1 Ne seini ka me tribu te Israil, wey ka tane ne egkaangken dan. Ka hun‑a, iyan ka me kabuhalan ni Dan. Ne dapit te igkahibang ne balabahan ka kandan ne tane. Ne ka eletanan dutu, egbunsud te Hitlun, peendiye te Libu-Hamat, taman te Hasar-Inan ne marani te eletanan te Damasku wey te Hamat ne diye te igkahibang ne balabahan. 2 Ne ka seup, iyan ka me kabuhalan ni Asir. Ne dapit te igkakawanan ne balabahan ka tane dan. Ne ka eletanan dutu, egbunsud te igsile ne baad te tane te me kabuhalan ni Dan, peendiye te iglineb. 3 Ne ka seup, iyan ka me kabuhalan ni Naptali. Ne ka tane dan, dapit te igsile ne baad te tane te me kabuhalan ni Asir. Ne ka kaluag dutu, egbunsud degma te igsile peendiye te iglineb. 4 Ne ka seup, iyan ka me kabuhalan ni Manasis. Ne ka tane dan, dapit te iglineb ne baad te tane te me kabuhalan ni Naptali. Ne ka kaluag dutu, egbunsud ded degma te igsile peendiye te iglineb. 5 Ne ka seup, iyan ka me kabuhalan ni Ipraim. Ne ka tane dan, dapit te igsile ne baad te tane te me kabuhalan ni Manasis. Ne ka kaluag dutu, egbunsud ded degma te igsile peendiye te iglineb. 6 Ne ka seup, iyan ka me kabuhalan ni Rubin. Ne ka tane dan, dapit te igsile ne baad te tane te me kabuhalan ni Ipraim. Ne ka kaluag dutu, egbunsud ded degma te igsile peendiye te iglineb. 7 Ne ka seup, iyan ka me kabuhalan ni Huda. Ne ka tane dan, dapit te igsile ne baad te tane te me kabuhalan ni Rubin. Ne ka kaluag dutu, egbunsud ded degma te igsile peendiye te iglineb.

8 Ne ka tane ne diye te igsile ne baad te tane te me kabuhalan ni Huda, keilangan ne igteil niyu isip dasag para te Magbebaye ne Manama. Kuwadradu seini ne nekeg-iling se kalayat wey kaluag ne tigsapulu wey daruwa (12) ne kilumitru. Iling ded seini kaluag te tane te sabeka te me tribu te Israil. Ne ka taliware te sika ne tane ka egpasasindehan te timplu.

9 Ne sapulu wey daruwa (12) ne kilumitru se kalayat wey lalimma ne kilumitru se kaluag te tane ne igbehey niyu te Magbebaye eyew egpasasindehan te timplu. 10 Ne igbehey diye te me talagpanubad ka katenge te sika ne tane. Puun te igsile peendiye te iglineb, sapulu wey daruwa (12) ne kilumitru se kalayat, wey lalimma ne kilumitru se kaluag puun te igkahibang ne balabahan peendiye te igkakawanan ne balabahan. Ne diye naa te taliware te sika ne tane ka egpasasindehan te timplu. 11 Ka sika se matulus ne tane, igbehey diye te me talagpanubad ne iyan ka me kabuhalan ni Saduk ne me matinumanen mule ne migpamakey wey ware mig-engked keddi. Kene ne iling te inggimu te duma ne me Libita ne mig-ikul te me Israilita ne mig-engked keddi. 12 Sika ka amana ne matulus ne tane, wey eleg ne dasag para te me talagpanubad ne me kabuhalan ni Saduk. 13 Dangdang sika te tane te duma ne me Libita ne sapulu wey daruwa (12) ne kilumitru se kalayat wey lalimma ne kilumitru se kaluag. 14 Ne keilangan ne kene dan igbelegye sika wey ke igsaliyu naa ka minsan deisek ne baad due su inteil ma sika para te Magbebaye.

