1 Ka seeye se me matig-Muwab ne migpamallahuy puun te Sila, ka lungsud ne diye te disirtu, migpeuyan te dasag ne nati te karniru diye te Hari te Hirusalim.* Te Hibruwanen: Siyun. Sabeka seini te me ngaran te Hirusalim. 2 Iling te me bayaku ne in-alew puun te me salag dan, ka me malitan ne matig-Muwab ne diye te me lapasanan te Arnun.

3 Ingkahiyan te me matig-Muwab ka me matig-Huda, “Tambahi key ke nekey ka eggimuwen ney, wey bulihi key. Bantayi key iling te kayu ne egpakaralung te me etew ke matikang e ka aldew. Migpamallahuy key puun te ugpaan ney. Iheles key nikaniyu wey kene key balahara ne egkakita te migpanalukun kanami. 4 Peugpaa key duma kaniyu wey pangabangi key puun te seeye se egkeupian ne egdereet kanami.”

Ke warad e karereetan wey egkataman e seeye se egmandeeg-deeg te me nasud, 5 eghari e ka sabeka ne kabuhalan ni Dabid. Eghari sikandin duma te geyinawa ne kene egkabalbalawan wey kamalehetan. Ne matareng layun ka eggimuwen din, wey maali-ali ne eggimu ke nekey ka eleg.

6 Nakarineg key ne mapegpeggasal ka me matig-Muwab. Nakanengneng key ne kene ne mapariralemen sikandan, piru kene ne mallehet ka impaambug dan.

7 Purisu migpandalawit ka me matig-Muwab tenged te kasamuk ne in-antus dan. Migpandalawit sikandan te egkasuman-suman dan ka mateles ne egkakeen ne ingkalayami ran te egkeen diye te siyudad te Kir-Harisit. 8 Nenaggangu e ka me parasan diye te Hisbun lagkes ka diye te Sibma. Impanempug e te me pangulu te me nasud ka me parasan dan ne nekeuma dengan diye te Hasir, wey diye te disirtu. Nenareetan e ka me subing kayi ne migdul‑ug dengan taman diye te Namatey ne Dahat. 9 Purisu migpandalawit a tenged te parasan diye te Sibma iling te pegpandalawit te me matig-Hasir. Amana ku pandalawiti ka lungsud te Hisbun wey ka Ili-Ali su warad egkarineg ne pegpanguleyi te kahale te timpu te tingpamupu te behas te paras. 10 Warad egmangulahing te kahale te dakel ne eg-uma diye te kamet. Warad e egdiriek te behas te paras diye te diekanan. Nataman e ka pegpanguleyi te kahale. 11 Purisu nakareg-uy a te impangkusan te Muwab iling te dahing te alpa te peglungku. Miglungku a degma tenged te impangkusan te Kir-Harisit. 12 Kene egpeeneng-eneng ka me matig-Muwab ne egmanlibed-libed diye te timplu te me manama ran diye te me bubungan. Egmangampu sikandan taman te egkengabeley e sikandan, piru egkeyimu re ne ware karuan te peg-ampu dan.

13 Sika ka inlalag te Magbebaye ne Manama meyitenged te Muwab. 14 Ne kuntee migkahi sikandin, “Seled te tatelu ne leg‑un† Te Hibruwanen: Ka tatelu ne leg‑un, egpekeiling te me leg‑un te seeye se talag-inaldew. ka eglihad puun kuntee, egkaawe e ka karatuan diye te Muwab. Ne pila-pila naan de ka egkasame te masulug ne keet-etawan din. Ne seeye se egkengasame, me magguye.”