1 Sikan naa ka miggendiyad e si Husi te Hari te Ihiptu wey migkahi, “Nekeume e ka amey ku wey ka me suled ku ne migpuun diye te Kanaan ne impanguyan dan ka me karniru wey me baka ran wey ka langun ne kandan. Ne kuntee, diyad e sikandan te Gusin.” 2 Ne lalimma ka suled ni Husi ne induma rin wey impeila-ila rin te Hari te Ihiptu. 3 Ne mig-insaan sikandan te Hari te Ihiptu, “Nekey‑a ka himu niyu?”

Ne migtabak sikandan, “Ahalen, talagtanggu key te me ayam, iling te me apu ney. 4 Miggendini key eyew kayid eg-ugpe su warad egkapanabtaban te me ayam ney diye te Kanaan su masumpit amana ka bitil. Ahalen, eghangyuen ney sikeykew ne diye key peugpaa te Gusin.” 5 Ne migkahiyan te Hari te Ihiptu si Husi, “Tenged te kayid e te keykew ka amey nu wey ka me suled nu, 6 egpekeugpe sikandan te minsan hendei ne igkeupii nu. Diye nu iya peugpaa sikandan te Gusin, su seeye ka subla ne meupiya ne tane kayi te Ihiptu. Ke due nanengnengan nu due te kandan ne amana egkateu ne egtanggu, iyan nu patangguwa te me ayam ku.”

7 Ne nataman, indume e ni Husi ka amey rin ne si Hakub wey impeila rin te Hari te Ihiptu, wey in-ampuan ni Hakub ka Hari eyew egpanalanginan sikandin te Manama. 8 Ne mig-insaan te Hari te Ihiptu si Hakub, “Pile e ka idad nu?”

9 Ne migtabak si Hakub, “130 e ka idad ku. Malepet de wey mahirap ka peg-ugpe ku. Ne kene seini egpakalepeng te idad te amey ku wey te me apu ku dengan.” 10 Ne impanalanginan e man‑e ni Hakub ka Hari te Ihiptu wey miggipanew e sikandin. 11 Sikan naa ka impeugpe e ni Husi ka amey rin wey ka me suled din diye te Ihiptu. Imbehayan din sikandan te subla ne meupiya ne tane ne diye te marani te siyudad ne egngaranan te Ramasis, sumale te insuhu te Hari te Ihiptu. 12 Imbegbehayan ni Husi te pegkeen ka intiru ne pamilya te amey rin, wey ka me suled din, sumale te kasuluhan te me anak dan.

13 Ne tenged te masumpit amana ka bitil, warad egkakeen te me etew ne mig-ugpe diye te inged te Ihiptu wey Kanaan wey migmagguye e ka me etew. 14 Sikan naa ka nangendiye ki Husi ka me matig-Kanaan wey me matig-Ihiptu eyew egpameli te egkakeen. Impanlimud ni Husi ka langun ne seleppi ne imbayad dan wey in-uyan din diye te palasyu te Hari te Ihiptu. 15 Ne nataman, naaminan e te seleppi ka me etew diye te Ihiptu wey Kanaan. Ne nangendiyad e man‑e ki Husi ka langun ne me matig-Ihiptu ne migkahi, “Warad seleppi ney. Ne behayi key ubag te egkakeen wey kene key papataya nikeykew te gutas.”

16 Ne migtabak si Husi, “Tenged te warad e seleppi niyu, ibehey niyu keddi ka me ayam niyu su egsaliyuwan ku te egkakeen.” 17 Sikan naa ka impanguyan dan ka me ayam dan diye te ki Husi, wey insaliyuwan din te egkakeen ka me kudde, me karniru, me kambing, me baka, wey ka me asnu ran. Te seeye ne leg‑un, impanaliyuwan ni Husi te egkakeen ka langun ne ayam dan.

18 Te seup e ne leg‑un, nangendiyad e man‑e sikandan ki Husi wey migkahi, “Ahalen, kene ney iggeles keykew ne naaminan key en iya te seleppi wey duen e te keykew ka langun ne ayam ney. Warad nasame ne igpakabehey ney keykew angin e te lawa ney wey te tane ney. 19 Kene key ubag papataya nikeykew! Saliyuwi nud e ka lawa ney wey ka tane ney te egkakeen. Egpeuripen key e te Hari te Ihiptu wey kandin e ka tane ney. Behayi key degma te beni eyew egkeuyag key red wey kene egbenesan ka me kamet ney.”

20 Sikan naa ka impamelegye e te me matig-Ihiptu ka langun ne tane dan tenged te masumpit ne bitil. Ne impameli e seeye ni Husi para te Hari te Ihiptu ne iyan e kamuney te katantanaan te Ihiptu, 21 wey impeuripen e kandin ka langun ne matig-Ihiptu. 22 Ka tane naan de te me talagpanubad ka ware nakuwa ni Husi. Kene ne keilangan ne igbelegye dan ka tane dan su imbegbehayan de sikandan te Hari te Ihiptu te seleppi. 23 Ne migkahiyan ni Husi ka me etew, “Kuntee ne aldew, nabeli kud e sikaniyu wey ka tane niyu para te Hari te Ihiptu. Seini red ka beni ne igpamula niyu te me kamet niyu. 24 Ke eg-umeen kew e, ibehey niyu te Hari te Ihiptu ka igkalimma ne baad. Kaniyud e ka egkasame eyew egbenien wey egkeenen niyu te taltalaanak.”

25 Ne migkahi sikandan, “Ahalen, impangabangan key nikeykew! Ke egkeupian ka, egpeuripen key e te Hari te Ihiptu.” 26 Sikan naa ka miggimu si Husi te balaud diye te Ihiptu ne ka igkalimma ne baad te eg-uma igbehey te Hari te Ihiptu. Minsan kuntee, duen pad ka sika ne balaud. Ka tane naan de te me talagpanubad ka ware nakuwa te Hari te Ihiptu.

27 Ne diye mig-ugpe ka me anak ni Israil* Si Israil ka ingngaran te Manama ki Hakub te migpaleglehengey sikandan diye te Piniil (32:28). te Gusin, wey migmeyaman sikandan diye wey nabuhal amana. 28 Diye mig-ugpe si Hakub te Ihiptu seled te sapulu wey pitu (17) ne leg‑un taman te migpatey e sikandin ne migginguma te 147 ka idad din. 29  ✡ Hin 49:29-32; 50:6.Te mahaan e egkapatey sikandin, impeumew rin ka anak din ne si Husi wey ingkahiyan, “Ke inggeyinawaan e red nikeykew, ipataliware nu ka belad nu te daruwa ne bubun ku wey saad ka keddi ne eg-ay-ayaran a nikeykew wey kene eg-ang-anggaan. Kena a ilebeng nikeykew kayi te Ihiptu. 30 Su igkeupii ku ne diya a igsabal te insabalan te amey ku wey te apu ku. Ke egpatey ad, uyana a nikeykew puun kayi te Ihiptu wey diya a isabal te insabalan kandan.”

Ne migtabak si Husi, “Egtumanen ku ka ingkahi nu.”

31 Ne migkahi e man‑e si Hakub, “Pahunlibet ka keddi ne egtumanen nu iya seini.” Sikan naa ka migpahunlibet si Husi. Ne miglangkeb si Hakub diye te hibatanan din eyew egpasalamat te Manama.