15 Ne ka baad te tane ne sapulu wey daruwa (12) degma ne kilumitru se kalayat wey daruwa wey liware ne kilumitru se kaluag, sika ka egkaayun ne eg-ugpaan te langun ne etew wey panabtaban te me ayam dan. 16 Ne diye naa te taliware ka siyudad ne kuwadradu ne tigdaruwa ne kilumitru se kalayat wey kaluag. 17 Ne egpalingutan ka siyudad te lama ne kuwadradu ne nenekeg-iling se kaluag wey kalayat ne 125 ne mitrus. 18 Ne diye te nasame ne baad te nekegtalipag ne lihawangan te siyudad, due kamet ne lalimma ne kilumitru se kalayat peendiye te igsile, wey lalimma degma ne kilumitru peendiye te iglineb. Ka eg-uma te sika ne kamet ka egkeenen te me trabahanti diye te siyudad. 19 Iyan egtrabahu te sika ne kamet ka me mahinged te siyudad ne egpuun te langun ne tribu te Israil. 20 Purisu keilangan ne kuwadradu ne tigsapulu wey daruwa (12) ne kilumitru se kaluag wey kalayat te intiru ne tane ne igteil niyu para te Magbebaye, lagkes e ka matulus ne tane wey ka siyudad.

21 Ka nasame ne baad te tane ne nekegtalipag te tagse kakiliran te matulus ne tane wey te siyudad, egkaangken e te pangulu. Egbunsud sika te matulus ne tane peendiye te eletanan dapit te igsile wey peendiye te eletanan dapit te iglineb. 22 Egkataliware te tane te pangulu ka matulus ne tane, ka timplu, ka tane te me Libita wey ka siyudad. Ne egkataliware degma te tane te me kabuhalan ni Huda wey ni Binhamin ka nekegtalipag ne tane te pangulu.

23 Ne seini degma ka tane ne egkaangken te duma ne tribu. Ka tane ni Binhamin, diye dapit te igkakawanan ne balabahan te tane te pangulu. Ka kaluahan due, egpuun te igsile peendiye te iglineb ne baad te tane te Israil. 24 Ne diye te igkakawanan ne balabahan te tane te me kabuhalan ni Binhamin, iyan ka tane te me kabuhalan ni Simyun. Ka kaluahan dutu, egpuun ded degma te igsile peendiye te iglineb ne baad te tane te Israil. 25-27 Ne ka seup ne tane, iyan ka tane te me kabuhalan ni Isakar, ni Sabulun, wey ni Gad. Ne ka me kaluahan dutu, egpuun ded man‑e te igsile peendiye te iglineb ne baad te tane te Israil. 28 Ne ka diye te igkakawanan ne balabahan ne eletanan te tane ni Gad, egpekeikul te Tamar taman diye te me sebseb te Kadis-Miriba, peendiye te Ihiptu taman diye te Dahat ne Miditiranyu.

29 Sika ka tane ne egkaangken te me tribu te Israil isip egkapanunud dan. Sikeddi se Magbebaye ka miglalag kayi.

30  ✡ Imp 21:12-13.Ne due sapulu wey daruwa (12) ne gumawan te siyudad. Te hep‑at ne alad ne impalingut te siyudad, due tigtatelu ne gumawan. 31 Ka gumawan ne dapit te igkahibang ne balabahan, egngaranan te Gumawan ni Rubin, Gumawan ni Huda, wey Gumawan ni Libi. 32 Ne ka gumawan ne dapit te igsile, egngaranan te Gumawan ni Husi, Gumawan ni Binhamin, wey Gumawan ni Dan. 33 Ne ka gumawan ne dapit te igkakawanan ne balabahan, egngaranan te Gumawan ni Simyun, Gumawan ni Isakar, wey Gumawan ni Sabulun. 34 Ne ka gumawan ne dapit te iglineb, egngaranan te Gumawan ni Gad, Gumawan ni Asir, wey Gumawan ni Naptali. 35 Ka katikangan te tagse alad, 2,250 ne mitrus. Purisu siyam ne libu (9,000) ne mitrus ka langun ne katikangan te hep‑at ne alad. Ne puun te sika ne timpu, egngaranan e ka siyudad te, “Due ka Magbebaye ne Manama.”