3
Ka peggukum te Hirusalim wey Huda
1 Pitawa niyu ke egmenuwen te Amana ne Maresen ne Magbebaye ne Manama,
te eg-awe ka langun ne insalihan te keet-etawan te Hirusalim wey te intiru ne Huda
lagkes ka langun ne egkakeen, weyig,
2 me bahani, me sundalu,
me huwis wey me prupita,
egmahehane wey me igbuyag,
3 me pangulu te me lalimma ne pulu (50) ne sundalu wey me talahuren,
me talagtambag wey me mangngateu ne tumanuren, wey ka egkateu ne egmangaddi.
4 Ne iyan egpamanduen kandan te Magbebaye ne Manama ka egkengabate-bate pad ne ware pad me hinanawan
wey iyan de nenanengnengan ka kandan ne keupianan.
5 Ne egpare-deehey e ka langun ne etew—egmeeg-ehetey e ka tagse talagsumbaley.
Ne kenad e egtahud te me igbuyag ka me bate,
wey kenad e degma egtahud te me talahuren ka me etew ne ware gulehud.
6 Egginguma ka aldew ne eggendiyaan te sabeka ne etew ka suled din diye te baley te amey rin wey egkahiyan, “Due hinabel nu, sikeykew e ka egpangulu kanami wey ka egmandu te seini se inged ta ne nahuhus e.”
7 Piru egkahi sikandin,
“Kene! Kena a egpakabulig kaniyu.
Ware subla ne egkakeen ku wey ke me hinabel naa.
Kena a nikaniyu himuwa ne pangulu te keet-etawan.”
8 Nareetan e ka Hirusalim wey ka Huda
tenged su supak te Magbebaye ne Manama ka egmanlalahen dan wey ka egmangimuwen dan,
wey klaru ne insukulan dan sikandin se maresen ne nakakita kandan.
9 Ne egkakita diye te ulaula ran ne nakasale sikandan.
Impakita ran ka pegpakasale dan iling te inggimu te me matig-Suduma ne miggimu te sale te ware heles-heles.
Mekeyid‑u-hid‑u sikandan!
Sikandan ded mismu ka mig-uyan te karereetan te pegkeetew ran.
10 Kahii niyu ka me matareng te egmeupiya red sikandan,
su egpakarawat sikandan te me unag tenged te meupiya ne me hinimuwan dan.
11 Piru mekeyid‑u-hid‑u ka maddeet ne etew.
Karereetan ka egpangkusan dan
su egkasulian sikandan te immangimu ran.
12 Indeeg-deeg te me bate ka keet-etawan ku,
wey me malitan ka migmandu kandan.
He keet-etawan ku, inlaag kew te me pangulu niyu,
wey diye kew ipabaye te seyyup ne dalan.
Ka peggukum te Magbebaye te keet-etawan din
13 Andam e ka Magbebaye ne Manama ne eggusey
wey andam e sikandin ne eggukum te keet-etawan din.
14 Eggukuman din ka me igbuyag wey ka me pangulu te keet-etawan.
Ne migkahi sikandin, “Sikaniyu ka migdereet te parasan ku ne iyan ka Israil.
Ne napenu ka me baley niyu te tinakew puun te egkengaayu-ayu.
15 Nekey ka katenged niyu te egbayad-bayad te keet-etawan ku,
wey te egdiek-diek te me ulu te egkengaayu-ayu?”
Sika ka ingkahi te Amana ne Maresen ne Magbebaye.
Ka pegpaney-paney te me malitan diye te Hirusalim
16 Ne migkahi ka Magbebaye ne Manama,
“Me liheen ka me malitan diye te Hirusalim.* Te Hibruwanen: Siyun. Sabeka seini te me ngaran te Hirusalim.
Eggipanew sikandan ne kahi nu ne me hentew ka egpaambug-hambug, wey egpanungkilat sikandan ke egpitew.
Ne egkiay-kiay sikandan ke eggipanew, wey egparahingen dan ka me saliyew diye te me paa ran.
17 Purisu, egpakekehangen ku ka me ulu ran
taman te egkatabuluhan e sikandan wey egkengeupew e.”
18 Te sika ne aldew, eg-aween e te Magbebaye ne Manama ka me mateles ne me dayan-dayan diye te me paa te me malitan diye te Hirusalim, lagkes ka diye te me ulu, wey diye te me lieg, 19 wey ka diye te me belad dan. Ne eg-aween din degma ka me bunbun te ulaula ran, 20 me kalu dan, me lambus ne imbebakelew ran wey intetabed dan, 21 me sising diye te me kemel ran wey diye te me irung dan, 22 me hinabel ne para te pista, me diyakit, me kuyumbu, me puntil, 23 wey me alungan, mahal ne hinabel, me langkus, wey me bunbun te ulu.
24 Ka peemut ne igpamaluhu ran nasi e ne mangareg. Ne ka sinturun dan nasi e ne lubid wey ka me bulbul ran nasi e ne upew. Ne ka mateles ne me kumbale dan nasi e ne trapu. Ne ka katelesan dan nasi e ne pegkeyilew. 25 Ne egpatey pinaahi te kampilan diye te giraanan ka me lukes diye te Hirusalim, minsan ka subla ne mabbulut. 26 Emun ke me etew pa ka me gumawan te siyudad, egpandalawit e sikandan wey egsinehew tenged te susuluhi ne minatey. Ne egpekeiling e ka siyudad te miglumpang te tane ne malitan ne naawaan te langun-langun ne kandin.