1 Ne migkahi ka Magbebaye ne Manama, “Keilangan ne eglekeban ka bayaanan ne dapit te igsile ne egpeendiye te igkarangeb ne lama te timplu,* Malig-et seini ne lama ne egkatangkaan te Matulus ne Sinabeng te timplu. taman te hen‑em ne aldew te pegtrabahu. Piru eglukatan seini te Aldew te Peggimeley, wey te Sahakeen te Pegsile te Iyam ne Bulan. 2 Ne eglasud ka pangulu ne diye egbaye te bayaanan ne dapit te igsile, wey diye sikandin egsasindeg te dangdang te sungkaleg te gumawan. Ne ka me talagpanubad e ka eg-uyan te igmanubad din ne egtutungen, te igmanubad para te keupianan. Ne diye de iya sikandin egsimba te lenged te gumawan. Ne pegkeimpus due, eglihawang e man‑e sikandin. Piru kene eglekeban ka gumawan taman te marusilem. 3 Te tagse Aldew te Peggimeley, wey te Sahakeen te Pegsile te Iyam ne Bulan, keilangan ne egsimba keddi ka me Israilita wey diye de iya degma sikandan te katangkaan te gumawan. 4 Te Aldew te Peggimeley, keilangan ne egpepanubad ka pangulu kayi te keddi te egtutungen ne sabeka ne buyag-buyag e ne lukesan ne karniru, wey hen‑em ne nati ne lukesan ded man‑e ne karniru. Ne keilangan ne ware nabalbalangi ka sika ne me karniru. 5 Ne keilangan ne egpatapikan te liware te saku ne harina ka sabeka ne lukesan ne karniru, me halad sika ne egkakeen ne egpuun te egketuen ne pinamula. Piru ka pangulu e ka mateu ke mamenu karakel ka harina ne igpatapik din te tagse sabeka te hen‑em ne lukesan ne nati te karniru. Ne keilangan degma ne eghalad sikandin te sabeka ne gelun ne lana te ulibu. 6 Te tagse degma Sahakeen te Pegsile te Iyam ne Bulan, keilangan ne egpanubad man‑e ka pangulu te egtutungen ne sabeka ne turu ne baka, sabeka ne buyag-buyag e ne lukesan ne karniru, wey hen‑em ded man‑e ne lukesan ne nati te karniru. Ne keilangan ne ware nabalbalangi ka sika ne me ayam. 7 Ne keilangan ne egpatapikan te pangulu te tigliware te saku ne harina ka sabeka ne turu ne baka, wey ka lukesan ne karniru, me halad sika ne egkakeen ne egpuun te egketuen. Piru sikandin e ka mateu ke mamenu karakel ka harina ne igpatapik din te tagse sabeka te hen‑em ne lukesan ne nati te karniru. Ne keilangan ne egpatapikan te pangulu te tigsabeka ne gelun ne lana te ulibu ka tagse liware te saku ne harina ne igpatapik din te igpanubad ne me ayam. 8 Ke eglasud ka pangulu, keilangan ne diye sikandin egbaye te bayaanan ne egpaseled, wey eglihawang ne diye ded man‑e egbaye.

9 “Ne emun ke eglasud te timplu ka me Israilita eyew egsimba keddi te timpu te nateil ne me sahakeen, ka minsan hentew ne diye egbaye te gumawan ne dapit te igkahibang ne balabahan, keilangan ne diye eglihawang te dapit te igkakawanan ne balabahan. Ne ka diye egbaye te gumawan ne dapit te igkakawanan ne balabahan, diye degma eglihawang te dapit te igkahibang ne balabahan. Keilangan ne ware sabeka ne eglibed egbaye diye te inlasuran din. 10 Keilangan ne egduma re ka pangulu ke egmanlasud wey ke egmanlihawang ka keet-etawan. 11 Te timpu te nateil ne me sahakeen, tigliware te saku ka harina ne igpatapik te turu ne nati te baka, te buyag-buyag e ne lukesan ne karniru, wey te me lukesan ne nati te karniru, me halad sika ne egkakeen ne egpuun te egketuen. Piru ka pangulu e ka mateu ke mamenu karakel ka harina ne igpatapik din te tagse sabeka te me lukesan ne nati te karniru. Te tagse liware te saku ne harina ne igpatapik din te igmanubad ne ayam, keilangan ne egpatapikan din degma te tigsabeka ne gelun ne lana te ulibu.

