeye ne bayaanan, wey iling ded ka me seked dutu te seeye se duma ne bayaanan. 25 Ne due degma me bintana ne impalingut te seeye ne bayaanan wey likansu iling te duma. Ne daruwa ne pulu wey lalimma (25) ne mitrus ka kalayat te bayaanan, wey sapulu wey daruwa (12) wey liware ne mitrus ka kaluag. 26 Ne due degma haheran ne pitu ne ang-ang ne egpatakereg diye te bayaanan, wey due degma likansu diye te keepusan te seeye ne haheran. Ne due degma alad diye te kakiliran te bayaanan wey ingkulitan degma seeye te me palmira. 27 Ne due degma bayaanan diye te igkakawanan ne balabahan ne egpeendiye te igkarangeb ne lama te timplu. Ne inseked e man‑e te etew ka kariyuan te seeye ne bayaanan taman te bayaanan ne diye te lihawangan, te igkakawanan ne balabahan, wey lalimma ne pulu (50) seeye ne mitrus.

28 Ne in-uyan ad e man‑e te etew diye te igkarangeb ne lama te timplu, wey diye key migbaye te bayaanan te igkakawanan ne balabahan. Ne inseked din e man‑e seeye ne bayaanan, wey iling ded ka me seked dutu te seked te duma ne bayaanan. 29 Ne due degma me sinabeng diye te me talagbantey. Ne ka seked te seeye ne me sinabeng, me alad diye te eletanan, wey te likansu, iling ded degma te seked te duma. Due degma me bintana ne impalingut te bayaanan wey te likansu. 30 Ne ka kalayatan te seeye ne bayaanan, daruwa ne pulu wey lalimma (25) ne mitrus, wey sapulu wey daruwa (12) wey liware ne mitrus ka kaluag. 31 Nakatangke diye te an-anayan ne lama† Maluag seini ne lama ne diye te lihawangan te ikarangeb ne lama. ka likansu dutu. Ne ingkulitan degma te me palmira ka me alad. Ne due haheran ne walu ne ang-ang ne egpatakereg diye te seeye ne bayaanan.

32 Ne in-uyan a te etew diye te maluag ne libulunganan diye te seled dapit te igsile. Ne diye key migbaye te bayaanan dapit te igsile. Ne inseked din ka seeye ne bayaanan, wey iling ded ka seked dutu te seked te duma ne bayaanan. 33 Ne due degma me sinabeng dutu te me talagbantey. Ne ka seked te seeye ne me sinabeng, me alad te eletanan, wey ka likansu, iling ded degma te seked te duma. Ne due degma me bintana ne impalingut te seeye ne bayaanan wey te likansu. Ne ka kalayatan te seeye ne bayaanan, daruwa ne pulu wey lalimma (25) ne mitrus, wey sapulu wey daruwa (12) wey liware ne mitrus ka kaluag. 34 Nakatangke diye te lama ka likansu dutu. Ne ingkulitan degma te me palmira ka me alad. Ne due haheran ne walu ne ang-ang ne egpatakereg diye te seeye ne bayaanan.

35 Ne in-uyan ad e man‑e te etew diye te bayaanan ne dapit te igkahibang ne balabahan. Ne inseked din seeye ne bayaanan, wey iling ded man‑e ka seked dutu te seked te duma ne bayaanan. 36 Ne due degma me sinabeng dutu te me talagbantey. Ne ka seked te seeye ne me sinabeng, me alad te eletanan, wey ka likansu, iling ded degma te seked te duma. Ne due degma me bintana ne impalingut te seeye ne bayaanan wey te likansu. Ne ka kalayatan te seeye ne bayaanan, daruwa ne pulu wey lalimma (25) ne mitrus, wey sapulu wey daruwa (12) wey liware ne mitrus ka kaluag. 37 Nakatangke diye te lama ka likansu dutu. Ne ingkulitan degma te me palmira ka me alad. Ne due haheran ne walu ne ang-ang ne egpatakereg diye te seeye ne bayaanan.

38 Ne due nakita ku ne sinabeng diye te dangdang te gumawan ne dapit te igkahibang ne balabahan. Ne dutu egpanlu‑lui ka egtutungen ne igmanubad. 39 Ne due tigdaruwa ne lamisa diye te tagse kakiliran te bayaanan, wey dutu egpanlapaa ka egtutungen ne igpanubad, ka igpanubad ne iglinis te sale wey ka igpanubad ne igbayad te sale. 40 Ne due degma tigdaruwa ne lamisa diye te tagse kakiliran te haheran ne egpatakereg diye te bayaanan ne dapit te igkahibang ne balabahan. 41 Purisu walu langun ka lamisa ne lapaanan te egtutungen ne igmanubad, hep‑at ka diye te seled wey hep‑at degma ka diye te lihawangan. 42 Ne due degma hep‑at ne lamisa diye ne inggimu puun te insapsapan ne batu. Dutu igpanahu ka me kasangkapan te peglape te egtutungen ne igmanubad wey te duma pad ne igmanubad. Me kuwadradu ka hep‑at ne lamisa, tigtatelu ne dangew wey liware ka kaluag wey kalayat. Ne tigdaruwa ne dangew ka katikang. 43 Ne nakita ku ne impanahu diye te me lamisa ka me ngalap ne egtutungen ne igpanubad. Ne due me sanggatanan ne tigsengerangew se kalayat ne inlingut ipananggat diye te seled.

44 Ne in-uyan a te etew diye te igkarangeb ne lama‡ Malig-et seini ne lama ne diye te egkatangkaan te Matulus ne Sinabeng te timplu. te timplu. Ne due nakita ku diye ne daruwa ne sinabeng. Ka sabeka ne sinabeng, diye te kakiliran te bayaanan ne dapit te igkahibang ne balabahan, wey nakatangke diye te igkakawanan ne balabahan. Ne ka sabeka degma, diye te kakiliran te bayaanan ne dapit te igkakawanan ne balabahan, wey nakatangke diye te igkahibang ne balabahan. 45 Ne ingkahiyan a te etew, “Ka sinabeng ne nakatangke diye te igkakawanan ne balabahan, para te me talagpanubad ne impiyalan te timplu, 46 wey ka sinabeng ne nakatangke diye te igkahibang ne balabahan, para te me talagpanubad ne impiyalan te altar. Me kabuhalan sikandan ni Saduk ne Libita. Ne te langun ne me Libita, sikandan de man‑e ka imbehayan te katenged ne egpakaparani diye te tangkaan te Magbebaye ne Manama eyew te pegpamakey kandin.”

47 Ne inseked te etew ka igkarangeb ne lama§ Malig-et seini ne lama ne diye te egkatangkaan te Matulus ne Sinabeng te timplu. te timplu wey kuwadradu seeye ne nekeg-iling ne tiglalimma ne pulu (50) ne mitrus se kaluag wey kalayat. Ne due altar diye te egkatangkaan te timplu.

48 Ne in-uyan ad e man‑e te etew diye te bayaanan ne paseled te timplu, wey inseked din ka tagse alad diye te tagse kakiliran te bayaanan. Ne pitu ne mitrus ka kaluag wey daruwa wey liware ne mitrus ka kakepal. Ne sabeka wey liware ne mitrus ka kaluag te bayaanan. 49 Ne sapulu ne mitrus ka kalayat te likansu, wey sapulu wey siyam (19) ne dangew ka kaluag. Ne due haheran ne sapulu ne ang-ang ne egpatakereg diye te likansu, wey due me sungkaleg diye te tagse kakiliran te haheran.