1 Ne seini ka itulan te me kabuhalan ni Isaw (wey ke Idum). 2  ✡ Hin 26:34.Due daruwa ne mengebay ne matig-Kanaan ne in-asawa ni Isaw ne ensi Ada ne anak ni Ilun ne Hitihanen, wey si Uhulibama ne anak ni Ana wey apu ni Sibyun ne Hibihanen. 3  ✡ Hin 28:9.Due degma induwey ni Isaw ne anak ni Ismail ne anggam din ne egngaranan ki Basimat ne atebey ni Nibayut. 4-5 Seini ka me anak ni Isaw ne miglesut diye te Kanaan: Si Ilipas ka anak dan ki Ada, si Riyuil ka anak dan ki Basimat, wey ensi Hiyus, si Halam, wey si Kura ka me anak dan degma ki Uhulibama.

6 Nataman, impanguyan ni Isaw ka me asawa rin, me anak, me suluhuanen, me ayam, wey ka langun ne karatuan din ne nakuwa rin diye te Kanaan, wey migdiyu-diyu sikandin te hari rin ne si Hakub. 7 Su kenad egkaayun ne egpalemungey pad sikandan ka eg-ugpe tenged te subla ne dakel ne kasangkapan dan, wey ka inged ne in-ugpaan dan kenad eleg tenged te masalig ne me ayam dan. 8 Sikan naa ka miggalin e ensi Isaw diye te me bubungan te inged ne Idum.

9 Seini ka itulan te me kabuhalan ni Isaw ne migligkatan te me matig-Idum ne diye te bubungan te Siir. 10-13 Due lukes ne anak ni Isaw ki Ada ne egngaranan ki Ilipas. Ne si Ilipas, due lalimma ne anak din ne lukes: Si Timan, si Umar, si Sipu, si Gatam, wey si Kinas. Duen pad si Amalik ne anak ne lukes ni Ilipas ki Timna, ka duwey rin ne uripen.

Due degma sabeka ne lukes ne anak ni Isaw ki Basimat ne egngaranan ki Riyuil. Ne si Riyuil, due hep‑at ne anak din ne lukes: Si Nahat, si Sira, si Sama, wey si Misa.

14 Due degma me lukes ne anak ni Isaw ki Uhulibama: Si Hiyus, si Halam, wey si Kura. Si Uhulibama ka anak ni Ana ne apu ni Sibyun.

15 Seini ka me kabuhalan ni Isaw ne neyimu ne me pangulu te nalein-lein ne me tribu: Si Timan, si Umar, si Sipu, si Kinas, 16 si Kura, si Gatam, wey si Amalik. Me anak sikandan ni Ilipas ne panganey ne anak ni Isaw ki Ada. Ne diye sikandan nangugpe te inged ne Idum.

17 Ka me anak ni Riyuil ne anak ni Isaw ki Basimat, neyimu degma ne me pangulu. Sikandan ensi Nahat, si Sira, si Sama, wey si Misa. Nangugpe degma sikandan diye te inged ne Idum.

18 Ne neyimu degma ne me pangulu ka me anak ni Isaw ki Uhulibama ne ensi Hiyus, si Halam, wey si Kura. Sikandan ka me apu ni Ana ne amey ni Uhulibama. 19 Sikandan langun ka me kabuhalan ni Isaw (wey ke Idum) ne me pangulu te tribu ran.

20 Due mahinged diye te inged ne Idum ne si Siir ne Hurihanen. Seini ka ngaran te me anak din ne me lukes: Si Lutan, si Subal, si Sibiyun, si Ana, 21 si Disun, si Isir, wey si Disan. Neyimu sikandan ne me pangulu te me Hurihanen ne tribu diye te inged ne Idum. 22 Seini ka me lukes ne anak ni Lutan: Si Huri wey si Himan. Ne due atebey ni Lutan ne egngaranan ki Timna. 23 Seini ka me lukes ne anak ni Subal: Si Alban, si Manahat, si Ibal, si Sipu, wey si Unam. 24 Seini ka me lukes ne anak ni Sibiyun: Si Aya wey si Ana. (Si Ana ka nakakita te meinit ne me sebseb ne diye te disirtu te migpepanabtab sikandin te me asnu te amey rin.) 25 Seini ka me anak ni Ana: Si Disun ka lukes wey si Uhulibama ka malitan. 26 Seini ka me lukes ne anak ni Disun: Si Himdan, si Isban, si Itran, wey si Siran. 27 Seini ka me lukes ne anak ni Isir: Si Bilhan, si Saaban, wey si Akan. 28 Seini ka me lukes ne anak ni Disan: si Us wey si Aran. 29 Ka me pangulu te me Hurihanen ne tribu diye te Siir iyan ensi Lutan, si Subal, si Sibyun, si Ana, 30 si Disun, si Isir, wey si Disan ka me pangulu te me Hurihanen ne tribu ne mahinged diye te inged te Siir.

31 Seini ka me Hari te inged ne Idum te timpu ne ware pad mighari diye te Israil: 32 Si Bila ne anak ni Biyur ka migmandu diye te inged ne Idum. Ne iyan ngaran te siyudad din ka Dinhaba. 33 Te migpatey e si Bila, iyan nakasubal kandin ne migmandu si Hubab ne anak ni Sira ne matig-Busra. 34 Te migpatey e degma si Hubab, iyan e degma nakasubal kandin migmandu si Husam ne matig-Timan. 35 Te migpatey e degma si Husam, iyan e degma nakasubal kandin migmandu ka anak ni Bidad ne si Hadad ne matig-Abit. Natalu ni Hadad ka me matig-Midiyan diye te napu te Muwab. 36 Te migpatey e degma si Hadad, iyan e degma nakasubal kandin migmandu si Samla ne matig-Masrika. 37 Te migpatey e degma si Samla, iyan e degma nakasubal kandin migmandu si Saul ne matig-Rihubut ne marani te Weyig ne Iyupratis.* Mesi egkahi ka diye te Hibruwanen te “ka Weyig” iyan naa igpasabut due ka weyig ne Iyupratis. Piru kene ne klaru ke seini naa iya ne weyig ka igpasabut kayi ne birsikulu su migkahi ka duma te minsan nekey re due ne weyig. 38 Te migpatey e degma si Saul, iyan e degma nakasubal kandin migmandu si Baal-Hanan ne anak ni Akbur. 39 Te migpatey e degma si Baal-Hanan, iyan e degma nakasubal kandin migmandu si Hadad ne matig-Pau. Ne ka asawa ni Hadad iyan si Mihitabil ne anak ni Matrid wey apu ni Misaab.

40 Seini ka ngaran te me pangulu ne kabuhalan ni Isaw ne nangugpe diye te me inged ne impasangey kandan: Si Timna, si Alba, si Hitit, 41 si Uhulibama, si Ila, si Pinun, 42 si Kinas, si Timan, si Mibsar, 43 si Magdiil, wey si Iram. Sikandan ka me pangulu ne kabuhalan ni Idum ne nangugpe diye te me inged ne impasangey kandan. (Si Idum ka dangeb ne ngaran ni Isaw, ka migligkatan te me matig-Idum.)