1 Ne migpalunggehaat si Hakub mig-ugpe diye te Kanaan ne mig-ugpaan te amey rin dengan. 2 Ne seini ka guhuren meyitenged te me kabuhalan ni Hakub.

Te sapulu e wey pitu (17) ka idad ni Husi, migtanggu sikandin te me karniru wey me kambing duma te me kakey rin ne me lukes ne anak enni Bilha wey ni Silpa, ka daruwa ne uripen ne asawa te amey rin. Ne innangen ni Husi diye te amey rin ka maddeet ne eggimuwen te me kakey rin.

3 Ne si Husi ka indakelan te geyinawa ni Hakub te langun ne anak din, su miglesut sikandin te nabuyag e si Hakub. Sikan naa ka imbehayan din si Husi te malayat ne kumbale ne due belad. 4 Piru te nakita te me kakey ni Husi ne sikandin ka amana indakelan te geyinawa te amey ran, nalangetan sikandan ki Husi wey warad lalag dan kandin ne meupiya.

5 Sabeka ne karusileman, nakataheinep si Husi. Nataman, impangguhuran din ka me kakey rin, ne puun due, subla pad ne nalangetan sikandan kandin. 6 Migkahiyan din sikandan, “Pammineg kew su due taheinep ku. 7 Migpamagkes ki kun te me trigu diye te kamet, ne dutu, migsasindeg kun ka binagkes ku wey inlingutan te me binagkes niyu ne mig-unduk diye te binagkes ku.”

8 Ne migkahiyan si Husi te me kakey rin, “Ew, kahiyen nu buwa ne egkeyimu ka ne Hari wey egmandu kanami?” Ne subla ran pad ne nalangetan kandin tenged te taheinep din wey te guhuren din.

9 Nataman, nakataheinep e man‑e si Husi wey impangguhuran din e man‑e ka me kakey rin. Migkahi sikandin, “Nakataheinep ad man‑e. Ne diye te taheinep ku, nakita ku ka aldew, ka bulan, wey ka sapulu wey sabeka (11) ne bituen ne miglangkeb kun diye te tangkaan ku.”

10 Piru te pegpangguhud din te amey rin wey te me kakey rin, indew‑ey sikandin te amey rin ne migkahi, “Nekey ka igpasabut nu te sika ne taheinep? Ka iney nu naa, ka me kakey nu wey sikeddi, egdani-rani ne eglangkeb diye te tangkaan nu?” 11  ✡ Him 7:9.Ingkasekel si Husi te me kakey rin, piru ware naawe diye te suman-suman te amey rin ka guhuren din.

12 Sabeka ne aldew, miggendiye ka me kakey ni Husi te Sikim eyew egpepanabtab te me ayam te amey ran. 13 Ne migkahiyan ni Hakub si Husi, “Egpasundulen ku sikeykew te me kakey nu ne diye te Sikim ka egpepanabtab te me ayam ta.”

Ne migtabak si Husi, “Uya, ame.”

14 Ne migkahiyan pad man‑e sikandin te amey rin, “Hendiye ka kuntee. Leuya nu ka me kakey nu ke ware ded neyitabu kandan wey te me ayam. Egkataman, uli kad kayi wey guhuri a.” Sikan naa ka impaligkat e si Husi te amey rin diye te napu te Hibrun.

Pegginguma rin diye te Sikim, 15 due etew ne nakakita kandin te migleug-leug pad diye te me kamet. Mig-insaan sikandin te etew, “Nekey ka egpamitawen nu?”

16 Ne migtabak si Husi, “Egpamitew a te me kakey ku. Kema ke nakanengneng ka ke hendei sikandan migpepanabtab te me ayam ney?”

17 Ne migtabak ka etew, “Warad sikandan kayi. Narineg ku ne eggendiye kun sikandan te Dutan.” Sikan naa ka insundul e ni Husi ka me kakey rin, wey nakita rin sikandan diye te Dutan.

