1 Te sika, migkepkepan e wey miggarekan e ni Husi ka amey rin wey migsinehew. 2 Ne nataman, migsuhu si Husi te talagbalsamar ne igpabalsamar ka lawa te amey rin. Seeye naa ka imbalsamar e si Hakub. 3 Mighep‑at ne pulu (40) ne aldew ka pegbalsamar kandin su sika ka kaluhayan te pegbalsamar. Ne miglungku ka me matig-Ihiptu te pegpatey rin seled te pitu ne pulu (70) ne aldew.

4 Te napenge e ka peglungku dan, migkahiyan ni Husi ka me upisyal te Hari te Ihiptu, “Ke ingkeyid‑u e red nikaniyu, ikahi niyu ubag seini te Hari: 5  ✡ Hin 47:29-31.‘Te mahaan e egpatey ka amey ku, impasaad a nikandin ne diye igsabal sikandin te sabalanan ne intahahe din diye te Kanaan. Purisu, peendiyaa a nikeykew eyew egsabal te amey ku. Ke egpekeimpus ad, ne eg-uli ad e.’ ”

6 Ne nabennalan ka Hari te Ihiptu te inhangyu ni Husi wey migkahi, “Hendiye kad wey isabal nu ka amey nu sumale te impasaad din keykew.”

7 Sikan naa ka migligkat e ensi Husi duma te langun ne upisyal te Hari te Ihiptu wey te igdatu diye te Ihiptu. 8 Migduma degma ki Husi ka pamilya rin, ka me suled din wey ka me pamilya ran. Ka anak dan naan de ne deisek pad wey ka me ayam dan ka nahaat diye te Gusin. 9 Sikan naa ka masalig sikandan se migduma ki Husi. Due nanguntud te kudde wey due degma nanguntud te unturanan ne kerumata.

10 Nataman, migginguma ran e diye te diekanan te trigu diye te Atad ne diye dapit te Weyig ne Hurdan. Ne migpandalawit amana sikandan diye, wey miglungku si Husi te amey rin te pitu ne aldew. 11 Te pegkakita te me matig-Kanaan ne subla ka pegpandalawit diye te Atad, migkahi sikandan, “Seini ka masumpit ne pegpandalawit te me matig-Ihiptu.” Purisu, migngaranan dan ka seeye ne inged te Abil-misraim.* Te Hibruwanen: “pegpandalawit te me matig-Ihiptu” ka kaluwasan te lalag ne “Abil-misraim.”

12 Ne dutu, intuman te me anak ni Hakub ka impanaha-taha rin kandan. 13  ✡ Him 7:16.Su in-uyan dan ka minatey diye te Kanaan wey diye dan isabal te sulung diye te Makpila, ne diye dapit te igsile ligkat te Mamri. Seeye ka sulung ne diye te kamet ni Iprun ne Hitihanen ne imbeli ni Abraham eyew eggimuwen ne sabalanan. 14 Ne nataman, mig-uli e si Husi diye te Ihiptu duma te me suled din wey ka langun ne migduma kandin te migsabal te amey rin.

15 Te nakasabal e ka amey ran, migpalalahey ka me suled ni Husi, “Kema ke egdumutan ki pad ni Husi wey ke egsulian ki nikandin tenged te mareet ne neyimu ta kandin dengan.” 16 Sikan naa ka migpanaha sikandan ki Husi meyitenged te impanaha-taha kun te amey ran te ware pad sikandin migpatey ne migkahi, 17 “Te wa pad migpatey ka amey ta, egpakahiyan ka nikandin te egpasayluwen key nikeykew se me suled nu te sale ne neyimu ney keykew. Ne kuntee, pasayluwa key ubag te sale ney se me suluhuanen te Manama te amey ta.” Te pegkarineg ni Husi te impanaha ran, nakasinehew sikandin.

18 Ne nataman, miggendiye te kandin ka me suled din ne miglangkeb diye te tangkaan din ne migkahi, “Uripen key e nikeykew.”

19 Piru migkahiyan sikandan ni Husi, “Kene kew kaaldek, su kene ne sikeddi ka Manama. 20 Mareet ka tuyu niyu te pegbelegye niyu keddi, piru nakanengneng e ka Manama ne meupiya ka egpangkusan dutu ne iyan se egkapangabangan ka masalig ne etew, ne ka seinid en iya. 21 Purisu, kene kew kaaldek. Egtangguwen ku sikaniyu wey ka me anak niyu.” Ne ingguluan din sikandan wey inliwang din.

22 Migpabulus si Husi ka mig-ugpe diye te Ihiptu duma te langun ne me kabuhalan te amey rin. Migginguma te 110 ka idad ni Husi, 23 ne nakita rin pad ka me anak wey me apu ni Ipraim wey ka me anak te apu din ne si Makir ne anak ni Manasis. In-isip ni Husi ne me anak din mismu ka me anak ni Makir. 24 Migkahiyan ni Husi ka me suled din, “Hapit ad egkapatey, piru kene kew egbalaharen te Manama, wey eg-uyanen kew nikandin puun kayi te Ihiptu peendiye te inged ne insaad din ki Abraham, Isaak, wey ki Hakub. 25  ✡ Iks 13:19; Huswi 24:32; Hib 11:22.Na, saad kew keddi ne eg-uyanen niyu red ka me tul‑an ku ke eg-uyanen kew e te Manama diye te seeye se inged.” Ne migsaad sikandan. 26 Ne migpatey si Husi diye te Ihiptu te 110 e ka idad din. Impabalsamar pad nikandan ka lawa rin wey intahu te lungun.