1 Peglihad te me leg‑un, te peghari ni Artasirsis te Pirsya, due sabeka ne etew ne egngaranan ki Isra. Anak sikandin ni Sirayas, ne anak ni Asariyas ne anak ni Hilkiyas, 2 ne anak ni Salum ne anak ni Saduk, ne anak ni Ahitub, 3 ne anak ni Amariyas, ne anak ni Asariyas ne anak ni Mirayut, 4 ne anak ni Sirahiyas, ne anak ni Usi, ne anak ni Buki, 5 ne anak ni Abisuwa, ne anak ni Pinihas, ne anak ni Iliyasar, ne anak ni Aarun, ka Labew ne Talagpanubad.

6 Seini si Isra, mig-uli diye te Hirusalim puun te Babilunya. Mangngateu sikandin ne talagpanulu te Balaud ni Muwisis, ka Balaud ne imbehey te Magbebaye ne Manama, ka Manama te Israil. Ne imbehey te Hari ka langun ne imbuyu din, tenged su inlapihan sikandin te Magbebaye ne Manama, ne Manama rin. 7 Te igkapitu ne leg‑un te pegmandu ni Hari Artasirsis, due me Israilita ne nanguli duma ki Isra, duma te me talagpanubad, me Libita, me mangngulahing, me talagtameng te gumawan te timplu, wey me suluhuanen diye te timplu. 8-9 Migligkat si Isra puun te Babilunya te an-anayan ne aldew te an-anayan ne bulan. Ne tenged su imbulihan sikandin te Manama, migginguma sikandin te Hirusalim te an-anayan ne aldew te igkalimma ne bulan, te igkapitu ne leg‑un te peghari ni Artasirsis. 10 Amana egkeupian si Isra ne egnengneng te Balaud te Magbebaye ne Manama, egtuman kayi, wey egpanulu te me suhu din wey te me balaud diye te me Israilita.

11 Seini ka sulat ne imbehey ni Hari Artasirsis ki Isra ne talagpanubad wey talagpanulu, ka etew ne mangngateu te me balaud wey me suhu te Magbebaye ne Manama para te me Israilita. Miggenendue ka sulat:

12 “Ka seini ne sulat, egpuun ki Artasirsis, ka Hari te me Hari, peendiye ki Isra, ka talagpanubad wey talagpanulu te Balaud te Manama ne diye te langit:

13 “Ne kuntee, egsuhu a ne ka minsan hentew ne Israilita kayi te migharian ku, lagkes ka me talagpanubad wey ka me Libita, ne egkeupian ne egduma keykew diye te Hirusalim, egkaayun e ne egduma. 14 Sikeddiey wey ka pitu ne talagtambag ku, egsuhu keykew eyew te peg-ugsi-ugsi diye te Huda wey te Hirusalim ke intuman dan naa ka me balaud ne imbehey keykew te Manama nu. 15 Ne uyana nu degma ka me pelata wey me bulawan ne igdasag ney diye te Manama te Israil ne mig-ugpe te Hirusalim, 16 duma te langun ne pelata wey bulawan ne egkalimud nu puun te prubinsya te Babilunya, wey ka me dasag te me Israilita, wey te me talagpanubad, para te timplu te Manama ran diye te Hirusalim.

17 “Ilehet-lehet nu ibeli ka seini ne seleppi te turu ne me baka, lukesan ne me karniru, wey nati ne me karniru, duma te me halad ne egkakeen wey egkeinum. Imanubad nu ka me ayam diye te altar te timplu te Manama nu ne diye te Hirusalim. 18 Ne ka nenasame ne bulawan wey pelata, kaayun ne eggamiten nu wey te duma nu, te minsan nekey ne meupiya ne egkahamitan ne igkeupii te Manama niyu. 19 Piru uyana nu diye te tangkaan te Manama te Hirusalim ka langun ne kasangkapan ne impiyal keykew ne egkaayun ne eggamiten te pegsimba diye te timplu te Manama nu. 20 Ne emun ke duen pad minsan nekey ne egkeilanganen para te timplu te Manama nu, egkaayun ne egkuwa ka te seleppi diye te talaggen-gen te seleppi te Hari.

21 “Ne kuntee, sikeddiey si Hari Artasirsis, migsuhu kaniyu te langun ne talaggen-gen te seleppi te prubinsya ne diye te talipag te Weyig ne Iyupratis: Ne keilangan ne igbehey niyu ka minsan nekey ne egbuyuen kaniyu ni Isra ne talagpanubad wey talagpanulu te Balaud te Manama ne diye te langit. 22 Ne ibehey niyu kandin taman te tatelu ne libu wey hep‑at ne gatus (3,400) ne kilu ne pelata, daruwa ne gatus (200) ne saku ne trigu, 550 ne gelun ne binu, 550 ne gelun ne mentika te ulibu, wey asin ne minsan mamenu karakel. 23 Ne himuwa niyu ka minsan nekey ne igpeyimu te Manama ne diye te langit para te timplu rin, eyew kene din igkabelu ka intiru ne migharian ku wey ka me anak ku ne lukes ne egsubal eghari keddi. 24 Ne egpanengnengen ku sikaniyu ne ware katenged niyu ne egsukut te buhis te me talagpanubad, te me Libita, te mangngulahing, te me talagtameng te gumawan te timplu, te me suluhuanen te timplu wey te duma pad ne miggimu te seini se timplu te Manama.

25 “Ne sikeykew, Isra, sumale te katagseb ne naangken nu puun te Manama nu, alam ka te me talewukum eyew iyan eggukum te langun ne etew te prubinsya ne diye te talipag te Weyig ne Iyupratis ne nakanengneng te Balaud te Manama nu. Ne panulua nu ka minsan hentew ne ware nakanengneng kayi. 26 Ne ka minsan hentew ne kene egtuman te Balaud te Manama nu wey te balaud te Hari, due-rue ne egdusaan sikandin. Ne egkaayun ne eggimatayan sikandin wey ke egpaaween naa te inged din, wey ke eg-ahawan naa sikandin te karatuan din, wey ke egprisuwen naa.”

27 Ne migkahi si Isra, “Egdayanen ka Magbebaye ne Manama, ka Manama te kaap-apuan ta, ne iyan migpuwas te suman-suman te Hari te pegpeupiya te timplu te Magbebaye ne Manama diye te Hirusalim. 28 Ne tenged te geyinawa ne kene egkabalbalawan te Magbebaye ne Manama keddi, in-upianan a te Hari wey te me talagtambag din, lagkes ka me maddesen ne me upisyal rin. Ne tenged te peglapig man‑e te Magbebaye ne Manama, nakaangken a te kabulut te peglibulung te me pangulu te me Israilita ne egduma keddi diye te Hirusalim.”