1 Te timpu ne si Sargun ka mighari te Asirya, insuhu din ka pangulu te me sundalu rin ne egpalusuran ka Asdud. Migpakig-ehet sikandan te Asdud wey natalu ran seini. 2 Te ware pad seeye neyitabu, due impanengneng te Magbebaye ne Manama pinaahi ki Isayas ne anak ni Amus. Ingkahiyan din si Isayas, “Luunga nu ka saku ne insaluub nu wey ka me sandal nu.” Ne intuman seeye ni Isayas wey miggiphipanew e ne migpalawas wey ware sandal. 3 Ne migkahi ka Magbebaye, “Miggiphipanew ka suluhuanen ku ne si Isayas te tatelu ne leg‑un ne migpalawas wey ware sandal. Ne sika ka sabeka ne palinneu wey tuus meyitenged te egkeyitabu diye te Ihiptu wey Itiyupiya. 4 Su egpandakepen te Hari te Asirya ka me matig-Ihiptu wey matig-Itiyupiya, bate ma wey se buyag. Ne egpeyipanawen sikandan ne egpalawas wey ware sandal. Egkakita ka me piyus dan, wey egkeyilawan iya ka Ihiptu. 5 Ne seeye se migsalig te Itiyupiya wey seeye se mig-aput te Ihiptu, egkengaaldek wey egkengeyilawan. 6 Te timpu ne egkeyitabu e seini, egkahi ka nangugpe diye te ilis te dahat, ‘Pitawa niyu ka neyitabu te nasud ne insalihan ta wey in-aputan ta puun te Hari te Asirya. Egmenuwen te naan e kuntee te eg-awe?’ ”