18 Te madmariyu pad si Husi, nakita ran e sikandin. Te ware pad nekeuma sikandin, miglelalis e sikandan ne eggimatey kandin. 19 Migpalalahey sikandan, “Sikan e ka mapanpannaheinep. 20 Na, kuntee eggimatayan ta sikandin wey eg-uluhen ta ka lawa rin kayi te belun. Egkataman, egkahi ki re te indawi sikandin te dakel ne mahintalunan. Pitawen ta ke egkatuman pad ka me taheinep din.”

21 Piru te nakarineg si Rubin dutu, egpangabangan din perem si Husi wey migkahi, “Kene te re eggimatayan sikandin. 22 Kene te re egpalangeseen su eg-uluhen te re sikandin te belun kayi te inged ne ware mahinged. Piru kene niyu re himatayi sikandin.” Su nakasuman-suman si Rubin ne egpangabangan din si Husi wey iglibed din ded diye te amey rin. 23 Te nekeume e si Husi diye te me kakey rin, impehes dan luunga ka malayat ne kumbale din ne binelaran. 24 Miggen-genan dan si Husi wey in-ulug dan e diye te belun ne warad weyig.

25 Nataman, naminnuu e sikandan eyew egkeen. Ne dutu, due nakita ran ne me etew ne mig-untud te me kamil. Me Ismailita seeye ne migdurulan te me peemut wey me peemis ne migligkat diye te Gilyad wey igpeendiye te Ihiptu. 26 Ne migkahiyan ni Huda ka me suled din, “Nekey naa ka egkaangey ta ke eggimatayan ta ka hari ta wey iggeles ta ka pegpatey rin? 27 Meupiya pad ke igbelegye ta sikandin te me Ismailita. Kene te re eggimatayan sikandin su kene pad iya egkahuhud ne hari ta sikandin.” Ne nabennalan ka me suled din. 28  ✡ Him 7:9.Te eglihad e ka me Ismailita ne nigusyanti ne matig-Midiyan, ingkuwa te me kakey rin si Husi diye te belun wey imbelegye dan sikandin diye te me Ismailita te daruwa ne pulu (20) ne pelata ne mahal. Nataman, impehes e uyana si Husi te me Ismailita diye te Ihiptu.

29 Te ware de naluhey, miglibed si Rubin diye te belun wey nakita rin ne warad diye si Husi. Seeye de iya, inggisi din e ka kumbale din tenged te laggew rin. 30 Miglibed sikandin diye te me suled din wey migkahi, “Warad si Husi! Nekey naan e ka eggimuwen ku?”

31 Ne miggimatey sikandan te kambing wey in-eled dan te langesa ka kumbale ni Husi. 32 In-uyan dan ka kumbale ni Husi diye te amey ran wey migkahi, “Nakita ney seini. Pitawa nu ke kumbale naa ni Husi seini wey se kene.”

33 Neila te amey ran ka kumbale wey migkahi, “Kumbale din iya sika! Etuwey, miggimatayan bes si Husi te mabulut ne mahintalunan! Indeesan bes e iya mule ka lawa rin!” 34 Ne inggisi ni Hakub ka kumbale din wey migsaluub sikandin te saku* Iyan igpasabut kayi ka meitem wey egdehes ne manggad ne inggimu puun te bulbul te kambing ne igsaluub te timpu te peglungku wey ke eg-inniyug naa te sale. te pegpeila ne miglungku sikandin. Naluhey sikandin ka miglungku tenged te pegpatey te anak din. 35 Inliwang sikandin te langun ne me anak, piru mig-apul sikandin wey migkahi, “Balahara a nikaniyu! Eglungku a taman te egkapatey ad wey egpakasundul ad kandin diye te Hadis ne inged te me gimukud.” Ne migsinehawan din e man‑e si Husi.

36 Ne ensi Husi degma, nekeume e diye te Ihiptu wey imbelegye e sikandin te me matig-Midiyan diye ki Putipar. Sikandin ka sabeka ne upisyal wey ahalen te me talagtameng te palasyu te Hari te Ihiptu.