1 Ne migpabulus-bulus ka Magbebaye ne Manama ne migkahi, “Ne emun egba-baaren niyud ka tane diye te langun ne tribu te Israil, teili a nikaniyu te tane isip meupiya ne dasag para keddi. Sapulu wey daruwa (12) ne kilumitru ka kariyuan, wey sapulu (10) ne kilumitru ka kaluag. Eg-isipen sika ne matulus ne inged. 2 Te sika ne baad te tane, seked kew man‑e te lein ne kuwadradu ne tigdaruwa ne gatus wey lalimma ne pulu (250) ne mitrus se kaluag wey kalayat eyew egpasasindehan te timplu. Ne ka sika ne timplu, teili niyu man‑e palinguti te egmaawangen ne daruwa ne pulu wey lalimma (25) ne mitrus se kaluag. 3 Ne sika se tane ne para keddi, baara niyu man‑e sika—seked kew man‑e te sapulu wey daruwa (12) ne kilumitru se kalayat wey lalimma ne kilumitru se kaluag eyew egpasasindehan te timplu. 4 Sika ka subla ne matulus ne inged wey duen naa egbebalayi ka me talagpanubad ne egpamakey diye te timplu wey egparani keddi. 5 Ne ka katenge ne baad ne sapulu wey daruwa (12) ne kilumitru se kalayat, wey lalimma ne kilumitru se kaluag, igteil sika para te me Libita. Ne sikan e ka eg-ugpaan dan te egpamakey diye te timplu.

6 “Ne diye te dangdang te inteil ne matulus ne inged, seked kew man‑e te tane ne sapulu wey daruwa (12) wey liware ne kilumitru se kalayat, wey tatelu ne kilumitru se kaluag eyew eg-ugpaan te langun ne Israilita.”

7 Ne migpabulus-bulus ka Magbebaye ne migkahi, “Keilangan ne daruwa ne baad te tane ka igteil para te pangulu. Ka sabeka ne baad, egbunsud te iglineb ne eletanan te tane ne para keddi, wey te tane ne eggimuwen ne siyudad peendiye te Dahat ne Miditiranyu. Ne ka dangeb ne baad, egbunsud te igsile ne eletanan te siyudad, peendiye te Weyig ne Hurdan. Ka eletanan ne egbunsud te igsile wey iglineb, nekeg-iling ded se seked te eletanan te tane ne imbaad-baad diye te langun ne tribu te Israil. Sika ka tane ne para te pangulu. 8 Ne kenad e egmanle-leihen te me pangulu ka keet-etawan ku, wey kene dan e eggilabetan pad ka tane ne imbaad-baad e diye te langun ne tribu te Israil.”

9 Ne migpabulus-bulus ka Magbebaye ne migkahi, “He me pangulu te Israil, peen-enengi niyud e ka pegkamabulut niyu wey ka pegpanleig-leig niyu. Himuwa niyud e ka eleg ne peggukum, wey ka keupiya. Peen-enengi niyud ka pegpandelrel te keet-etawan ku. Sikeddi se Magbebaye ka miglalag kayi.

10  ✡ Lib 19:36.“Keilangan ne iyan niyu re eggamiten ka eleg ne timbangan wey sekeranan, wey takesanan ne egngaranan te ipa wey bat.

11 “Keilangan ne egpekeg-iling de ka takes te egtihis wey te mammara. Ka takesanan te mammara iyan ka ipa, wey ka takesanan te egtihis iyan ka bat.

12 “Ne seini ka me takes niyu: Ka sikil ka eleg ne eg-ikulan te pegtimbang. Ka sabeka ne sikil, daruwa ne pulu (20) ne giras, wey ka hen‑em ne pulu (60) ne sikil, sabeka sika ne mina.

13 “Ne seini ka me halad ne keilangan ne igbehey niyu te me pangulu te Israil: Igkeen‑em ne baad te egkahaani niyu ne trigu wey sibada, 14 igkasabeka ne gatus (100) ne baad te lana te ulibu niyu ne iyan egpeikulan te pegtakes ka bat, 15 sabeka ne karniru puun te tagse daruwa ne gatus (200) te me ayam te langun ne Israilita. Sika ka me halad ne egkakeen ne egpuun te egketuen ne pinamula, igmanubad ne egtutungen, wey igmanubad para te keupianan, wey igmalangesa eyew iglinis te sale niyu. Sikeddi se Magbebaye ka miglalag kayi.

16 “Keilangan ne igbehey diye te me pangulu ka langun ne halad te me Israilita. 17 Ne ka me pangulu e degma ka eg-uyan te me halad ne egkakeen wey egkeinum, wey te egtutungen ne igmanubad te me timpu te sahakeen iling te Pegsile te Iyam ne Bulan, Aldew te Peggimeley, wey te duma pad ne me sahakeen ne egtumanen te me Israilita. Ka me pangulu ka egbehey te igmanubad eyew iglinis te sale, te me halad ne egkakeen, te egtutungen ne igmanubad, wey te igmanubad para te keupianan, wey te igmalangesa ne iglinis te sale te me Israilita.”

18 Ne migpabulus-bulus ka Magbebaye ne migkahi, “Te an-anayan ne aldew, te an-anayan ne bulan, lape kew te turu ne nati te baka ne ware nabalbalangi eyew igpanubad isip iglinis te timplu. 19 Ne egkuwa ka talagpanubad te deisek ne langesa, wey egpunasan din ka me sungkaleg te gumawan te timplu, ka hep‑at ne pikungan te altar, wey ka me sungkaleg te bayaanan diye te igkarangeb ne lama te timplu.* Malig-et seini ne lama ne diye te egkatangkaan te Matulus ne Sinabeng te timplu. 20 Te igkapitu ne aldew, te sikan ded ne bulan, iling ded man‑e due ka eggimuwen niyu para te minsan hentew ne nakasale te ware tuyui. Te sika ne paahi, egkalinisan niyu ka timplu.

21  ✡ Iks 12:1-20; Num 28:16-25.“Ne sahakeen kew te Peglihad te Panalihan te igkasapulu wey hep‑at (14) ne aldew te sikan ded ne bulan. Himuwa niyu sika te pitu ne aldew, wey iyan niyu re keena ka paan ne ware igpatulin. 22 Te an-anayan ne aldew te pegsahakeen niyu, egpalape te turu ne baka ka pangulu eyew iglinis te sale din mismu wey te sale te langun ne Israilita. 23 Ne tagse aldew seled te pitu ne aldew ne pegsahakeen niyu, keilangan ne ka pangulu, egpepanubad te egtutungen ne pitu ne turu ne nati te baka wey pitu degma ne lukesan ne karniru ne neelin ne ware nabalbalangi. Ne egpepanubad man‑e sikandin te sabeka ne lukesan ne kambing eyew iglinis te sale. 24 Ne ka tagse turu ne nati te baka wey lukesan ne karniru ne igpanubad, keilangan ne egpatapikan te halad ne egkakeen ne egpuun te egketuen ne pinamula, wey sabeka ne gelun ne lana te ulibu. Me halad sika ne egpakapahale keddi.

25  ✡ Lib 23:33-36; Num 29:12-38.“Te igkasapulu wey lalimma (15) ne aldew ne iyan ka pegbunsud te Sahakeen te me Leeb te iyan ded ne bulan, keilangan ne egpepanubad man‑e ka pangulu te iling ded te immepanubad din te pitu ne aldew te Peglihad te Panalihan iling te me halad te peglinis te sale, igmanubad ne egtutungen, wey lana te ulibu.”