1 Te seeye ne timpu, mig-awe e si Huda diye te me suled din wey diye din e miglemung ki Hira te matig-Adulam. 2 Ne diye nakakita si Huda te mengebay ne anak ni Sua ne matig-Kanaan, wey in-asawa rin e. 3 Nataman, naberes e ka asawa rin wey nakaanak e te lukes, wey migngaranan ni Huda ka bate ki Ir. 4 Nataman, naberes e man‑e ka asawa rin wey lukes ded man‑e ka anak din. Migngaranan din ka bate ki Unan. 5 Nataman, nakaanak e man‑e sikandin te lukes wey migngaranan din ka bate ki Sila. Diye ensi Huda te Kisib te peglesut ni Sila.

6 Ne migtulin e si Ir, ka panganey ne anak ni Huda, wey impaasawa rin e te mengebay ne egngaranan ki Tamar. 7 Piru mareet ka batasan ni Ir diye te tangkaan te Magbebaye ne Manama. Sikan naa ka miggimatayan sikandin te Magbebaye ne Manama. 8 Ne migkahiyan ni Huda si Unan ne hari ni Ir, “Keilangan ne egpamaluwen nu si Tamar sumale te batasan ta eyew duen ded anak te kakey nu ne migpatey e.” 9 Piru nakanengneng si Unan ne kene ne kandin ka panganey ne anak dan ke eglesut. Sikan naa, mesi eggulid e sikandin ki Tamar, igpalihawang din ka muntus din eyew kene egpakaanak sikandin te anak te kakey rin. 10 Piru ingkeepes te Magbebaye ne Manama ka himu rin. Sikan naa ka miggimatayan ded degma te Magbebaye ne Manama si Unan. 11 Ne migkahiyan ni Huda ka ambey rin ne si Tamar, “Uli ke pa diye te amey nu wey igpepamalu ku red sikeykew ke egkanakan e si Sila.” Piru inlalag de seeye ni Huda ki Tamar su naaldek sikandin ne egpatey red si Sila iling te daruwa ne kakey rin ke egpamaluwen din ded si Tamar. Sikan naa ka nekeuli pad iya si Tamar diye te amey rin.

12 Te pile e ne leg‑un ka miglihad, migpatey e ka asawa ni Huda. Te natuman e ka peglungku ni Huda, miggendiye sikandin te Timna duma te alukuy rin ne si Hira ne matig-Adulam eyew egpangabulug te me karniru rin. 13 Ne due nakahuhud ki Tamar ne miggipanew e ka anuhang din ne eggendiye te Timna eyew egtabulug te me karniru rin. 14 Te sikan de, inliwanan din e ka insaluub din ne manggad te pegkabalu wey imbunbunan din ka ulaula rin eyew ware egpekeila kandin. Nataman, migpinpinnuu e sikandin diye te gumawan te Inaim, ka lungsud ne diye te dalan ne iggendiye te Timna. Su nakatahe e si Tamar ne kanakan e si Sila, piru ware pamaluwa sikandin.

15 Te nakita ni Huda si Tamar, kahiyen din ne egpabaley-baley ne malitan su imbunbunan ma ni Tamar ka ulaula rin. 16 Indugpu sikandin ni Huda diye te ilis te dalan wey migkahiyan, “Apas kad su egpewulirey ki.” Su ware nekeila si Huda ne ambey rin bes seeye.

Ne migtabak si Tamar, “Nekey ka igbayad nu keddi?”

17 Migtabak si Huda, “Egpeuyanan ku sikeykew te nati te kambing ne migligkat te me ayam ku.”

Mig-inse si Tamar, “Nekey ka igkagerentiya nu keddi taman te igpeuyan nud seini?”

18 Migtabak si Huda, “Nekey ka igkeupii nu ne iggerentiya ku?”

Migkahi si Tamar, “Ka imbebalieg nu ne due igpirma wey ka tuked ne inggen-genan nu.” Sikan naa ka imbehey rin e ki Tamar ka inggerentiya rin wey migguliran din e sikandin. Nataman, naberes e si Tamar. 19 Ne mig-uli e si Tamar wey inluung din e ka imbunbun din te ulaula rin. Ne insaluub din e man‑e ka manggad te pegkabalu.

20 Nataman, impeuyan e ni Huda ki Hira ne alukuy rin ka nati te kambing diye te malitan, wey igpaawi e ka inggerentiya rin. Piru ware nakita ni Hira ka malitan. 21 Ne migpanginse si Hira te mahinged diye te Inaim, “Hendeid naa ka egpabaley-baley ne malitan ne migpinpinnuu kayi te lenged te dalan?”

Ne migtabak sikandan, “Ware egpabaley-baley ne malitan kayi.”

22 Purisu miglibed e sikandin diye ki Huda wey migkahi, “Ware ku nakita ka malitan wey migkahiyan a te mahinged ne ware kun egpabaley-baley ne malitan diye te kandan.”

23 Ne migkahi si Huda, “Balahad e, kandin e seeye su kema ke egngisiyan ki te me etew ke eglibed ki diye ka egpamitew. Manaa su impeuyanan kud sikandin te kambing piru ware nu ma kitaa sikandin.”

24 Peglihad te tatelu ne bulan, nahuhuran si Huda ne egpabaley-baley e ka ambey rin ne si Tamar wey naberes e. Ne migkahi si Huda, “Uyana niyu sikandin diye te lihawangan wey silabi niyu sikandin.”

25 Piru te in-uyan e si Tamar eyew eggimatayan e, migpanaha-taha sikandin te anuhang din ka migkahi, “Ka kamuney te seini ne balieg ne due igpirma wey te tuked ka nakaberes keddi. Menua, neila nu seini?”

26 Neila ni Huda ne kandin seeye, purisu migkahi e sikandin, “Matareng pad sikandin kuntere keddiey, su ware kud sikandin ipepamalu te anak ku ne si Sila.” Ne warad miggulid sikandin ki Tamar.

27 Ne miggingume e ka timpu ne eglesutan e si Tamar wey migseseppingan sikandin. 28 Te migbaletikan e sikandin, impalihawang te sabeka ne bate ka belad din wey miggiketan e seeye te mangnguyamu te lanut ne malalab-lalab. Migkahi ka mangnguyamu, “Seini ka egpekewun‑a eglesut.” 29 Piru inggusud te bate ka belad din wey iyan e nekewun‑a nakalesut ka sepping din. Migkahi ka mangnguyamu, “Ingkeyis din bes ka sepping din!” Sikan naa ka migngaranan sikandin ki Piris.* Te Hibruwanen: “egkeyis” ka kaluwasan te lalag ne “Piris.” 30 Nataman, namewuri e nakalesut ka sepping din ne due lanut ne malalab-lalab ne inggiket diye te belad din. Migngaranan sikandin ki Sira.† Te Hibruwanen: “malalab” ka kaluwasan te lalag ne “Sira.”