1  ✡ Isa 25:10-12; Hir 48:1-47; Isi 25:8-11; Amu 2:1-3; Sup 2:8-11.Seini ka lalag te Magbebaye ne Manama ne igpanengneng ne egkeyitabu diye te Muwab:

Nahuhus te senge-karusileman de ka siyudad ne Ar ne sakup te Muwab. Ne nahuhus degma te senge-karusileman de ka siyudad ne Kir ne sakup ded te Muwab. 2 Ne migtakereg ka me matig-Dibun diye te me panubaran dan diye te me bubungan eyew egmaninehew diye. Insinehawan te me matig-Muwab ka Nibu wey ka Midiba. Ne migmanetabulug ka tagse sabeka wey migpanumpe.* Ka pegpatabulug wey ka pegpanumpe palinneu te peglungku wey pegkalaggew. 3 Ne migsaluub sikandan te saku ka nangipanew diye te kelesadda. Migpandalawit sikandan migpanaman-taman diye te me baley ran wey diye te me plasa. 4 Ne egpangananey ka me matig-Hisbun wey ka me matig-Ili-Ali. Ne egkarineg ka me laheng dan taman diye te Dyahas. Sikan naa ka egpanguleyi ka me sundalu te Muwab tenged te kaaldek dan. 5 Miglungku a iya te neyitabu te Muwab. Nenakapallahuy ka keet-etawan diye te Suwar wey diye te Iglat-Silikiya. Migsinehew sikandan ne migtakereg diye te inged ne Luhit. Ne migpandalawit ka duma diye te dalan peendiye te Hurunaim tenged te impangkusan dan. 6 Neetiyan e ka weyig diye te Nimrim wey nenaggangu e ka me hilamunen diye te ilis, wey warad e meilem ne pinamula. 7 Purisu in-uyan e te keet-etawan diye te talipag te Weyig ne Arabim ka me karatuan dan wey ka minsan nekey ne nalimud dan. 8 Ne egkarineg ka pegsinehew ran taman diye te katamanan te Muwab, te Iglaim, wey diye te Bir Ilim. 9 Migmalalab te langesa ka weyig te Dibun. Piru duen pad igpeuyan te Manama ne labew pad due ne iyan ka liyun ne egpangimatey te seeye se migpamallahuy puun te Muwab wey te seeye se nenaggaat diye.