2
Ka bubungan te Manama
(Mik. 4:1-3)
1 Seini ka impanengneng te Manama diye ki Isayas ne anak ni Amus meyitenged te Huda wey te Hirusalim:
2 Te mewuri ne me aldew,
ka bubungan ne nasasindehan te timplu, egkeyimu e ne subla ne matikang te langun.
Ne egtimpa seini te langun ne kabubunganan wey masulug ka me nasud ne egmangendiye
ne egpekeiling te weyig ne egtulayas.
3 Masulug ka me etew ne egmangendiye wey egkahi,
“Kuwa kid e. Egmanakereg kid diye te bubungan te Magbebaye ne Manama ne diye ka timplu te Manama ni Hakub,
eyew egpanuluen ki nikandin te me paahi rin eyew egpekeikul ki te dalan din.
Su egpuun te Siyun ka balaud te Magbebaye;
egpuun te Hirusalim ka me lalag din.”
4 ✡ Huwil 3:10.Eggukuman din ka nalein-lein ne me etew te minsan hendei.
Egsayaben dan e kangkuwa ka me kampilan dan eyew eggimuwen ne sudsud te daru,
wey egsayaben dan e ka me kelaab dan eyew eggimuwen ne me galab.
Ne kenad egpeggireey ka me nasud, wey kenad egbebasbas sikandan para te gira.
5 Pammineg kew, me kabuhalan ni Hakub, eggipanew ki diye te kalayag
ne impapitew te Magbebaye ne Manama kanta.
Ka aldew te peggukum te Magbebaye
6 He Manama, in-engkeran nu ka keet-etawan nu ne iyan ka me kabuhalan ni Hakub
tenged su neempet e ka inged dan te egmahehane wey me manenagne iling te me matig-Pilistiya.
Ne mig-ikul sikandan te batasanen te me lapu.
7 Dakel ka bulawan wey pelata diye te inged te Huda wey kene egkaamin ka karatuan dan.
Ne masulug ka me kudde wey kene egkaseel ka me karwahi diye te inged dan.
8 Neempet te me diyus-diyus ka inged dan,
wey migsimba sikandan te me kasangkapan ne hinimu ran de.
9 Purisu ipariralem nu ka tagse sabeka wey peyilawi nu;
kene nu sikandan pasayluwa, Magbebaye ne Manama.
10 ✡ Imp 6:15; 2Tis 1:9.Egpanuksuk sikandan diye te me batuwen wey egpangeles diye te tane
eyew egpakapanalliya sikandan te makaaldek-haldek ne langet te Magbebaye ne Manama, te geem din, wey te karesen din.
11 Te aldew te peggukum, igpariralem din e ka me hambuhen wey ka me mapegpeggasal,
wey ka Magbebaye ne Manama naan de ka egbantuhen.
12 Su due aldew ne intahahe te Amana ne Maresen ne Magbebaye,
eyew te peglegpad te langun ne mapegpeggasal, hambuhen,
wey igpariralem din ka langun ne maparibabawen.
13 Egdereetan din ka mallayat ne me kayu ne sidar diye te Libanun
wey ka langun ne uk ne kayu diye te Basan.
14 Ne egpatahen din ka matikang ne me bubungan wey me labuntud,
15 wey egguhusen din ka langun ne me matikang ne baley ne egpantawan te talagtameng
wey ka langun ne matikang wey makepal ne alad ne batu.
16 Igpatanled din ka langun ne barku diye te Tarsis wey ka me mateles ne unturanan diye te dahat.
17 Te aldew te peggukum, igpariralem din e ka me hambuhen wey ka me mapegpeggasal,
wey sikandin naan de se Magbebaye ne Manama ka egbantuhen.
18 Ne egkaawe en iya ka me diyus-diyus.
19 Te timpu te pegginguma te Magbebaye ne Manama eyew te peggukum te keet-etawan te kalibutan,
egpanerep ka me etew diye te me sulung diye te me batuwen wey diye te me lungag te tane
eyew egpakapanalliya sikandan te makaaldek-haldek ne langet, te geem, wey te karesen te Magbebaye ne Manama.
20 Te sika ne aldew, igdegpak te keet-etawan diye te me ambew wey diye te me kalapenit
ka me diyus-diyus ne pelata wey bulawan ne inggimu ran eyew egsimbeen dan.
21 Te timpu te pegginguma rin eyew te peggukum te keet-etawan te kalibutan,
egpanerep ka me etew te me sulung diye te me batuwen, wey diye te naperi ne me dalama
eyew egpakapanalliya te makaaldek-haldek ne langet, te geem, wey te karesen te Magbebaye ne Manama.
22 Kene kew salig te etew su eggeheyinawa re sikandin wey egkapatey red iya.
Nekey bes ka igpakabulig din?