12 “Ne emun ke egpepanubad ka pangulu te egtutungen wey ke egdasag naa sikandin diye te Magbebaye ne Manama, eglukatan ka gumawan ne diye dapit te igsile eyew egbayaan din. Ne egpanubad sikandin iling te me pegpanubad te Aldew te Peggimeley. Ne emun ke eglihawang e sikandin, eglekeban e man‑e ka gumawan.”

13 Ne migpabulus-bulus ka Magbebaye ne migkahi, “Te tagse aldew, keilangan ne due igpanubad kayi te keddi ne karniru ne sabeka pad ne leg‑un se kabuyahi wey ware nabalbalangi, isip igpanubad ne egtutungen. 14 Ne keilangan ne egpatapikan seini te halad ne egkakeen ne egpuun te egketuen ne pinamula ne hep‑at ne kilu ne harina, wey sabeka ne litru ne lana te ulibu ne ig-amut te harina. Sika ka me suhu meyitenged te egtutungen ne igpanubad ne keilangan ne igpabulus-bulus te ware egtamanan. 15 Purisu tagse maselem, keilangan ne due igpanubad kayi te keddi ne sabeka ne karniru ne egpatapikan te harina, wey lana te ulibu. Sika ka igpanubad ne egtutungen te tagse aldew.”

16 Ne migpabulus-bulus ka Magbebaye ne migkahi, “Emun ke egbehey ka pangulu diye te anak din ne lukes te tane isip karatuan ne iggaat, ka sika ne tane, egkaangken iya te me kabuhalan te anak din te ware egtamanan. 17  ✡ Lib 25:10.Piru ke iyan din egdasahan ka sabeka te me suluhuanen din, egkaangken sika te suluhuanen din piru taman de te Leg-un te Kaligwangan. Ne ka sika ne dasag, egpakalibed ded diye te pangulu. Ka me anak de iya te pangulu ka egkaayun ne eg-angken te sika ne tane te ware egtamanan. 18 Ne kene egkaayun ne egpanguen te pangulu ka tane ne egkapanunud te keet-etawan. Keilangan ne ka tane ne igdasag din te me anak din, sikan de iya se kandin mismu ne tane, eyew ware minsan hentew te keet-etawan ku ne egkaawaan te tane.”

19 Ne in-uyan a te etew diye te matulus ne sinabeng te me talagpanubad ne dapit te igkahibang ne balabahan, wey diye key migbaye te gumawan ne diye te kakiliran te bayaanan. Ne impapitew rin keddi diye te iglineb ne baad ka sinabeng ne ingkahi rin keddi. 20 Ne ingkahiyan a nikandin, “Kayi eggilutua te me talagpanubad ka me halad ne igbayad te sale, ka halad ne iglinis te sale, wey me halad ne egkakeen ne egpakapahale te Magbebaye. Ne kene dan sika eg-uyanen diye te lihawangan, eyew kene egkamenu ka keet-etawan te pegkamatulus te sika ne me halad.”

21 Ne in-uyan ad e man‑e te etew diye te lama, wey impapitew rin keddi ka hep‑at ne pikungan dutu. Ne tagse pikungan, due degma malmalig-et ne lama 22 ne daruwa ne pulu (20) ne mitrus se kalayat, wey sapulu wey lalimma (15) ne mitrus se kaluag. Nenekeg-iling se me karakel dutu. 23 Ne ka tagse lama, impalingutan alara te insapsapan ne me batu. Ne due me temehanan diye te kakiliran te me alad. 24 Ne ingkahiyan a te etew, “Seini ka kusina te me talagpanubad, wey kayi ran eggilutua ka me halad te keet-etawan.”