1 Sikan naa ka migsuhu e si Hari Daryu ne egsusiyen ka me sinulat ne diye te tahuanan kayi diye te Babilunya. 2 Ne diye nakita ka eglulunen ne baseen te Ikbatana, ka iney ne siyudad te prubinsya te Midiyan, wey kayi nasulat ka seini ne suhu:

3 “Te an-anayan ne leg‑un te peghari ni Siru, miggimu sikandin te suhu ne egbalbalawan te egpasasindeg ka timplu te Manama diye te natahuan dengan kayi diye te Hirusalim eyew diye eghalad wey egtutung te igmanubad. Ne keilangan ne siyam ne pulu (90) ne mitrus ka kalayat kayi wey siyam ne pulu (90) degma ne mitrus ka kaluag, 4 wey ka tagse tatelu ne impeg-ampew ne derakel ne me batu, eg-ampawan te kayu. Ne ka eggastuwen ne seleppi, diye eg-angaya te tahuanan te seleppi te Hari. 5 Ne ka bulawan wey ka pelata ne me kasangkapan te timplu te Manama ne in-uyan ni Hari Nibukadnisar diye te Babilunya, keilangan ne ig-uli ded diye te nenatahuan kayi diye te timplu te Hirusalim.”

6 “Ne kuntee, sikeykew Tatinay ne gubirnadur te prubinsya ne due te talipag te Weyig ne Iyupratis, Sitarbusinay, wey te duma niyu ne me upisyal te prubinsya ne talipag te Weyig ne Iyupratis:

“Awe kew due! 7 Kene niyu balabahi ka peggimu te seini se timplu te Manama. Balahara niyu re due ka gubirnadur wey ka me igbuyag te me Hudiyu ne egbalew-balew egpasasindeg te timplu te Manama diye te natahuan ded dengan kayi. 8 Timul pad due, egsuhu a kaniyu ne bulihi niyu ka me igbuyag te me Hudiyu te pegbalew-balew pegpasasindeg te timplu te Manama wey kene niyu lamlamuwi ka pegbayad kandan. Ne diye egpuun te me buhis ne nalimud te prubinsya ne diye te talipag te Weyig ne Iyupratis ka igbayad kandan, eyew kene egkaangge ka himu. 9 Ne minsan nekey ne egkeilanganen te me talagpanubad diye te Hirusalim, iling te me turu ne nati ne baka, me lukesan ne karniru, wey ke nati te karniru, eyew igmanubad diye te Manama ne diye te langit, wey ke trigu naa, asin, binu, wey lana, keilangan ne aldew-aldew ka pegbehey kandan, 10 su eyew egpakapanubad sikandan te igkahale te Manama ne diye te langit, wey ig-ampu dan ka umul ku wey ka me anak ku ne lukes. 11 Egsuhu a degma ne ke due etew ne egsupak te seini ne suhu, eglagnuten ka kayu ne intangen diye te baley rin wey igsundang seini kandin, wey egdereetan e ka baley rin. 12 Eglegparan perem te Manama ne iyan mig-alam te Hirusalim isip sabeka ne inged ne egsimbaan kandin, ka minsan hentew ne Hari wey ke keet-etawan naa ne eg-uney-uney egsupak te seini ne suhu, wey ke egguhus naa te timplu te Manama ne diye te Hirusalim. Sikeddiey si Daryu ka migsuhu kayi, keilangan ne egtumanen iya seini.”

13 Ne intuman iya ka suhu ni Hari Daryu enni Tatinay ne gubirnadur te prubinsya diye te talipag te Weyig ne Iyupratis, ni Sitarbusinay, wey te me duma ran. 14  ✡ Hag 1:1; Sak 1:1.Sikan naa ka migpabulus ka pegbalew-balew pegpasasindeg te timplu wey miglampus ka me igbuyag te me Hudiyu tenged te pegbagget ni prupita Hagiyu wey ni prupita Sakariyas ne anak ni Idu. Neimpusan dan te egbalew-balew te egpasasindeg ka timplu sumale te suhu te Manama te Israil wey te balaud te me Hari te Pirsya ne ensi Siru, si Daryu, wey si Artasirsis. 15 Neimpusan ka timplu te igkatelu ne aldew te igkasapulu wey daruwa ne bulan ne iyan ka Adar, te igkeen‑em ne leg‑un te peghari ni Daryu.

16 Ne miggale-gale te pegsahakeen te peghalad te timplu te Manama ka me Israilita, duma te me talagpanubad, me Libita, wey te duma ran ne nekeuli puun te pegkarakep. 17 Te seini ne peghalad te timplu, migpanubad sikandan te sabeka ne gatus (100) ne turu ne nati ne me baka, daruwa ne gatus (200) ne lukesan ne me karniru, wey hep‑at ne gatus (400) ne nati ne me karniru. Migbehey degma sikandan te sapulu wey daruwa (12) ne turu ne me kambing isip igmanubad te peglinis te sale te me Israilita sumale te kasuluhan te tribu te Israil. 18 Inteil ran degma ka me talagpanubad wey ka me Libita para te pegpamakey te timplu te Manama diye te Hirusalim, sumale te nasulat te libru ni Muwisis.

19  ✡ Iks 12:1-20.Te igkasapulu wey hep‑at (14) ne aldew te an-anayan ne bulan te egsinundul ne leg‑un, migsahakeen te Peglihad te Panalihan ka nekeuli puun te pegkarakep. 20 Immatulus te me talagpanubad wey te me Libita ka pegkeetew ran wey migmalinis e sikandan langun diye te tangkaan te Manama. Sikan naa, miglape sikandan te nati ne me karniru te Pegsahakeen te Peglihad te Panalihan para te langun ne nekeuli puun te pegkarakep, wey para te duma ran ne me talagpanubad, wey para te pegkeetew ran. 21 Ingkeen seini te me Israilita ne nekeuli puun te pegkarakep, duma te langun ne ware mig-apil-apil te mareet ne hinimuwan te keet-etawan ne ware migpalintutuu te Manama. In-engkeran dan e ka seeye ne me himu eyew egpamakey e te Magbebaye ne Manama, ka Manama te Israil. 22 Nahale amana sikandan te Sahakeen te Paan ne ware Patulin seled te pitu ne aldew. Impahale sikandan te Magbebaye ne Manama pinaahi te pegbalew-balew rin te suman-suman te Hari te Asirya* Hari te Asirya, iyan igpasabut se Hari te Pirsya su te seeye ne timpu, nasakup te Pirsya ka Asirya. eyew egbulihan sikandan te Hari te peggimu te timplu te Manama, ka Manama te Israil.